މިދިޔަ އަހަރުގެ މެއި މަހުގެ އެއްވަނަ ދުވަހު ބޭއްވި މޭޑޭ މުޒާހަރާގައި ފުލުހަކަށް ހަމަލާދިން ކަމަށް ބުނެ، ހައްޔަރުކުރި ހަ މީހަކު ފަސް އަހަރަށް ޖަލަށްލުމަށް މިއަދު ހުކުމްކޮށްފި އެވެ. މި ހަ މީހުންގެ މައްޗަށް ވެސް އުފުލީ ހަތިޔާރު ބޭނުންކޮށްގެން މާރާމާރީ ހިންގުމުގެ ދައުވާ އެވެ.
ކްރިމިނަލް ކޯޓުން މިއަދު ކުރި ހުކުމްގައި ބުނެފައިވަނީ، މެއި އެއްވަނަ ދުވަހުގެ ރޭ 10:00 އާއި 10:30 އާ ދެމެދުގެ ވަގުތެއްގައި މުޒާހަރާގެ ބައިވެރިން ކޮންޓްރޯލުކުރަމުންދިޔަ ޕޮލިސް ސާޖަންޓު އަބްދުއްރަހްމާން ހުސައިން މަގު މައްޗަށް ވައްޓާލާފައިވާ ކަމަށެވެ. މި ހާދިސާ ހިނގާފައިވަނީ ޗާންދަނީމަގު އިސްކަންދަރު ސްކޫލް ކައިރީގަ އެވެ. ސާޖަންޓު އަބްދުއްރަހްމާން ހުސައިން ވައްޓާލީ، ޗާންދަނީ މަގުން އުތުރުން ދެކުނަށް ދުވެފައި ދަނިކޮށް މުޒާހަރާގެ ބައިވެރިއެކެވެ.
މި މައްސަލާގައި ފަސް އަހަރުގެ ޖަލު ހުމުމެއް އައިސްފައިވަނީ ލ. ގަން އެއްގަމުގެ ނާސިރާ އަލީ އާއި ގ. ބްލޫވޭވް ފަރުހަތު އަލީ އާއި ގ. ކީމާ އަބްދުﷲ ރަޝީދާއި ގދ. ގައްދޫ ނީލޯފަރުމާގެ އުމަރު ގާހިރު އަދި މ. ބާންސަރީގެ އިބްރާހީމް ލަބާން ޝަރީފްގެ މައްޗަށެވެ.
މި މައްސަލާގައި އިތުރު ތިން މީހެއްގެ މައްޗަށް ވެސް ދައުވާކުރި އެވެ. އެއީ، ތ. ގުރައިދޫ ރޯޒްވިލާ އަހުމަދު އިބްރާހިމާއި ދަފުތަރު ނަންބަރު 9130 މޫސާ ޝަރުމީލާއި މއ. ފޯޗިއުން އަލީ ރަޝީދުގެ މައްޗަށެވެ. ނަމަވެސް މި މީހުންގެ މައްޗަށް ދައުވާ ސާބިތުނުވާ ކަމަށް ކޯޓުން މިއަދު ވަނީ ކަނޑައަޅާފަ އެވެ.
މީގެކުރިން ވެސް މޭޑޭ މުޒާހަރާގައި ފުލުހެއްގެ ގައިގާ ހެލްމެޓަކުން ޖެހި މީހެއް ހަތް އަހަރަށް ޖަލަށްލުމަށް ހުކުމްކުރި އެވެ. އެ ހުކުމްކުރީ ޓެކްސީ ޑްރައިވަރެއް ކަމަށްވާ ނ. މިލަދޫ ނޫރާނީގޭ މުހައްމަދު އިގުބާލްގެ މައްޗަށެވެ.
މޭޑޭގެ މުޒާހަރާގައި ހިނގާދިޔަ ކަންތައްތަކާ ގުޅިގެން މިއަދު ފަސް މީހެއްގެ މައްޗަށް ހުކުމް އިއްވާފައިވާއިރު އެ ދުވަހު ދެއްކެވި ވާހަކައެއްގެ ސަަބަބުން ޓެރަރިޒަމްގެ ކުށް ސާބިތުވެ، އަދާލަތު ޕާޓީގެ ރައީސް އިމްރާން އަބްދުﷲ ވަނީ 12 އަހަރަށް ޖަލަށްލާފަ އެވެ.