އުމުރުން މިހާރު 75 އަހަރުގެ ކުރީގެ މަޝްހޫރު ފުޓްބޯޅަ ކުޅުންތެރިޔާ ބްރެޒިލްގެ ޕެލޭ ތިން ވަނަ ކައިވެންޏެއްކޮށްފި އެވެ.
ދުނިޔެދުށް އެންމެ މޮޅު އެއް ފުޓްބޯޅަ ކުޅުންތެރިޔާ ޕެލޭ އޭނަ އަށްވުރެ 25 އަހަރު ހަނގު މާސިއާ ކިބޭލޭއާ އެވެ. ރައްޓެހިވެގެން އުޅޭތާ ހަ އަހަރު ފަހުން ދެ މީހުންގެ ކައިވެނީގެ ރަސްމިއްޔާތު އޮތީ ބްރެޒިލްގެ ސައުޕޯލޯގަ އެވެ.
ބްރެޒިލްގެ ގައުމީ ޓީވީން ވަނީ ތިން ފަހަރު ވޯލްޑް ކަޕް ކާމިޔާބުކޮށްފައިވާ ޕެލޭގެ ކައިވެނީގެ ބައެއް މަންޒަރުތައް ވަގުތުން ދުރައް ދައްކައިފަ އެވެ. ކައިވެނީގެ ވާހަކަތައް ގެނެސްދީފައިވާ ނޫސްތަކުން ބުނެފައިވަނީ މި ދެމީހުން އެންމެ ފުރަތަމަ ބައްދަލުވީ 1980 ވަނަ އަހަރު އެމެރިކާއިން ކަމަށެވެ. އަދި މި ދެމީހުން ކައިވެނި ކުރަން ނިންމާފައި އޮތީ މީގެ ދެ އަހަރު ކުރިން ނަމަވެސް އެކަން ފަސްކުރީ ޕެލޭ އަށް ދިމާވި ސީރިއަސް ސިއްހީ މައްސަލަތަކުގެ ސަބަބުން ކަމަށެވެ.
ޕެލޭ އެންމެ ފުރަތަމަ ކައިވެންޏެއް ކުރީ 1966 ގަ އެވެ. އޭނާގެ ފުރަތަމަ ކައިވެންޏަށް ތިން ކުދިން ލިބިފައިވާއިރު ދެ ވަނަ ކައިވެނި ކޮށްފައިވަނީ 1994 ގަ އެވެ. މިކައިންވެންޏަށް އޭނާ އަށް ދެ ކުދިން ލިބިފައިވެ އެވެ.
ބްރެޒިލަށް 1958 އާއި 1962 އަދި 1970 ވަނަ އަހަރުގެ ވޯލްޑް ކަޕް ކާމިޔާބުކޮށްދިން ޕެލޭ އަކީ ފީފާއިން ހޮވި ހުސްވި ގަރުނުގެ އެންމެ މޮޅު ދެ ކުޅުންތެރިންގެ ތެރެއިން އެއް ކުޅުންތެރިޔާ އެވެ.