ސަލްޓަން ޕާކްގައި ހުރި އުސްގެ ކޮޅު، ޗިލްޑްރަންސް ހެރިޓޭޖް ޕްލާޒާ ސެންޓަރެއްގެ އެއްގެ ގޮތުގައި ތަރައްގީކޮށް ހިންގަން ކުޑަކުދިންގެ ހައްގުތަކަށް މަސައްކަތްކުރާ "އާކް" އާ ހަވާލުކޮށް އެއްބަސްވުމުގައި ހައުސިން މިނިސްޓްރީން ސޮއިކޮށްފި އެވެ.
އުސްގެކޮޅަކީ ސަލްޓަންޕާކުގެ ހުޅަނގު ކޮޅުގައި ހުންނަ 100 އަހަރަށްވުރެ ގިނަ ދުވަސްވީ ތާރީހީ އިމާރާތެކެވެ. އެތަން ކުޑަކުދިންގެ ސަގާފީ ސެންޓަރަކަށް ބަދަލުކުރަން ނިންމާފައިވަނީ ސަރުކާރުން މިހާރު ފަށާފައިވާ ސަލްޓަންޕާކް ތަރައްގީކުރުމުގެ މަޝްރޫއުގެ ދަށުންނެވެ. ސަލްޓަންޕާކް ތަރައްގީކުރަނީ 15 އަހަރުން ދަށުގެ ކުޑަކުދިންނަށް ހާއްސަ އާއިލީ ޕާކެއްގެ ގޮތުގަ އެވެ.
މިއަދު ހައުސިން މިނިސްޓްރީގައި ބޭއްވި ރަސްމިއްޔާތެއްގައި ޗިލްޑްރަންސް ހެރިޓޭޖް ޕްލާޒާ ތަރައްގީކުރުމުގެ އެއްބަސްވުމުގައި ހައުސިން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މުހައްމަދު މުއިޒް އެވެ. އާކްގެ ފަރާތުން އެކްޓިން އެގްޒެކެޓިވް ޑިރެކްޓަރު ޒީނާ ޒާހިދެވެ.
މީގެ ދުވަސްކޮޅެއް ކުރިން ހައުސިން މިނިސްޓްރީން ޓެންޑާކުރި އެ މަޝްރޫއުގެ ކޮންޓްރެކްޓަރަކަށް އާކް ހަމަޖެއްސެވުމާ ގުޅޭ ގޮތުން މިނިސްޓަރު މުއިޒް ވިދާޅުވީ، އުސްގެކޮޅުގައި ކުޑަކުދިންގެ ސަގާފީ މަރުކަޒެއް ގާއިމްކުރުމުގެ މަސައްކަތް އާކްއިން ފަރުމާކޮށްފައިވަނީ ވަރަށް ފުރިހަމައަށް ކަމަށް ގަބޫލުފުޅު ކުރައްވާ ކަމަށެވެ. އެ މަސައްކަތުގެ ސަބަބުން މިހާތަނަށް ވީރާނާވާން ދޫކޮށްލާފައިވާ ތާރީހީ މުހިއްމު ބިނާއެއް ބޭނުންތެރި ތަނެއްގެ ގޮތުގައި ދެމެހެއްޓިގެންދާނެތީ އެކަމާ އުފާކުރައްވާ ކަމަށެވެ.
މިއަހަރުގެ ނިޔަލަށް ނިންމުމަށް އަމާޒު ހިފާފައިވާ އުސްގެކޮޅު ޗިލްޑްރަންސް ހެރިޓޭޖް ޕްލާޒާ އަކީ ސަލްޓަންޕާކް ތަރައްގީގެ މަޝްރޫއުގެ މުޅި އެއް ބައެވެ.
"މިގޮތަށް ހުންނަ ތަންތަނަކީ ރާއްޖޭގެ ތަރިކަ ކަމަށް ވާތީ އެތަންތަނުގެ ބޭނުން ހިފައިގެން ރާއްޖޭގެ ތާރީހު އެހެންމީހުންނަށް ދަސްކޮށްދީ އަންގައިދެވޭ ފަދަ ގޮތަކަށް ތަންތަން ބޭނުންކުރުމަކީ ވަރަށް މުހިއްމު ކަމެއް. ހަމަ އެއާ އެކު، އިޖުތިމާއީ ގޮތުން ދުޅަހެޔޮކަން ގެނައުމަކީ ސުލްހައާއި އުފާވެރިކަން ގެނައުމަށް މުހިއްމު ކަމެއް. އުސްގެކޮޅު މިހާތަނަށް ހުރީ ވީރާނާވާން ދޫކޮށްލެވިފައި، މި މަސައްކަތުގެ ސަބަބުން އިމާރާތަށް ބަދަލެއް ނާންނާނެ، އިމާރާތް އޭގެ ގޮތުގައި ބޭނުންތެރި އަދި ހިމާޔަތް ލިބިފައިވާ ތަނަކަށް ބަދަލުވެގެންދާނެ،" މުއިޒް ވިދާޅުވި އެވެ.
އާކްއިން ބުނީ، ކުޑަކުދިންނަށް ސަގާފަތާ ބެހޭ ކަންކަން ދަސްކޮށްދިނުމަކީ މިހާތަނަށް ނުކުރެވި އޮތް ވަރަށް މުހިއްމު މަސައްކަތެއް ކަމަށެވެ. އުސްގެކޮޅު ޗިލްޑްރަންސް ހެރިޓޭޖް ޕްލާޒާ ތަރައްގީކޮށް، އެތަނުގައި ހިންގާ ހަރަކާތްތައް ހިންގުމުގައި އާކްއާ އެކު އެ ތާރީހީ އަދި ސަގާފީ ދާއިރާގެ ތަހުރިބާކާރުން މަސައްކަތް ކުރާނެ ކަމަށާއި، އެހެންކަމުން އެތަނުގައި ހިންގާ ހަރަކާތްތަކާއި މައުރަޒުތަކާއި އެހެނިހެން ކަންކަން މެދުނުކެނޑި ބާއްވާ މަގުބޫލުތަނަކަށް ތަން ބަދަލުކުރާނެ ކަމަށް ވެސް އެ ޖަމިއްޔާއިން ބުންޏެވެ.
އުސްގެކޮޅު ޗިލްޑްރަންސް ހެރިޓޭޖް ޕްލާޒާ ތަރައްގީކުރަނީ، ކުޑަކުދިންނާ ގުޅޭ ސަގާފީ ކުޅިވަރުތައް ކުޅެވޭނެ ގޮތަށެވެ. އަދި ސަގާފީ އެކި ކަންކަމުގެ މައުލޫމާތު ދިނުމާއި ތަނަށް ޒިޔާރާތްކުރާ މީހުންނަށް ކެއުމަށް ބޭނުންކުރާ ބައެއް އެއްޗިހި ގަނެވޭ ތަންތަންވެސް ހުންނަ ގޮތަށެވެ.
ސެންޓަރު ގާއިމްކުރުމުގެ މަސައްކަތް އާކްއާ ހަވާލުކޮށްފައިވީ ނަމަވެސް އުސްގެކޮޅު މަރާމާތުކުރުމުގެ މަސައްކަތް އެމްޓީސީސީ އާ ހަވާލުކޮށްގެން ސަރުކާރުގެ ހަރަދުގައި މިހާރު ދަނީ ކުރަމުންނެވެ. ދެ ބުރީގެ އެ އިމާރާތުގައި، އާއިލާތައް ވަގުތު ހޭދަކޮށްލަން އިށީނދެވޭފަދަ ފެންޑާއެއްގެ އިތުރުން، ރާއްޖޭގައި އުފައްދާ ސަގާފީ މުދާ ވިއްކާ ކަލްޗަރަލް ބާޒާރަކާއި، ކުޑަކުދިންނަށް ސަގާފީކުޅިވަރުތަކާއި ވާހަކަތައް ކުޅެވޭ ފަދަ ހޯލެއްގެ އިތުރުން ރާއްޖޭގެ ސަގާފީ ކަންކަން ރަމްޒުވާގޮތަށް އަމިއްލަ ފަރާތަކުން ހިންގާ ފިހާރައެއްގެ އިތުރުން ތަނަށް އަންނަ މީހުންނަށް ދިވެހި ސަގާފީ ކަންކަމާ ބެހޭ މައުލޫމާތު ދޭ އާޓް ވޯކްޝޮޕް ހިންގާ ބައެއް ވެސް ހިމެނެ އެވެ.
އުސްގެކޮޅުގައި ކުރިއަށްގެންދާ ހަރަކާތްތަކުގައި ބައިވެރިވެވޭނީ އެތަނުން ވިއްކާ ހާއްސަ ޓިކެޓެއްގައެވެ. އެގޮތުން އެތެރޭގެ ހަރަކާތްތަކުގެ އިތުރަށް ގުޑި އެރުވުން ފަދަ ކަންކަން ވެސް އެ ސެންޓަރުން ކުރިއަށްގެންދާނެ އެވެ. ހަރަކާތްތަކުގައި ބައިވެރި ނުވިޔަސް އާންމުންނަށް ސަރަހައްދު ބަލާލަން ދެވޭނެ އެވެ.