ޝާލްކޭގެ ޖަރުމަންގެ މިޑްފީލްޑާ ލެރޯއީ ސޭން ފަސް އަހަރު ދުވަހުގެ އެއްބަސްވުމުގެ ދަށުން މެންޗެސްޓާ ސިޓީ އަށް ސޮއިކޮށްފި އެވެ.
މި އަހަރު ޖަރުމަންގެ ޔޫރޯ ސްކޮޑްގައި ހިމެނުނު، ސޭން، މެން ސިޓީއަށް ބަދަލުވީ 37 މިލިއަން ޕައުންޑަށެވެ.
ސޭން އަކީ ޖަރުމަންގެ ބަޔާން މިޔުނިކްގެ ކުރީގެ ކޯޗް ޕެޕް ގާޑިއޯލާ މެން ސިޓީއަށް ބަދަލުވި ފަހުން، އެޓީމަށް ގެނައި ހަ ވަނަ ކުޅުންތެރިޔާއެވެ.
އޭނާ ބުނީ ޖަރުމަންގެ ބުންޑެސް ލީގާއިން އިނގިރޭސި ޕްރިމިއާ ލީގް މެން ސިޓީއަށް އޭނާ ބަދަލުވުމުގެ އަސްލު ސަބަބަކީވެސް، ގާޑިއޯލާއާއެކު މަސައްކަތް ކުރަން ބޭނުންވާތީ ކަމަށެވެ.
"ގާޑިއޯލާ އަހަންނަށް ވިސްނައިދިނީ އަހަރެން ސިޓީއަށް އައިސްފިނަމަ އިތުރު ކުރިއެރުންތައް ހޯދައިދޭނެ ކަމަށް" އުމުރުން 20 އަހަރުގެ ސޭން ބުންޏެވެ.
ގާޑިއޯލާ ބުނީ ސޭން އަކީ އެހެން ކުޅުންތެރިންނަށް ގޯލް ޖަހަން ފުރުސަތު ތަނަވަސްކޮށްދޭ ހަލުވި ކުޅުންތެރިޔެއް އެއް ކަމަށާއި އަދި ހަމަލާ އުފެއްދުމުގެ ހުނަރުވެސް ހުރި ކުޅުންތެރިޔެއް ކަމަށެވެ.
"އުމުރުން 20 އަހަރުގައި އޭނާ ހަމަ އަދިވެސް އިތުރު ކުރިއެރުން ހޯދާނީ. އެ އުމުރުގައި އޭނާއަކީ ޖަރުމަންގެ ގައުމީ ތީމުގެ ކުޅުންތެރިޔެއް. އަހަންނަށް ހީވަނީ އޭނާއަކީ މި ތީމަށް މުހިންމު ކުޅުންތެރިޔަކަށް ވަނެ ކަމަށް" ގާޑިއޯލާ ބުންޏެވެ.