އިންޑިއާގެ ފިލްމު ސެންސަރު ބޯޑުން ވަނީ މާދަމާ ރިލީޒްކުރުމަށް ހަމަޖެހިފައިވާ ފިލްމު "އުޅްތާ ޕަންޖާބު" ގައި ހުތުރު ބަސްތަކާއި ޕަންޖާބުގެ ނަން ހަޑިވާގޮތަށް މަންޒަރުތައް ހިމެނޭ ކަމަށް ބުނެ ފިލްމުގެ 89 މަންޒަރެއް އެޑިޓްކޮށްގެން ނޫނީ ފިލްމު ފާސްކޮށް ނުދޭނެ ކަމަށް ބުނެފަ އެވެ.
ނަމަވެސް މިކަމާ ފިލްމު އުފައްދާ ފަރާތުން އެއްބަސްވެފައިނުވާއިރު، ހިތްހަމަނުޖެހުން ފާޅުކޮށް ވަނީ މިމައްސަލަ މުމްބައި ހައިކޯޓަށް ވައްދާފަ އެވެ.
ކޯޓުން މިމައްސަލައިގައި ދެފަރާތުން ދެއްކި ވާހަކަތަކަށް ބަލައި ވަނީ ސެންސަރު ބޯޑުން އެންގި ހުރިހާ މަންޒަރެއް ފިލްމުން ކަނޑަން ނުޖެހޭނެ ކަމަށާއި ފިލްމުން އުނިކުރަން ޖެހޭނީ އެންމެ މަންޒަރެއް ކަމަށް ނިންމާފަ އެވެ. އެއީ ޝާހިދު ކަޕޫރު ކުޅެފައިވާ ރޮކް ސްޓާ ޓޮމީގެ ކެރެކްޓާ ކޮންސަޓެއް ބަލަން އެއްވެފައިވާ ބައެއްގެ ތެރެއަށް ކުޑަކަމުދާ މަންޒަރެވެ.
އެންމެފަހުން ސެންސަރު ބޮޑާއި ދެމެދު ވަރުގަދަ ބަހުގެ ހަމަލާތަކެއް ބަދަލުކޮށްގެން މިފިލްމަކަށް ސެންސަރު ބޮޑުން ފާސްކޮށްފައިވާ ސެޓްފިކެޓް މިވަނީ އިއްޔެ ހަވީރު ލިބިފަ އެވެ.
މިސެޓްފިކެޓް އިއްޔެ ލިބުމުން ފިލްމު އުފައްދާ ބަލާޖީ މޯޝަން ޕިކްޗާސް އިން ސެޓްފިކެޓްގެ ފޮޓޯއަކާ އެކު ކުރި ޓްވީޓެއްގައި ވަނީ ކުރިން ވެސް ކަނޑައެޅިފައި އޮތް ގޮތަށް މިފިލްމު މާދަމާ ރިލީޒްކުރާނެ ކަމަށް ބުނެފަ އެވެ. އަދި މިއަދުގެ ހެނދުނުން ފެށިގެން ފިލްމުގެ އެޑްވާންސް ބުކިންސް ހެދުމަށް ހުޅުވާލާނެ ކަމަށް ވެސް ބުނެފަ އެވެ.
ޝާހިދު ކަޕޫރު، ކަރީނާ ކަޕޫރު، އާލިއާ ބަޓް އަދި ދިލްޖިތް ދޮސަންޖް ލީޑްރޯލުން ފެނިގެންދާ މިފިލްމަށް ސެންސަރު ބޯޑުން ފާސްކޮށްފައިވާ ސެޓްފކިކެޓް ލިބި ހަމަ ނޭވާ ނުލެވިގެން އުޅެނިކޮށް ފިލްމުގެ ބޮޑު ބައެއް އިންޓަނެޓްގައި ލީކްކޮށްލައިފި އެވެ.
ބޮލީވުޑްގެ ހަބަރުތައް ބުނާގޮތުން މިފިލްމުގެ ގާތްގަނޑަކަށް 40 ވަރަކަށް މިނިޓް ބައެއް ވެބްސައިޓް ތަކުގައި ލީކްކޮށްލާފައިވާއިރު، ބައެއް ވެބްސައިޓްތަކުގައި ފިލްމު އެއްކޮށް ވަނީ ލީކްކޮށްލާފަ އެވެ. ބުނެވޭ ގޮތުގައި ފިލްމު ލީކު ކޮށްލާފައި ވަނީ، ފިލްމު ރިލީޒް ކުރުމަށް ދެކޮޅު ހަދަމުން އަންނަ ފަރާތްތަކުންނެވެ. އެގޮތުން ލީކްކޮށްލާފައިވާ ކޮޕީ ގައި ސެންސަރު ބޯޑަށް ހުށަހަޅާފައިވާ ކޮޕީ ކަމުގައި ލިޔެފައިވެ އެވެ.
މިފިލްމު އިންޓަނެޓްގައި ދައުރުވާން ފެށިތާ ކުޑައިރުކޮޅެއްގެ ތެރޭގައި ކާކުކަން ނޭނގޭ މީހަކު، ފިލްމު ރިލީޒްވުމުގެ ކުރިން ފިލްމު ލީކްކޮށްލާފައިވާ ކަމަށް ބުނެ ވަނީ ސައިބާ ކްރައިމް ޑިޕާޓްމަންޓަށް މައްސަލަ ހުށަހަޅާފަ އެވެ.
"އުޅްތާ ޕަންޖާބް" އަކީ ޕާންޖާބު ސްޓޭޓްގައި މަސްތުވާ އެއްޗިސަށް ޒުވާނުން ދެވި ހިފާފަައިވާ މިންވަރާއި މަސްތުވާތަކެތީގެ ވަބާގައި ޖެހި މުޅި މުޖުތަމައު ހަލާކުވެފައިވާ މިންވަރު ދައްކުވައިދޭ ފިލްމެކެވެ.