އެޕްރީލް މަހުގެ ފަހުކޮޅު އެކްޓަރު ކަރަން ސިންގް ގްރޯވަރާ ކައިވެނިކުރި ބޮލީވުޑްގެ މަޝްހޫރު ބަތަލަ ބިޕާޝާ ބާސޫ އަންނަނީ ލޯބިން ކަރަންއާ ކުރި ކައިވެނީގައި އޭނާގެ ހަޔާތް ވަރަށް އުފާވެރިވެގެން ގޮސްފައިވާކަން އެކި ގޮތްގޮތުން ހާމަކުރަމުންނެވެ.
ކައިވެނީގެ ފަހުން ފުރަތަމަ ފަހަރަށް ޓީވީ ޕްރޮގްރާމެއްގައި މިދެތަރިން ބައިވެރިވެފައިވަނީ ކަލާޒް ޗެނަލުން ދައްކާ ކޮމެޑީ ޝޯ "ދަ ކަޕިލް ޝަރްމާ ޝޯ" ގަ އެވެ. މިޝޯއަށް ބިޕާޝާ ދިޔައިރުވެސް ހިންދޫ ދީނުގެ ކައިވެނިކޮށްގެން ތިބޭ އަންހެނުން ކައިވެނީގެ ނިޝާނެއްގެ ގޮތުން ނިއްކުރީގައި ޖަހާފައި ހުންނަ ރަތްކުލައިގެ ތިކި ހުރީ ޖަހާފަ އެވެ. މިއީ ކައިވެނިކުރި ނަމަވެސް ބޮލީވުޑްގެ ތަރިން ވަރަށް ކޮށް ނޫޅޭ ކަމެކެވެ.
ކައިވެންޏަށް ފަހު މީގެފަހުން ކުޅޭ ފިލްމުތަކުގައިވެސް އޭނާގެ ނަމުގެ ފަހަތަށް ސިންގް ގްރޯވަރު ބޭނުންކުރާނެ ކަމަށް ބިޕާޝާ ބުނެފައިވާއިރު، މިހާރު އޭނާގެ އިންސްޓަގްރާމް އެކައުންޓުގައި ވަނީ ނަން، ބިޕާޝާ ބާސޫ ސިންގް ގްރޯވަރް އަށް ބަދަލުކޮށްފަ އެވެ. ނަމަވެސް އަދިވެސް އޭނާގެ ޓްވިޓާ އެކައުންޓުން ވަނީ ނަން މިގޮތަށް ބަދަލުނުކުރެވިފަ އެވެ.
މިކަމާ ގުޅޭގޮތުން ވާހަކަދައްކަމުން ބިޕާޝާ ވަނީ ޓްވިޓާއިން ވެސް އޭނާގެ ނަން ބަދަލުކުރަން މަސައްކަތްކުރި ކަމަށާއި ނަމަވެސް އެނަން މާދިގުކަމަށް ބުނެ ބަދަލުނުކޮށްދިން ކަމަށް ބުނެފަ އެވެ. ބިޕާޝާގެ ޓްވިޓާ އަދި އިންސްޓަގްރާމް އެކައުންޓަކަކީ ވެރިފައިވެސް ކޮށްފައިވާ އެކައުންޓްތަކެވެ.
"މިހާރު އަހަރެންގެ ނަން ހީވަނީ ޖުމްލައެއް ހެން. އެކަމަކުވެސް އަހަަންނަށް ވަރަށް ކަމުދޭ" ނަން ދިގުކަމަށް ބުނަމުން ބިޕާޝާ ބުނެފައިވެ އެވެ.
އިތުރަށް ބިޕާޝާ ވަނީ ކައިވެންޏަށްފަހު ތަފާތު އެކި ވައްތަރު ކާއެއްޗިހި ކައްކަން މިހާރު ދަސްކުރަމުން އަންނަ ކަމަށް ބުނެފަ އެވެ. އަދި މީގެކުރިން ވެސް ކޮންމެވެސް ވަރަކަށް ކައްކާ އުޅޭ ކަމަށާއި ނަމަވެސް ކެއްކުމަކީ އޭނާ އެހާ ގަޔާވާ ކަމެއް ނޫން ކަމަށް ބުނެފަ އެވެ. އޭނާއާ ކަރަންއާ ދެމީހުންގެ ތެރެއިން މޮޅަށް ކައްކަން އެނގޭނީ ކަރަން އަށް ކަމަށްވެސް ބިޕާޝާ ވަނީ ބުނެފަ އެވެ.
ކައިވެންޏަށްފަހު މިދެތަރިން ހަނީމޫން ހޭދަކޮށްފައިވަނީ ރާއްޖޭގަ އެވެ.
