ކާނިވާ ސަރަހައްދުގައި އިދިކޮޅު އިއްތިހާދުން ބޭއްވުމަށް ތައްޔާރުވަމުންދިޔަ ޖަލްސާ މޫސުމް ގޯސްވުމުގެ ސަބަބުން ކެންސަލް ކޮށްފި އެވެ.
ދާދި ދެންމެ ކެންސަލް ކުރި ޖަލްސާ އާ ބެހޭ ގޮތުން އިއްތިހާދުގެ ސްޕޯކްސްޕާސަން އަދި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަހްމަދު މަހްލޫފް ވިދާޅުވީ މިރޭގެ ޖަލްސާ އެންމެ ފަހު ވަގުތާއި ހަމައަށްވެސް ކުރިއަށް ގެންދިޔުމަށް ނިންމި ކަމަށާއި އެކަމަށް ތައްޔާރީތައް ވަމުން އައި ކަމަށެވެ. އެހެން ނަމަވެސް ޖަލްސާ ބާއްވަން މޫސުން ތަންނުދިނީ ކަމަށް ވެސް ވިދާޅުވި އެވެ. މި އެއްވުން ބާއްވާނޭ ދުވަހެއް އަންގާނޭ ކަމަށްވެސް މަހުލޫފު ވިދާޅުވި އެވެ.
ކާނިވާ ސަރަހައްދުގައި މިރޭ ބޭއްވުމަށް ހަމަޖެހިފައިވާ ޖަލްސާ ބޭއްވުމަށް ހައުސިން މިނިސްޓްރީ އިން އިއްޔެ ދިން ހުއްދަ ބާތިލްކޮށްފައި ވަނީ މިއަދު ހެނދުނު އެވެ. އެ ހުއްދަ ބާތިލް ކުރި ސަބަބެއް ކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވީ ކާނިވާ ސަރަހައްދުގައި މިރޭ ޖަލްސާއެއް ބޭއްވުމަށް ހުއްދަ ދިނީ އެމްޑީޕީ އަށް އެކަނި ކަމުގައިވުމެވެ. އަދި އެމްޑީޕީއަށް އެ ހުއްދަ ދިން އިރުވެސް، އެ ސަރަހައްދު އެހެން ފަރާތަކަށް ދޫނުކުރުމަށް އެމްޑީޕީއަށް ޝަރުތު ކުރި ނަމަވެސް، އިދިކޮޅު އިއްތިހާދު ކިޔާ ބައެއްގެ ޖަލްސާއެއް އެ ސަރަހައްދުގައި ބޭއްވުމަށް އެމްޑީޕީގެ ފަރާތުން އިއުލާން ކުރި ކަން ވެސް އޭނާ ފާހަގަ ކުރެއްވި އެވެ.
ހައުސިން މިނިސްޓްރީގެ އެ ނިންމުމަށް ފަހު ވެސް އެންމެ ފަހު ވަގުތާ ޖެހެންދެން އެ ސަރަހައްދުގައި ޖަލްސާއެއް ބޭއްވުމަށް ގޮޑި ޖަހައި އައީ ތައްޔާރީތަކެއް ވަމުންނެވެ. އެހެން ނަމަވެސް ފުލުހުން އެ ސަރަހައްދަށް ގޮސް އެތަނުގައި ޖަލްސާ ނުބޭއްވުމަށް ވަނީ ނަސޭހަތްތެރިވެފަ އެވެ.