އާޖެންޓީނާގެ ކޯޗްކަން ބްރެޒިލްގެ ސައުޕޯލޯގެ ކޯޗަކަށް ހުރި އެޑްގާޑޯ ބައުޒާ ހަމަޖައްސައިފި އެވެ.
ބައުޒާ 58، އށް އޮތް އެންމެ ފުރަތަމަ މަސައްކަތަކަށް ވާނީ އާޖެންޓީނާގެ ގައުމީ ޓީމުން ރިޓަޔާ ކުރިކަން އިއުލާންކޮށްފައިވާ ދުނިޔޭގެ އެންމެ މޮޅު ކުޅުންތެރިޔާ ލިޔޮނަލް މެސީ އަނބުރާ ގައުމީ ޓީމަށް ގެނައުމަށް މަސައްކަތް ކުރުމެވެ.
ސައުޕޯލޯ އިން ނެރުނު ބަޔާނެއްގައި ބުނެފައިވަނީ އާޖެންޓީީނާގެ ކޯޗްކަން ހުށަހެޅުމުން ކުލަބާ މަޝްވަރާ ކުރުމަށްފަހު ގައުމީ ޓީމާ ހަވާލުވަން އެނާ ނިންމުމުން ކުލަބުން ވެސް އޭނާ ދޫކޮށްލަން ނިންމަފައިވާ ކަމަށެވެ.
އާޖެންޓީނާއިން ވަނީ އެޓީމުގެ ކޯޗުކަން ހަވާލު ކުރުމަށް ޔޫރަޕްގައި މަސައްކަތް ކުރާ އެގައުމުގެ މަޝްހޫރު ކޯޗުންނަށް ހުށަހަޅާފަ އެވެ.
އެގޮތުން އެތުލެޓިކޯ މެޑްރިޑްގެ ކޯޗް ޑިއޭގޯ ސިމިއޯނީ އާއި ސެވިއްޔާގެ ޖޯޖް ސަމްޕޯލީ އާއި ޓޮޓަންހަމްހޮސްޕާގެ މައުރީޝިއޯ ޕާޝެޓީނޯ ހިމެނެ އެވެ. ނަމަވެސް އެކޯޗުން ވަނީ އެ ހުށެހެޅުމަށް ދެކޮޅު ހަދާފަ އެވެ.
"އަހަރެމެން ގިނަ ކޯޗުންނާ ވާހަކަ ދެއްކިން، ނަމަވެސް އަހރެމެންނަށް ފެނުނީ ބައުޒާއަކީ މިކަމަށް އެންމެ ރަނގަޅު ކެނޑިޑޭޓްް ކަމަށް" ފީފާއިން އާޖެންޓީނަގެ ފުޓްބޯލް ފެޑްރޭޝަނަށް ހަމަޖައްސާފައިވާ ނޯމަލައިޒޭޝަން ކޮމިޓީގެ ޗެއާމަން އާމަންޑޯ ޕެރޭޒް ވިދާޅުވި އެވެ.
އޭނާ ވިދާޅުވީ ބައުޒާއާއެކު އާޖެންޓީނާގެ ސަޕޯޓަރުން ބޭނުންވާ ކާމިޔާބަށް ވާސިލު ވެވޭނެ ކަމަށް އުންމީދު ކުރާ ކަމަށެވެ.
އަދި މެސީ އަނބުރައި ޓީމަށް ގެނައުމަށް "ބައުޒާއާ މެސީއާ ގުޅުން އެބައޮތް" ކަމަށްވެސް ޕެރޭޒް ވިދާޅުވި އެވެ.