ޓެރަރިޒަމާއި ހައްދު ފަހަނައަޅައި ދިޔުމާބެހޭ މައްސަލާގައި ދައުލަތުގެ ހާމަކުރި ސިޔާސަތު 11 މެންބަރުންގެ ކޮމެޓީއަކުން ދިރާސާކުރަން ނިންމައިފި އެވެ.
ރައީސް އަބްދުﷲ ޔާމީން މަޖިލީހަށް ފޮނުވި ކަރުދާސް ދިރާސާކުރުމަށް 11 މެންބަރުންގެ ކޮމެޓީއެއް އެކުލަވާލަން ހުށަހެޅީ ވިލުފުށީ ދާއިރާގެ މެމްބަރު ރިޔާޒް ރަޝީދެވެ. ރިޔާޒުގެ މި ހުށަހެޅުން ފާސްވީ 38 މެންބަރުން އެއްކޮޅަށް ވޯޓު ދެއްވުމުންނެވެ. މި ހުށަހެޅުމާ ދެކޮޅަށް ވޯޓު ދެއްވީ އެންމެ މެންބަރެކެވެ.
ހުރިހާ ޕާޓީތަކެއްގެ މެންބަރުން ހިމެނޭ ގޮތަށް އެކުލަވާލި މި ކޮމެޓީގެ މެންބަރުންގެ ނަންތައް ހުށަހެޅުއްވީ ވިލިމާލެ ދާއިރާގެ މެންބަރު އަހުމަދު ނިހާނެވެ. އެ 11 މެންބަރުންނަށް ތާއިދުކުރެއްވީ ގެމަނަފުށީ ދާއިރާގެ މެމްބަރު ޖަމީލް އުސްމާނެވެ.
ކޮމެޓީގެ މެންބަރުން:
- ވިލިމާލެ ދާއިރާގެ މެމްބަރު އަހުމަދު ނިހާން ހުސައިން މަނިކު
- ވިލުފުށީ ދާއިރާގެ މެމްބަރު ރިޔާޒް ރަޝީދު
- ގެމަނަފުށީ ދާއިރާގެ މެމްބަރު ޖަމީލް އުސްމާން
- ކެލާ ދާއިރާގެ މެމްބަރުން އަލީ އާރިފް
- ފޭދޫ ދާއިރާގެ މެމްބަރު އިބްރާހިމް ދީދީ
- އުނގޫފާރު ދާއިރާގެ މެމްބަރު ޖައުފަރު ދާއޫދު
- ހިތަދޫ މެދު ދާއިރާގެ މެމްބަރު އިބްރާހިމް މުހައްމަދު ދީދީ
- ކުޅުދުއްފުށި އުތުރު ދާއިރާގެ މެމްބަރު އަބްދުލްގަފޫރު މޫސާ
- ކުޑަހުވަދޫ ދާއިރާގެ މެމްބަރު އަހްމަދު އާމިރު
- ދަނގެތި ދާއިރާގެ މެމްބަރު އިލްހާމް އަހުމަދު
- މަކުނުދޫ ދާއިރާގެ މެމްބަރު އަނާރާ ނައީމް
މި ކޮމެޓީން ޓެރަރިޒަމާ ބެހޭ ސިޔާސަތު ދިރާސާކުރުމަށް ފާސްކުރީ 39 މެންބަރުންގެ އަގުލަބިއްޔަތުންނެވެ. މިކަމާ އެއްވެސް މެންބަރަކު ދެކޮޅު ހައްދަވާފައެއް ނުވެ އެވެ.
މަޖިލީހަށް މި މައްސަލަ ރައީސް ފޮނުއްވެވީ ޓެރަރިޒަމާއި ހައްދު ފަހަނައަޅައި ދިޔުމަކީ މި ވަގުތު ރާއްޖެއަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާތީ ކަމަށެވެ. އަދި މިއީ ގައުމުގެ ސަލާމަތާއި ރައްޔިތުންގެ ރައްކާތެރިކަމާ ގުޅިފައިވާ މައްސަލައަކަށް ވާއިރު މިއީ މުޅި ދުނިޔެއަށް ވެސް ދިމާވެފައިވާ ބިރުވެރި އެހާމެ ނުރައްކާތެރި މައްސަލައަކަށްވާތީ ކަމަށެވެ.
މިކަމުގައި ރާއްޖެއިން މިހާރު ވެސް އެދެވޭ ފިޔަވަޅުތަކެއް އަޅަމުން ގެންދިޔަ ނަމަވެސް، މިހާރު އޮތް ގާނޫނީ އޮނިގަނޑުގެ ތެރެއިންނާއި، އަދި ގާނޫނީ އޮނިގަނޑު އިސްލާޙުކޮށްގެން ފިޔަވަޅުތަކެއް އަޅަންޖެހޭ ކަމަށް ރައީސް ދެކެވަޑައިގަންނަވާތީ ކަމަށް ވެސް ބުނެފައިވެއެވެ.
މި ސިޔާސަތު ހާމަކުރާ ކަރުދާސް، ރައީސް ޔާމީން މަޖިލީހަށް ފޮނުއްވާފައި ވަނީ މި މަހުގެ އަށް ވަނަ ދުވަހު އެވެ.