ތައްޓަކަށް އެއްލާލި ހޫނު ރޮއްޓެއް ހެން، ސޯޝަލް މީޑިއާގެ އެކި ސައިޓުތަކުގައި މިފަހަކުން އެންމެ ގަދަޔަށް ދަމައި ވީދައި ހެދި އެއް އަލްބަމަކީ "ފޮލޯމީޓް" ހޭޝްޓެގް ގެ ދަށުން ރަޝިއާގެ ދެ ލޯބިވެރިއަކު އިންސްޓަގްރާމްގައި ހިއްސާކުރަން ފެށި ހިތްގައިމު އެހެނަސް ނިކަން އާދަޔާ ހިލާފު ފޮޓޯ ތަކެކެވެ. އެ ފޮޓޯތަކުގައި ފެންނަނީ ދުނިޔެ ބަލަން ކެތްމަދުވެ، ދުއްވައިގަންނަން ތައްޔާރަށް ހުންނަ އަންހެން ކުއްޖެއްގެ އަތުގައި ފިރިހެނަކު ހިފަހައްޓައިގެން ހުންނަ މަންޒަރެވެ. މި ފޮޓޯތައް ފެނި ނިކަން ގިނަ ބަޔަކު އެއަށް ގަޔާވިއެވެ. ފޮޓޯ ނެގުމަށް ދެވިހިފާފައި ތިބި އެތައް ބަޔަކު އެ ސްޓައިލަށް ފޮޓޯ ނެގުން ޓުރެންޑަކަށް ވެސް ބަދަލުކުރި އެވެ.
އަނެއްކާވެސް އެފަދަ އާ ވާހަކައެއް މިވަނީ ފޭސްބުކާއި ޓުވިޓާ ފަޅާލާފައެވެ. އެކަމަކު މިއަކީ "ފޮލޯމީޓް"އާ ބެހޭކަމެއް ނޫނެވެ. މާ މޮޅު ފޮޓޯ ގްރާފަރަކު ނަގައިގެން އުޅޭ ކޮލިޓީ ފޮޓޯތަކެއްވެސް ނޫނެވެ. މިއީ ކައިވެންޏަށް ހަތް މަސްފަހުން އެއްކުރި ހުރިހާ ލާރިއެއް ހިފައިގެން މާމުއި ހަނދުވަރު ދެކިލަން ތައްޔާރުވި ޕާކިސްތާނުގެ ދެމަފިރިއެއްގެ ދަތުރަށް ވީގޮތް ސިފަކޮށްފައި ހުރި ފޮޓޯތަކެކެވެ.
މި ފޮޓޯތަކުގައި ފެންނަނީ ހޫމާ މޮބިން ކިޔާ އަންހެނެކެވެ. ކައިވެންޏަށް ހަތް މަސްވީ ފަހުން އެކުގައި އެމެރިކާއަށް ހަނީމޫން ދަތުރަށް ފަށަން ތައްޔާރުވި ދެމަފިރިންގެ ދަތުރު ޗާޓުގައި "ސްޓޮޕް" ފާހަގައެއް ޖަހަންޖެހުނީ، ފިރިމީހާ، އަރްސަލާން ސީވާ އަށް ފެހި ވިސާ ނުލިބުމުންނެވެ. ފިރިމީހާއަށް ދަތުރު ދެވޭ ގޮތް ނުވީއެވެ. އެކަމަކު ހޫމާ ބޭނުންވީ ކޮންމެހެންވެސް ހަނީމޫން ދަތުރު ދާށެވެ. އެކަމަށް އޭނާގެ ފިރިމީހާގެ މަންމައާއި ބައްޕަ އެއްބަސްކުރުވައި އެންމެ ފަހުން އެ ދެމީހުންނާއެކު ދަތުރު ފެށިއެވެ. ހޫމާ އޭނާގެ ދަތުރު ފެށީ މި މީހާގެ މަންމައާއި ބައްޕައާއެކު ބޯޓެއްގައި ނަގާފައި ފޭސްބުކަށްލި ފޮޓޯ އަކާ އެކު އެވެ. އޭގައި އޭނާ ބުނެފައިވަނީ "އަހަރެން މިދަނީ އަހަރެންގެ މައިދައިތަ އާއި ބަފައިބެއާ އެކީ، އެކަމަކު ފިރިމީހާ ނެތި ހަނީމޫން ހަނީމޫނަކަށް ވާނީ ކިހިނެއް،" މިހެންނެވެ.
އޭގެ ފަހުން ހޫމާ ދިޔައީ އޭނާ ދަތުރުގައި ދިޔަ ކޮންމެ ތަނަކުން ފޮޓޯއެއް ފޭސްބުކްގައި ހިއްސާކުރަމުންނެވެ. މި ފޮޓޯތަކުން ފެންނަ އެންމެ ތަފާތު ކަމަކީ، ފޮޓޯތަކުން ފެންނަނީ އޭނާ އެކަންޏެވެ. ނަމަވެސް ހޫމާ ހުންނަނީ ފިރިމީހާގެ ކޮނޑުގައި އަތްބާއްވައިގެން ހުންނަ ގޮތަށް އަތް އުފުލައިގެން އިންތިހާއަށް ދެރަވާ މޫނެއް ދައްކައިގެންނެވެ. އެ ފޮޓޯތަކުން ދޭހަކޮށްދެނީ އޭނާ ދާ ކޮންމެ ތަނަކުންވެސް ފިރިމީހާ މަތިން އިންތިހާއަށް ހަނދާންވާ ކަމެވެ. އަދި ގާތުގައި ހުންނަން އެދޭ ކަމެވެ.
ދިޔަ އެތައް ތަނަކުން އެގޮތައް އަތް ބަހައްޓައިގެން ހުރެ ފޮޓޯތަކެއް ނެގުމަށްފަހު ދެން ފެންނަނީ އަނެއްކާވެސް ތަފާތު ފޮޓޯއެކެވެ. ދަރުތުގެ ވަކި ހިސާބަކުން އޭނާގެ މޯބައިލް ފޯނުވެސް ގެއްލެނީއެވެ. އެހެންކަމުން އެ ފޮޓޯތަކުގައި ފެންނަނީ، ފިރިމީހާގެ ކޮނޑުގައި އެއް އަތް އަތްބާއްވައިގެން، އަނެއް އަތުން ފޯނުގައި ހިފަހައްޓައިގެން ހުންނަ ގޮތަށް ރޮވެން ކައިރިވެފައި ހުންނަ ގޮތަށް މޫނަށް ވައްތަރު ޖައްސައިގެން ހޫމާ ހުންނަނި ކޮށެވެ.
ދަރުތު ނިންމާލަމުން ހޫމާ ލާފައިވަނީ ފޯނު ގެއްލި ފިރިމީހާ ނެތުމުން ރޯކަމަށް ދައްކާ ފޮޓޯ އެކެވެ.
ހޫމާއަކީ ޕާކިސްތާނުގެ އެޑް އެޖެންސީއެއްގައި މެނޭޖަރަކަށް މަސައްކަތް ކުރާ އަންހެނެކެވެ. އެކަނި އެމެރިކާގައި ހޭދަކުރި ހަނީމޫނުގެ ފޮޓޯތަކާ ބެހޭގޮތުން ޕާކިސްތާނުގެ ނޫހަކަށް ދީފައިވާ އިންޓަވިއުއެއްގައި އޭނާ ބުނީ، އެގޮތަށް ފޮޓޯ ނަގަން ހިޔާލު އައީ އޭނާއާ ފިރިމީހާ އަރްސަލާންއާ ރައްޓެހިވެގެން އުޅުނު އިރު ކައިވެންޏަށް ދުވަސް ކައިރިވެފައި އޮއްވާ ގައުމުން ބޭރަށް ދާން ޖެހުމުން އެ ދަތުރުގައި އަރްސަލާން، އޭނާގެ ކޮނޑުގައި ހިފަހައްޓައިގެން ހުންނަ ގޮތަށް ހުރެ ނަގާފައި ފޮނުވި ފޮޓޯއެއް ފޯނުން ފެނުމުން ކަމަށެވެ.
