ށ. އަތޮޅު ފީވަކާއި ފޯކައިދޫން މިދިޔަ އަހަރުން ފެށިގެން ފެންނަމުން ދިޔަ އަނބަށް ގެއްލުންދޭ ސޫތްޕެއް ކަމަށްވާ "ފުރުޓް ފްލައި" ގެ ބައިގަނޑަށް އަމާޒުކޮށް ހާއްސަ ވައްތަރެއްގެ ދަލެއް ޖަހައި ފްރުޓް ފްލައި ކޮންޓްރޯލްކޮށްފި އެވެ.
ފްރުޓް ފްލައި އަކީ އަނބު ދޮންވަމުން އަންނަ އިރު އަނބުގެ ތެރެއަށް ވަނުމަށްފަހު، އެތެރެ އެއްކޮށް ހަލާކުކޮށްލާ ސޫތްޕެކެވެ. މިބާވަތުގެ ސޫތްޕަކީ ދުނިޔޭގެ އެކި ހިސާބުތަކުގައި މޭވާއާއި ތަރުކާރީގެ ދަނޑުވެރިކަން ކުރާ ފަރާތްތަކަށް ދިމާވެފައިވާ ވަރަސް ބޮޑު ނުރައްކަލެއްވެސް މެއެވެ. ފީވަކާއި ފޯކައިދޫއިން ފުރުޓް ފްލައި ފެނުނީ މިދިޔަ އަހަރުގެ ކުރީކޮޅުގަ އެވެ.
އެގްރިކަލްޗާ މިނިސްޓްރީން މިއަދު ނެރުނު ބަޔާނެއްގައި ބުނީ، ފީވަކުން ފްރުޓް ފްލައި ފެނުމުން، ސޫފި ކޮންޓްރޯލް ކުރުމަށް، ފެރޮމޯން ޓްރެޕް، ދާތަކެއް ބޭނުންކުރި ކަމަށާއި، އެ ދާ ތަކުގައި ޖެއްސި ސޫފި ގިނަ ދުވަސްތަކަކަށް މޮނިޓާ ކުރި ކަމަށެވެ.
ފެރޮމޯން ދަލަކީ އޭގައި އަންހެން މެހީގެ ވަސް ބޭނުން ކޮށްގެން އެއަށް ފިރިހެން މެހި ދޯޅުކޮށް ދަލުގައި އިށީންނަ ފިރިހެން މެހި މަރުވާ ގޮތަށް ތައްޔާރުކޮށްފައިވާ އެއްޗެކެވެ.
އެގްރިކަލްޗާ މިނިސްޓްރީން ބުނީ، އެއް އަހަރަށް ދާ ޖަހައިގެން މޮނިޓާ ކުރުމަށްފަހު މިއަހަރުގެ މެއި މަހު އެ ދެރަށަށް ގޮސް ބެލި ބެލުމުން މެހިތައް އެއްކޮށް މަރުވެފައިވާކަން ފާހަގަވެފައިވާ ކަމަށެވެ.
އެ ދެރަށުން ފްރުޓް ފްލައި ކޮންޓްރޯލް ކުރެވުމާއެކު އިތުރު ހަ އަތޮޅެއްގައި ވެސް އެބާވަތުގެ ސޫފި އުޅޭތޯ ބެލުމަށް ބައެއް ރަށްރަށަށް ޓްރެޕް ހަވާލުކޮށްފައިވާނެ ކަމަށެވެ. އެހެންކަމުން އެފަދަ ސޫތްޕެއްގެ އަލާމާތެއް ފެނިއްޖެނަމަ ކަސްނުކޮށް އަންގަން މިނިސްޓްރީން ވަނީ އެދިގފަ އެވެ.