އިންޑިއާގެ ބޮޑު ވަޒީރު ނަރެންދުރަ މޯދީއާ ގާތްގުޅުމެއް އޮންނަ މެގަސްޓާ އަމީތާބް ބައްޗަން، އިންޑިއާގެ ރައީސް ކަމުގެ މަގާމަށް ގެންނަން އުޅޭ ކަމުގެ އަޑުތަކެއް މިފަހުން ވަނީ އަރާފަ އެވެ.
މިވާހަކަތައް ދެކެވިފައިވަނީ އިންޑިއާގެ ވަރުގަދަ ސިޔާސީ ސަހުސިއްޔަތެއް ކަމަށްވާ އަދި ސަމާޖްވާދީ ޕާޓީގެ ކުރީގެ ލީޑަރު އަމަރު ސިންގް އިންޑިއާގެ ރައީސްއަކަށް އަމީތާބު ހަމަޖެއްސެވުމަށް ބޮޑުވަޒީރު މޯދީ އެދިވަޑައިގަންނަވާ ކަމަށް ބުނުމުންނެވެ.
މިހާތަނަށް ވެސް އަމީތާބް އިންޑިއާގެ ރައީސް ކަމަށް އަންނަން އުޅޭ ކަމަށް ދެކެވޭ ވާހަކަތަކާއި ގުޅިގެން އޭނާ ވަކި އެއްޗެއް ބުނެފައިނުވާއިރު، ބެންގާލީ ނޫހަކަށް ދިން އިންޓަވިއެއްގައި ފިލްމުތަކާއި، ފިލްމީ ހަޔާތާއި އަދި ނާކަމީޔާބީ އާއި އަމިއްލަ ބައެއް ވާހަކަތައް ހިއްސާކޮށްފަ އެވެ.
މިވާހަތަކުގެ ތެރެއިން ކުރީގެ ފިލްމީ ތަރި އަދި މިހާރު ސިޔާސީ ދައިރާގައި އުޅުއްވަމުން އަންނަ ޝަތްރުގަން ސިންހަ އަމީތާބް އިންޑިއާގެ ރައީސް ކަމަށް އެންޑޯޒްކުރެއްވި ވާހަކަ އާއި މީތާބް ފަދަ މަޝްހޫރު ޝަހުސިއްޔަތެއް އިންޑިއާގެ ރައީސް ކަމަށް ވަޑައިގެންފިނަމަ އެއީ ފިލްމީ ދާއިރާއަށް ލިބިގެންދާނެ ވަރަށް ބޮޑު ކުރިއެރުމެއް ކަމަށް ބުނެފަ އެވެ. ޝަތްރުގަން ދައްކަވާފައިވާ ވާހަކަތަކަށް އަމީތާބް ބުނެލަން ބޭނުންވަނީ ކީކޭތޯ އެހުމުން ވަނީ ޝަތްރުގަން އަކީ އޭނާގެ ވަރަށް ގާތް ރަހުމަތްތެރިއެއް ކަމަށާއި އޭނާ އެފަދަ ވާހަކައެއް ދައްކާފައިވަނީ މަޖަލަކަށް ކަމަށާއި އެފަދަ ވާހަކަތަކަށް ސަމާލުކަން ނުދިނުމަށް އެދިފަ އެވެ.
އަދި ބައެއް ފަރާތްތަކުން އަމީތާބް އިންޑިއާގެ ރައީސްގެ ގޮތުގައި ފެނިގެންދިއުމަށް އެދުނު ނަމަވެސް އަމީތާބް ވަނީ އެކަމަށް އިންކާރުކޮށްފަ އެވެ.
"އެންމެ ފުރަތަމަ ކަމަކަށް އަހަންނަކީ އެމަގާމަށް ގަބީލް މީހެއްވެސް ނޫން. އެކަމަކަށް އަހަރެންގެ ޝަރުތު ހަމައެއް ވެސް ނުވޭ. އަދި ނުވިތާކަށް އެއީ އަހަންނަށް ވާނެ ކަމެއް ވެސް ނޫން. އަދި އެމަގާމެއް ނުވެސް ލިބޭނެ. އަހަރެން އެންމެންގެ ކިބައިން އެދެން މިވާހަކަތައް ދެއްކުން ހުއްޓާލުމަށް" އަމީތާބް ބުނެފައިވެ އެވެ.
މޯދީގެ ސަރުކާރަށް ދެއަހަރު ފުރުން ފާހަގަކުރުމަށް މިދިޔަ މަހުގެ ފަހުކޮޅު ބޭއްވި ހަފްލާގައި އަމީތާބް ބައިވެރިވެވފައިވާތީ އެ ގައުމުގެ އެންމެ ބޮޑު އިދިކޮޅު ޕާޓީ ކަމަށްވާ ކޮންގްރެސް އިން ވަނީ އޭނާއަށް ވަރަށް ބޮޑަށް ފާޑުކިޔައިފި އެވެ. އަމީތާބު ވަނީ މިހަފްލާގައި އޭނާ ބައިވެރިވެފައިވަނީ އދ. އާއެކކު ބައިވެރިވާ ކެމްޕޭނެއްގެ ސެގްމަންޓެއް ހޯސްޓްކުރަން ކަމަށް ބުނެފަ އެވެ. ނަމަވެސް އިދިކޮޅު ފަރާތްތަކުން ވަނީ މިފަހުން ލީކުވެފައިވާ "ޕެނަމާ ޕޭޕާސް" ގައި އަމީތާބްގެ ނަން ހިމެނިފައި ވާތީ އެކަމުން ސަލާތްވުމުގެ މަގެއް ހޯދުމުގެ ގޮތުން ސަރުކާރާ ގުޅުން ބަދަހިކުރަން މިހަފްލާގައި ބައިވެރިވީ ކަމަށާއި ނޫނީ އޭނާ މިހަފްލާގައި ބައިވެރިވީ މޯދީ އާއި ބީޖޭޕީ އަށް ތާއީދުކުރުމުގެ ގޮތުން ކަމަށް ބުނެފަ އެވެ.
އަމީތާބް ވަނީ މީގެކުރިން ކޮންގްރެސްގެ ފަތާރުން ޕާލިމަންޓް މެމްބަރުކަން ކޮށްފަ އެވެ. ނަމަވެސް އެފަހަރު ކުރެވުނު ހިތި ތަޖްރިބާއިން ވަނީ ދެން ދުވަހަކުވެސް ސިޔާސީ ކަންތައްތަކުގައި ނޫޅޭނެ ކަމަށް ބުނެފަ އެވެ.