ލޯނު އުސޫލުން ދޫކޮށްފައި ހުރި އެޓޭކިން މިޑްފީލްޑަރު ހުއާން ކުއަޑްރާޑޯ އެނބުރި ޗެލްސީ އަށް ގެނައުމަށް ކޯޗު އެންޓީނިއޯ ކޮންޓޭ ނިންމައިފި އެވެ.
ކޮލަމްބިއާގެ 28 އަހަރުގެ ކުޅުންތެރިޔާ އެންމެ ފުރަތަމަ ޗެލްސީ އަށް ގަތި ކުރީގެ ކޯޗު ހޯސޭ މޮރީނިއޯ އެވެ. ނަމަވެސް ލޯނު އުސޫލުން ނިމިދިޔަ ސީޒަނުގައި އިޓަލީގެ ޔުވެންޓަސް އަށް ކުޅެން އޭނާ ދޫކޮށްލީ ޗެލްސީގައި އެދެވޭ ކުޅުމެއް ނުދެއްކުމުންނެވެ.
ނަމަވެސް ޓީމުގެ މިހާރުގެ ކޯޗު ކޮންޓޭ ބުނީ ކުއަޑްރާޑޯ ދޫކޮށްލަން އޭނާ ބޭނުންނުވާ ކަމަށެވެ.
"އަހަރެން ޔުވެންޓަސްގައި ހުރި އިރު ވެސް އޭނާ ހޯދަން މަސައްކަތް ކުރިން. އޭނާ އަކީ މިހާރު ޗެލްސީގެ ކުޅުންތެރިއެއް. އޭނާ ވަރަށް އަވަހަށް އަހަރުމެންނާ ގުޅޭނެ. އޭނާ އަކީ އަހަރެން ބޭނުންވާ ކުޅުންތެރިއެއް. މިނިންމުން ބަދަލުވެއްޖެނަމަ އަހަރެން (ނޫސްވެރިންނަށް) އަންގާނަން،" ކޮންޓޭ ބުންޏެވެ.
ކުއަޑްރާޑޯ ވަނީ އެނބުރި އިޓާލިއަން ލީގަށް ބަދަލުވުމަށްފަހު ޔުވެންޓަސްގައި ރަނގަޅު ކުޅުމެއް ދައްކައިފަ އެވެ.
ޗެލްސީގައި އޭނާ އެންމެ ހަތަރު މެޗުގައި ސްޓާޓް ކުރި ނަމަވެސް ފިއޮރެންޓީނާ އާއި އުނިދޭޒީގެ ކުރީގެ ކުޅުންތެރިޔާ ދެއްކި ކުޅުމުގެ ސަބަބުން އޭނާ ބަހައްޓަން ޔުވެންޓަސް ވެސް ވަނީ ބޭނުންވެފަ އެވެ.
ކުއަޑްރާޑޯ އަކީ ކުރީގެ ކޮންމެ މަގާމަކަށް ވެސް ކުޅެވޭ ކުޅުންތެރިއެކެވެ.