މަޝްހޫރު ދެއެކްޓަރުން ކަމަށްވާ އާމިރް ޚާން އާއި ސަލްމާން ޚާންގެ މެދުގައި ގާތް އެކުވެރިކަމުގެ ގުޅުމެއް އުފެދިގެން ގޮސްފައިވަނީ މިދެތަރިން އެކުގައި 1994 ވަނަ އަހަރު ކުޅުނު "އަންދާޒް އަޕްނާ އަޕްނާ" އަށް ފަހު އެވެ.
އޭގެފަހުން ގާތްއެކުވެރިންގެ ގޮތުގައު ތިބުމަށްފަހު މިދެތަރިންގެ ދެމެދުގައި ފިނި ހަނގުރާމައެއް ހިނގައި އަހަރުތަކެއް ވަންދެން ވާހަކަނުދައްކައި ތިބުމަށްފަހު މިހާރު އަނެއްކާ މިވަނީ އެކުވެރިންނަށް ވެފަ އެވެ.
"އަންދާޒް އަޕްނާ އަޕްނާ" ރިލީޒްކުރިތާ 22 އަހަރު ފަހުން މިފިލްމުގެ ދެވަނަ ބައެއް އުފައްދަން މިވަނީ ނިންމާފަ އެވެ. ސަލްމާން އާއި އާމިރްގެ އިތުރުން ކަރިޝްމާ ކަޕޫރާއި ރަވީނާ ތަންޑަން ބަތަލާއިންގެ ގޮތުގައި ފެނިގެން ގޮސްފައިވާ މިފިލްމުގެ ދެވަނަ ބައެއް އުފައްދަން ނިންމުމުން އެކަމާ އުފަލުން ހުރި އާމިރް ވަނީ ދެވަނަ ބައި ވެސް ސަލްމާން އާއެކު ކުޅެން ޝައުގުވެރިވާ ކަމަށް ބުނެފަ އެވެ.
"ފިލްމުގެ ސްކްރިޕްޓް ހަމަ ރަނގަޅިއްޔާ ކުޅެން ބޭނުންވޭ، އެކަމަކު ސަލްމާނާ އެކު" އާމިރް ބުނެފައިވެ އެވެ.
މިފިލްމުގެ ފުރަތަމަ ބައިގައި އާމިރް އާއި ސަލްމާން ފެނިގެން ގޮސްފައިވަނީ ވަރަށް އާދައިގެ ދިރިއުޅުމެއް އުޅޭ އެކަމަކު ވަރަށް މުއްސަނދި ދިރިއުޅުމަކަށް ލޯބިކުރާ ދެއެކުވެރިންގެ ގޮތުގަ އެވެ.
ވިނޭ ސިންހަ އާއި ފެންޓަމް ފިލްމްސް ގުޅިގެން އުފައްދާ މިފިލްމުގެ ދެވަނަ ބައިގެ ސްކްރިޕްޓްގެ މަސައްކަތް މިހާރު ނިމިފައިވީ ނަމަވެސް ޑައިރެކްޓަރާއި ތަރިން އަދި ހަމަޖެހިފައެއް ނުވެ އެވެ. އަދި މިފިލްމުގެ ޝޫޓިން މިއަހަރުގެ ފަހުކޮޅު ފެށޭނެ ކަމަށްވެ އެވެ.