ފުލުހުންނަށް ކުއްޖާ އަތުލެވުނީ ބޮޑު ކުރިމަތިލުމަކަށްފަހު!

އއ. ހިމަންދޫއަށް މިއަދު ފުލުހުން އަރައި، އެ ރަށުގެ ދެ އަހަރުގެ ކުއްޖަކު ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. ފުލުހުން އެ ރަށަށް އަރައި އެ ކުއްޖާ، ފުލުހުންގެ ބެލުމުގެ ދަށަށް ގެންދިޔައީ ފެމެލީ ކޯޓުން އެގޮތަށް ފުލުހުންނަށް އެންގުމުންނެވެ. މިއީ ފުލުހުން މި އަމުރު ތަންފީޒުކުރުމަށް އެ ރަށަށް އެރި ދެ ވަނަ ފަހަރެވެ.

މީގެ ކުރިން ކުރި މަސައްކަތްވީ ނާކާމިޔާބެވެ. ނަމަވެސް މިއަދު ފުލުހުން ވަނީ އެ ކުއްޖާ ފުލުހުންގެ ބެލުމުގެ ދަށަށް ގެންގޮސްފަ އެވެ. -- ޕެޕަސްޕްރޭ ވެސް ޖެހި މަންޒަރު ވީޑިއޯ އިން ފެނިފައިވެ އެވެ.

މިއަދު ހިމަންދޫގައި ކުއްޖާ ގެންދިޔުމަށް ފުލުހުން ހިންގި އޮޕަރޭޝަންގެ ވީޑިއޯ މިހާރު ސޯޝަލް މީޑިއާގައި ވަނީ އާންމުވެފަ އެވެ. އެ ވީޑިއޯގައި ކުއްޖާގެ ރުއިމުގެ އަޑު ވަރަށް ބާރަށް އިވެ އެވެ. ކުއްޖާ "ގަދަކަމުން" ފުލުހުން ގެންދަނިކޮށް، ރަށުގެ ރައްޔިތުން ވަނީ ހުރަސްއަޅާފަ އެވެ. ރަށުގެ ރައްޔިތުން ވަނީ ނިކުމެ ފުލުހުން ހުއްޓުވަން މަސައްކަތްކޮށްފަ އެވެ. ކުއްޖާ ފުލުހުން ގެންގޮސްފައިވަނީ ކުއްޖާގެ ބައްޕައާއެކުގަ އެވެ. ބައްޕަ ހުރީ ކުއްޖާ އުރައިގެންނެވެ. އަދި ފުލުހުންގެ ލޯންޗަށް ކުއްޖާ އެރުވީ ވެސް ބައްޕަ އެވެ. ބައްޕަ ވެސް ވަނީ ފުލުހުންގެ ބެލުމަށް ގެންގޮސްފަ އެވެ.

ރައްޔިތުންގެ ނުރުހުމުގައި ކުއްޖާ ގެންދަން ފުލުހުންނަށް ދަތިވެ، ފުލުހުން ވަނީ ބާރުގެ ބޭނުންކޮށްފަ އެވެ. އެގޮތުން ޕެޕާ ސްޕްރޭ ޖަހާފައިވެ އެވެ. އަދި މީހުން ކޮއްޕާ، ފަހަތަށް ވެސް ޖައްސާފައިވެ އެވެ. މި ހަމަނުޖެހުމުގައި ހިމަންދޫގެ ބައެއް މީހުންނަށް އަނިޔާވެސް ވަނީވެފަ އެވެ. ކުއްޖާ ގެންދާތީ އަންހެނުންނާއި ފިރިހެނުން ރޮމުން ގެންދާ މަންޒަރު ވީޑިއޯއިން ފެނެ އެވެ.

ފުލުހުން ކުރިން ބުނެފައިވަނީ އޭޕްރީލް މަހުގެ 14 ވަނަ ދުވަހު ފެމިލީ ކޯޓުން ދަރިފުޅުގެ ބައްޕަގެ މައްޗަށް ހަތް ދުވަހުގެ ތެރޭ ކުއްޖާ މަންމައާ ހަވާލުކުރަން ހުކުމެއްކޮށްފައިވާ ކަމަށާއި ނަމަވެސް ހަތް ދުވަސް ވީއިރުވެސް ކުއްޖާ ހަވާލުކޮށްފައި ނުވާތީ ކޯޓްގެ ހުކުމް ތަންފީޒު ކުރަން ފުލުހުންގެ މައްޗަށް އަމުރުކޮށްފައިވާ ކަމަށެވެ. ކުއްޖާ ބަލައި އެ ރަށަށް އެކިފަހަރު މަތިން ދިޔުމުން ވެސް ކުއްޖާ ދިނުމަށް އެ އާއިލާއިން ދެކޮޅު ހަދާފައިވާ ކަމަށް ފުލުހުން ބުނެ އެވެ. އަދި ޖެންޑާއިންނާއި ފުލުހުން އެ އާއިލާއާ އެކި ގޮތްގޮތުން ވާހަކަ ދައްކައިގެން ވެސް އެ އާއިލާ އެގޮތަށް އެއްބަސްވެފައިނުވާ ކަމަށް ފުލުހުން ބުނެ އެވެ.

ފެމެލީ ކޯޓުން ކޮށްފައިވާ ހުކުމުގައި ބުނެފައިވަނީ ކުއްޖާ، އެ ކުއްޖާގެ މަންމައާ ހަވާލުކުރުމަށް އަންގާފަ އެވެ. ފުލުހުން އެ ކުއްޖާ ގެންގޮސްފައިވަނީ މި އަމުރު ތަންފީޒުކުރާށެވެ.

ފުލުުހުން ބުނީ ކޯޓް ހުކުމާ އެއްވެސް ފަރާތަކުން ދެކޮޅު ހަދައި ހުކުމާ އެއްގޮތަށް އަމަލުކުރުން ހުއްޓުވާނަމަ އެމީހަކު ހުއްޓުވައި، އެ ހުކުމް ތަންފީޒު ކުރުމަށް މަސައްކަތްކުރުމަކީ ފުލުހުން ކުރަންޖެހޭ ކަމެއް ކަމަށެވެ.