މި އަހަރުގެ އެހަނދާނުގައި ޝޯގެ ދެވަނަ ޝޯ ރޭ ވަނީ ދައްކާފަ އެވެ. މިއަހަރުގެ ތީމަކީ ކަވާސް އެވެ. ރޭ ވެސް ފަސް ލަވައެއް ފެނިގެން ދިޔަ އެވެ. ކަވާ ލަވަތަކެވެ.
ރޭ ވެސް ފާހަގަވީ އެއް ކަމެކެވެ. ފުރަތަމަ ރޭ ވެސް ހަމަ ފާހަގަވި ކަމެވެ. އެހަނދާނުގައި ޝޯގެ "ކޮލިޓީ" ރޭގެ ޝޯގައި ވެސް ނެތް ކަމެވެ. އެހެން އަހަރުތަކުގެ އެހަނދާނުގައި ޝޯއިން ފެންނަ ކަހަލަ ހިތްގައިމު ކަމެއް ރޭގެ ޝޯއިން ވެސް ނުފެނެ އެވެ. ރޭގެ ލަވަތައް ވެސް އެވްރެޖެވެ. ނަމަވެސް، އަހުމަދު ޝަބީނާއި އައިމިނަތު ބަތޫލް ހުށަހަޅައިދިން ލަވައަށް ގިނަ ބަޔަކު ވަނީ ތައުރީފުކޮށްފަ އެވެ.
ތައުރީފުކުރުން ހައްގެވެ. ރޭގެ ތަރިންނަކީ ބަތޫލާއި ޝަބީންނެވެ. މި ދެ ފަންނާނުން ހުށަހަޅައިދިނީ "ލޯބިން" މި ލަވަ އެވެ. ވަރަށް ވެސް ހިތްގައިމު ލަވައެކެވެ. ދެ ބައިވެރިންގެ ހުށަހަޅައިދިނުން ވެސް ވަރަށް ފުރިހަމަ އެވެ. ހަރަކާތްތައް ވެސް ހަމަ އެހާ ލޯތްބެވެ. އަރަމުން އަންނަ ބަތޫލްގެ އަޑަށް މި ލަވަ ވަރަށް ގުޅެ އެވެ. ހަމައެހެންމެ ޝަބީންގެ އަޑުން މި ލަވަ އަޑުއަހާލަން ވެސް އެހާ ހިތްގައިމެވެ.
ރޭގައި ދެން އެންމެ ރީތި ލަވައަކަށް ފެނިގެން ދިޔައީ "ހިނިތުންވެލާށޭ ކަލާ" މި ލަވަ އެވެ. މި ލަވަ ރީތިވީ ލަވައިގެ އަސްލު ލަވައަކީ ވެސް މަގުބޫލު ލަވައަކަށްވުން ކަމަށް ވެދާނެ އެވެ. މި ލަވަ ހުށަހަޅައިދިނީ އައިޝަތު ދީނާ އާއި އަހުމަދު އާދަމެވެ. އެއް ކަމެއް ފާހަގަވި އެވެ. އަހުމަދުގެ އަޑާއި އަސްލު ލަވައިގެ އަޑުވެރިޔާ މުހުތާރު އާދަމް އަޑު ވައްތަރު ކަމެވެ. ލަވަ ރީތިވި މައިގަނޑު ސަބަބަކީ އެއީ އެވެ.
މަޝްހޫރު ދެ ލަވަކިޔުންތެރިން ކަމަށްވާ މާއިން އާއި ޔާފިއު ރޭ ހުށަހަޅައިދީފައިވަނީ "ކެހިދޭނަމޭ" މި ލަވަ އެވެ. ޝައްކެ ވެސް ނެތެވެ. މި ލަވަ ވަރަށް މޮޅެވެ. މި ދެ ފަންނާނުންނަކީ ލަވަ ކިޔުމުގައި އޭގެ ދެވަނައެއް ނެތް ދެ ފަންނާނުންނެވެ. ރޭގެ އެހެން ލަވަތަކާ ބަލާފައި މި ލަވަ ތަފާތު ވެސްމެ އެވެ.
ނަސްރުﷲ އަހުމަދާއި އައިމިނަތު މަމްދޫހާ ހުށަހަޅައިދީފައިވަނީ ނަލައޭ ކަލާ މި ލަވަ އެވެ. އަޑުއަހާލަން ފަސޭހަ ލަވަ އެކެވެ. މަޝްހޫރު ބޮޑުބެރު ލަވަކިޔުންތެރިޔާ މަންޑޭގެ ކޮއްކޮ ނަސްރުﷲ މި ލަވަ ހުށަހަޅައިދީފައިވާ ގޮތް ރީއްޗެވެ. އަލަށް މިކަހަލަ ސްޓޭޖަކުން ފެނުނު މަމްދޫހާގެ ލަވަ ކިޔުން ވެސް ރީއްޗެވެ.
"ނެތުމުން" މި ލަވަ ރޭގެ ޝޯގައި ހުށަހަޅައިދިނީ ނާޝިދު އަލީ އާއި މަރިޔަމް ސާލިޔާ އެވެ. ސާލިޔާއަކީ މިދިޔަ އަހަރުގެ އެހަނދާނުގައި ޝޯއިން ތައާރަފުވި ފަންނާނެކެވެެ. ނާޝިދު މިކަހަލަ ސްޓޭޖަކުން ފެނުނު މިއީ ފުރަތަމަ ފަހަރެވެ. މި ލަވަ އަޑުއަހާލަން އެހާ ފަސޭހައެއް ނޫނެވެ. ނަމަވެސް ދެ ފަންނާނުންގެ ވެސް ހުރި ހުނަރެއް ނެރުމަށް ކުރި މަސައްކަތަކަށް ވިއްޔާ ސާބަހެވެ.
