ބައިނަލްއަގްވާމީ ކްރިކެޓް ކައުންސިލް (އައިސީސީ) ގެ މެންބަރަކަން ލިބުމުގައި ރާއްޖެއަށް އޮތް އެންމެ ބޮޑު ހުރަހަކީ ރަނގަޅު ފެންވަރުގެ ތިން ދަނޑު ރާއްޖޭގައި ނެތުން ކަމަށް ކްރިކެޓް ބޯޑްގެ ކުރީގެ ރައީސް އަހްމަދު ހަސަަން ދީދީ ވިދާޅުވެއްޖެ އެވެ.
ކްރިކެޓްގެ މިދިޔަ 20 އަހަރުގެ ކާމިޔާބު ފާހަގަ ކުރުމަށާއި ކްރިކެޓް އަހަރީ ހަވިރު ބޭއްވުމަށް ރޭ އެކުވެނި ކްރިކެޓް ދަނޑުގައި ބޭއްވި ކްރިކެޓް ހަވީރުގައި ވާހަކަ ދައްކަމުން އަހްމަދު ވިދާޅުވީ "މިދިޔަ 20 އަހަރު ހާސިލު ނުކުރެވި ހުރި ކަންތައްތަކެއް ވެސް އެބަހުރި. އެ ކަންކަން ހާސިލު ނުކުރެވި ހުރީ ބޮޑެތި ހުރަސްތަކެއް ހުރުމުން" ކަމަށެވެ.
އެސޯސިއޭޓް މެންބަރުކަން ނުލިބި އޮތުމުން، ރާއްޖެއަށް އައިސީސީގެ ބައެއް ފުރުސަތުތަކާއި ބައެއް މުބާރާތްތަކުގައި ވާދަ ކުރުމުގެ ފުރުސަތު ނުލިބެއެވެ.
އަހްމަދު ވިދާޅުވީ ރާއްޖޭގެ ކްރިކެޓް ބައިނަލްއަގްވާމީ ފެންވަރެއްގައި ވާދަ ކުރުމަށް ކުލަބު ކްރިކެޓް ހަރުދަނާ ކުރަންޖެހޭ ކަމަށެވެ.
މީގެ އިތުރުން ކްރިކެޓް ބޯޑުގެ އެކައުންޓްގައި މިދިޔަ މަހުގެ 31 ވަނަ ދުވަހާ ހަމަޔަށް ކްރިކެޓްބޯޑުގެ އެކައުންޓްގައި 9.8 މިލިއަން ރުފިޔާ ހުންނާނެ ކަމަށް އަހްމަދު ވިދާޅުވިއެވެ.
ރާއްޖޭގެ ކްރިކެޓްގެ އަމާޒުތައް ހާސިލު ކުރުމުގައި ބައިނަލްއަގްވާމީ ކްރިކެޓްގެ ހަމަތައް ހިފެހެއްޓުމަށް ކްރިކެޓްބޯޑުގެ އާ އެގްޒެކެޓިވް ކޮމިޓީއަށް އޭނާ އިލްތިމާސް ކުރެއްވިއެވެ.
އަހްމަދު އެންމެ ކްރިކެޓްބޯޑުގައި އެންމެ ފުރަތަމަ މަސައްކަތް ކުރަންވަން ފެއްޓެވީ އެބޯޑްގެ ސެކެޓްރީއެއްގެ ގޮތުގައެވެ.