"އަޒްހަރު" ގައި ކުރީގެ ކްރިކެޓް ކުޅުންތެރިޔާ އަޒްހަރުއްދީން ރޯލު ކުޅެ މޮޅު އެކްޓިންއެއް ދައްކުވާފައިވާ އެކްޓަރު އިމްރާން ހާޝިމީ ވެސް ފިލްމު އުފެއްދުމުގެ މަސައްކަތަށް ނިކުމެއްޖެ އެވެ.
އަމިއްލަ ހޯމް ޕްރޮޑަކްޝަން ކުންފުނި، އިމްރާން ހާޝިމީ ފިލްމްސް ބެނާގެ ދަށުން އިމްރާން ފިލްމު ޕްރޮޑިއުސްކުރަން ނިންމާފައިވަނީ "އަޒްހަރު" ގެ ޑައިރެކްޓަރު ޓޯނީ ޑިސޫޒާ އާއެކު އެވެ.
ފިލްމު ޕްރޮޑިއުސަރަކަށްވި ކަން އިއުލާންކުރަން އިމްރާން ނެރުނު ސްޓޭޓްމަންޓްއެއް ގައި ވަނީ އޭނާގެ ގާތްއެކުވެރިއެއްގެ އިތުރުން ވަރަށް ހުނަރުވެރި ފިލްމު ޑައިރެކްޓަރު ޓޯނީ އާއެކު ފިލްމު ޕްރޮޑިއުސްކުރަން ފަށާތީ ވަރަށް އުފާކުރާ ކަމަށް ބުނެފަ އެވެ.
އިމްރާން ވަނީ އެމީހުން އުންމީދު ކުރަނީ ބެލުންތެރިން ގަޔާވާނެ ފަދަ މޮޅެތި އަދި މަޖާ ފިލްމުތަކެއް އުފެއްދުން ކަމަށް ބުނެފަ އެވެ.
އިމްރާންގެ އިތުރުން ޓޯނީ ވެސް ވަނީ އިމްރާނާއެކު މުޅިންއާ މަސައްކަތެއް ކުރެވޭތީ އުފާކުރާ ކަމަށް ބުނެފަ އެވެ. އަދި އެމީހުން ފުރަތަމަ އަށް އުފައްދާ ފިލްމުގެ ސްކްރިޕްޓާއި އެފިލްމަށް ތަރިން ކަނޑައެޅުމުގެ މަސައްކަތް މިހާރު ކުރަމުން އަންނަ ކަމަށް ވެސް ބުނެފަ އެވެ.
އިމްރާން ހާޝިމީ