އެކި ދާއިރާތަކުން ހާއްސަ ހިދުމަތްތައް ކުރާ ޒުވާނުން ނަށް ހިއްވަރުދިނުމަށް އުފައްދާފައިވާ ބައިނަލްއަގުވާމީ އަމިއްލަ ޖަމާއަތެއް ކަމަށްވާ ޖޫނިއާ ޗެމްބާސް އިންޓަނޭޝަންލް (ޖޭސީއައި) އިން މިއަހަރު ދިނުމަށް ނިންމާފައިވާ "ޓެން އައުޓް ސްޓޭންޑިން ޔަންގް ޕާސަން އެވޯޑް" ގެ މީޑިއާ ޕާޓްނަރަކަށް ޕީއެސްއެމް ހަމަޖައްސައިފި އެވެ.
މިއަދު ޝީ ބިލްޑިންގް ގައި ބޭއްވި ރަސްމިއްޔާތެއްގައި ޕީއެސްއެމްގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓާ އިބްރާހިމް ހަލީލް އެވެ. ޖޭސީއައި މޯލްޑިވްސްގެ ފަރާތުން އެ ޖަމިއްޔާގެ ރައީސް ޔާމީން އާދަމް އެވެ.
ސޮއިކުރެއްވުމަށްފަހު މީޑިއާއަށް މައުލޫމާތުދެއްވަމުން ހަލީލް ވިދާޅުވީ، ޒުވާނުންނާއި ގައުމުގެ ތަރައްގީއަށް ހިންގާ ކޮންމެ ހަރަކާތެއްގައި ޕީއެސްއެމުން ބައިވެރިވާނެ ކަމަށެވެ. ޓޮއިޕް އެވޯޑުގެ މީޑިއާ ޕާޓްނަރަކަށް އެ ކުންފުނި ވުމުގެ މައިގަނޑު ސަބަބަކީވެސް ޒުވާނުން ބާރުވެރިކުރުވައި ރާއްޖޭގައި ތިބި ހުނަރުވެރި ޒުވާނުން، ޕީއެސްއެމް މީޑިއާ މެދުވެރިކޮށް އިޝްތިހާރުކުރުން ކަމަށެވެ.
ހަލީލް ވިދާޅުވީ ދާދި ފަހުން އެ ކުންފުނިން ތައާރަފްކުރި "ޔެސް" ޗެނަލަކީ ޒުވާނުންނަށް ވަރަށް ބޮޑު އިސްކަމެއް ދޭނެ ޗެނަލެއް ކަމަށާއި އެ ޗެނަލް އުފެއްދުމުގެ އެންމެ ބޮޑު ބޭނުމަކަށްވީ ޒުވާނުން ބާރުވެރިކުރުވައި ޒުވާނުންނާއި ގުޅޭ ކޮންޓެންޓް ވަކި ހާއްސަ ކޮންޓެންޓެއްގެ ގޮތުގައި ގެނެސްދިނުން ކަމަށެވެ. އަދި ކުރިއަށް އޮތްތަނުގައި ރާއްޖޭގެ އެއްވަނަ ޗެނަލަކަށް .ޔެސް ޗެނަލް ހެދުމަށް ގިނަ މަސައްކަތްތަކެއް ކުރައްވާނެ ކަމަށް ހަލީލް ވިދާޅުވި އެވެ.
"ޖޭސީއައި ފަދަ ޒުވާނުންނަށް ހާއްސަ އެންޖީއޯ ތަކަށް ޕްރޮގްރާމްތައް ހަދައިގެން ދެއްކުމުގެ ފުރުސަތު ޔެސް ޗެނަލް އެވަނީ ހުޅުވާލާފައި. މަރުހަބާކިޔާނަން ޒުވާނުންގެ ކުރިއެރުމަށް ކުރާ ހުރިހާ މަސައްކަތެއް ވެސް، އެ ފުރުސަތު މިވަނީ ވަރަށް ބޮޑަށް ޕީއެސްއެމުން ފަހިކޮށްދީފައި" ހަލީލް ވިދާޅުވި އެވެ.
މިއަހަރުގެ ޓޮއިޕް އެވޯޑް ދިނުމަށް ނިންމާފައިވަނީ، އަންނަ ސެޕްޓެމްބަރުމަހުގެ ތެރޭގަ އެވެ. އެ އެވޯޑަށް ކުރިމަތިލުމުގެ ފުރުސަތު ޖޭސީއައި އިން ވަނީ އަންނަ މަހުގެ ނިޔަލަށް ހުޅުވާލާފަ އެވެ.
