އެންމެ ފަހުގެ ދެ މުބާރާތުގެ ޗެމްޕިއަން ސްޕޭން 2-0އިން ބަލިކޮށް ޔޫރޯ ފުޓްބޯޅަ މުބާރާތުގެ ގަދަ އަށަކަށް އިޓަލީ ޖެހިލައިފި އެވެ.
މިރޭގެ މެޗުގެ ފުރަތަމަ ލަނޑު ޖަހައިދިނީ ފުރަތަމަ ހާފުގައި ޖިއޯޖިއޯ ކިއެލީނީ އެވެ. މިއީ އިޓަލީގެ ޔުވެންޓަސް އަށް ކުޅޭ ޑިފެންޑަރު ގައުމީ ޓީމަށް ޖަހައިދިން ހަތް ވަނަ ލަނޑެވެ. އިޓަލީގެ ދެ ވަނަ ލަނޑު ޖެހީ ފަހު މިނިޓްގައި ގްރެޒިއާނޯ ޕެއްލޭ އެވެ. މިއީ ސައުތެމްޓަނުގެ ފޯވަޑް ވެސް ގައުމީ ޓީމަށް ޖަހައިދިން ހަތް ވަނަ ގޯލެވެ.
އިޓަލީގެ މި މޮޅަކީ އެންމެ ފަހުގެ ދެ ޔޫރޯއިން ސްޕޭން އަތުން އެ ގައުމު ބަލިވުމަށްދިން ވަރަށް ރަނގަޅު ބަދަލު ހިފުމެކެވެ. ސްވިޒަލޭންޑާއި އޮސްޓްރިއާގައި 2008 ވަނަ އަހަރު ބޭއްވި މުބާރާތުގެ ތަށި ސްޕޭން ހޯދީ ކުއާޓާ ފައިނަލުގައި ޕެނަލްޓީ ޖަހައިގެން އިޓަލީ ކަޓުވާލައިފި ގޮހެވެ.
އަދި މީގެ ހަތަރު އަހަރު ކުރިން ޕޮލެންޑާއި ޔުކްރޭންގައި ބޭއްވި މުބާރާތުގައި ސްޕޭން ތަށި ދިފާއު ކުރީ ފައިނަލުގައި އިޓަލީ ރޮއްވާލާފަ އެވެ.
މި ފަހަރުގެ މުބާރާތުގެ ކުއާޓާ ފައިނަލުން އިޓަލީ ޖާގަ ހޯދުމުން ސެމީ ފައިނަލަށް ދިއުމަށް އެ ޓީމު ކުޅެން ޖެހޭނީ ދުނިޔޭގެ ޗެމްޕިއަން ޖަރުމަނާ އެވެ.
އިޓަލީ އަކީ މި މުބަރާތުގެ 1968 ވަނަ އަަހަރުގެ ޗެމްޕިއަން ޓީމެވެ. އެންމެ ފަހުން އެ ގައުމު ކުޅުނު ދެ ފައިނަލުގައި ވެސް ވަނީ ބަލިވެފަ އެވެ. އެއީ 2012 ވަނަ އަހަރު ސްޕޭން އަތުންނާއި 2000 ވަނަ އަހަރު ފްރާންސް އަތުންނެވެ.
