ގަން އިންޓަނޭޝަނަލް އެއާޕޯޓުގައި ހަދާ ސީޕްލޭން ބޭސް ކުރިއަށް އޮތް ދެ މަސް ދުވަހުގެ ތެރޭގައި ހުޅުވައި ދަތުރުތައް ފަށާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިރޭ ވިދާޅުވެއްޖެ އެވެ.
ފުވައްމުލަކު- އައްޑޫގައި ދަތުރުފަތުރުގެ ހިދުމަތް އިފުތިތާހު ކުރުމަށް އައްޑޫގައި މިރޭ ބޭއްވި ޖަލްސާގައި މިނިސްޓަރު ސައީދު ވިދާޅުވީ ކުރިއަށް އޮތް ދެ މަސް ދުވަހުގެ ތެރޭގައި ގަން އިންޓަނޭޝަނަލް އެއާޕޯޓުން ސީޕްލޭން އުދުއްސޭ ވަރުވާނެ ކަމަށެވެ.
"އަޅުގަނޑަށް މައުލޫމާތު ލިބިފައިވާ ގޮތުގައި އައްޑޫ އިންޓަނޭޝަނަލް އެއާޕޯޓު ބޮޑުކުރެވި ހުޅުވިގެން މިދަނީ މި ސަރުކާރުގެ މަސައްކަތްތަކުގެ ތެރެއިން. ވަރަށް ހިންގުންތެރި ބޭފުޅެއް އެއާޕޯޓް ކަންތަކާ ހަވާލުވެ ހުންނެވީ އިބްތިޝާމް. އެ ބޭފުޅާ ވިދާޅުވި ގޮތުގައި ގާތްގަނޑަކަށް ދެ މަސް ދުވަހުގެ ތެރޭގައި ސީޕްލޭން ހަބެއްގެ ގޮތުގައި އެ ތަން ހުޅުވޭނެ،" ސައީދު ވިދާޅުވި އެވެ.
ސައީދު ވިދާޅުވީ އެއާޕޯޓް ހިންގާ ކުންފުނީގެ ވިސްނުން ހުރީ މި އެއާޕޯޓަކީ ހަގީގީ ތަނަކަށް ހެދުމަށް ކަމަށެވެ. އޭނާ ވިދާޅުވީ ރަންވޭ ބޮޑުކުރުމުގެ މަސައްކަތް ވެސް ގާތްގަނޑަކަށް ނިމިފައިވާ ކަމަށެވެ. އަދި ކުރިއަށް އޮތް ދުވަސްތަކުގެ ތެރޭގައި އައްޑޫ އެއާޕޯޓް ފުޅާކުރަން ގެންދާ މަޝްރޫއު ވެސް ކާމިޔާބު ކަމާ އެކު ނިންމާ އެއާޕޯޓް ހަގީގީ އިންޓަނޭޝަނަލް އެއާޕޯޓަކަށް ހަދާނެ ކަމަށް ވެސް ސައީދު ވިދާޅުވި އެވެ.
"މި ރަށަށް، ގަމަށް މީހުން ގެނެސްގެން ކައިރި ހިސާބުތަކަށް މީހުން ގެންދިއުމަށް ވިސްނުން ހުރީ. މިއީ ނޫންތޯ ތަރައްގީއަކީ،" ސައީދު ވިދާޅުވި އެވެ.