އދ. މާމިގިއްޔަށް އުފަން ހުސައިން ވަލީދު 31، އަކީ އިރެއްގައި ގަދަފަދަ ހަށިގަނޑެއްގެ ވެރިއެކެވެ. ޒުވާން ޖޯޝުގައި ބުރަކޮށް މަސައްކަތްކުރި މަޖާ، ހަރަކާތްތެރި ޒުވާނެކެވެ. ހަގު އުމުރުގައި ކުރި ކައިވެންޏަށް ލިބުނު ދެ އަންހެން ދަރިންނާއެކު އުފާވެރި އާއިލާއެއް ބިނާ ކުރަމުން ދިޔަ ހިއްވަރު ހުރި ޒުވާނެކެވެ. ނަމަވެސް ހުސައިންގެ މުޅި ދިރިއުޅުން މިއަދު ވަނީ ގާތްގަނޑަކަށް ހުއްޓިފަ އެވެ. ވޭތުވެދިޔަ ހައެއްކަ އަހަރު ތެރޭގައި އޭނާ ތަހައްމަލުކުރަމުން އެދަނީ ކަރުނައާއެކު ހިތްދަތި އެކަނިވެރި ދިރިއުޅުމެކެވެ. މީގެ ހަ އަހަރު ކުރިން، އުމުރުން 26 އަހަރުގައި ފޭލުވި ދެ ކިޑްނީއާއެކު ހުސައިންގެ އުފާވެރި ދުނިޔެ ވެސް ބަދަލުވީ އެވެ.
އޭރު އޭނާއަކީ ކޮންނަ ބޯޓެއްގެ އިންޖީން އޮޕަރޭޓަރެކެވެ. ރިސޯޓެއްގައި ވެސް މަސައްކަތްކުރި އެވެ. މާބޮޑަށް ވަރުބަލިވެ ހާސްވާތީ ޑޮކްޓަރަށް ދައްކާލައި ޓެސްޓުތަކެއް ހެދުމުން ޑޮކްޓަރުން ދިނީ ބޮޑު ޖަވާބެކެވެ. އެއީ 58 ޕަސެންޓްގެ މަސައްކަތް އޭރުވެސް ހުއްޓިފައިވާ އޭނާގެ ދެކިޑްނީ މާ އަވަސް ސްޕީޑެއްގައި ފެއިލްވަމުންދާ ކަމުގެ ބިރުވެރި ހަބަރެވެ. އެއާއެކު މާލެއަށް އައިސް އައިޖީއެމްއެޗުން ފަރުވާ ހޯދަން ފެށި އެވެ. މާގިނަ ދުވަހެއް ނުވެ ހަމަ އެ އަހަރު ދެ ކިޑްނީ މުޅިން ފޭލުވެ، މީހާގެ ސިއްހަތު ދަށަށްދާން ފެށި އެވެ.
ކިޑްނީ ފެއިލްވަމުންދާކަމުގެ ހަބަރު އެންމެ ފުރަތަމަ ލިބުމުން އެއީ ކިހާ ވަރެއްގެ ކަމެއް ކަން އަންދާޒާކުރަން ބޭނުން ނުވެފައި ހުރި ހުސޭނަށް، މިއަދު އޭނާގެ ބަލި ހާލަތު ވެފައިވަނީ ހިތްދަތި ވޭނަކަށެވެ. ދެ ކިޑްނީ ފެއިލްވެ، ހަފްތާއަކު ތިން ދުވަހު ހަދަންޖެހޭ ޑައިލެސިސްއާއެކު ވަރު ދެރަވެ ބަލިއެނދުގައި އޮންނަން ޖެހުމުން ވަޒީފާ ހުއްޓާލަންޖެހުނެވެ.
ފަރުވާ ހޯދަން މާލޭގައި މަޑުކުރަންޖެހުމުން އަނބި ދަރިންނާ ވަކިވިއެވެ. ދުވަސްވީވީހެން، ދަރިންނަށް ކުރަންޖެހުނު ހަރަދުތައް އިތުރުވަމުން ދިޔަ ނަމަވެސް އެ ހަރަދުތައް ކުރެވޭނެ ގޮތެއް އޭނާގެ އަތުގައި ނެތުމުގެ ސަބަބުން ކުދިންނާއި އަންހެނުންގެ އުފަލަށްޓަކައި އާއިލާ ރޫޅާލަން އޭނާއަށް ޖެހުނެވެ.
"އެންމެ ފުރަތަމަ ކިޑްނީ ފޭލްވީއޭ ބުނީމަ މާ ބޮޑު އެއްޗެއް ހިތަކަށް ނާރާ. އެކަމަކު މިހާރު ވިސްނާލީމަ ހިތަށް އަރާ ދިރިއުޅުން ހާދަ ހިތްދައްޗޭ. މިހެން މިގޮތުގައި އޮންނަން ޖެހޭތީ ވަޒީފާއަކަށް ނުދެވޭ. ދަރިންނާއި އަންހެނުންނަށް ހަރަދު ނުކުރެވޭތީ އެމީހުންނަށް އެހެން ދިރިއުޅުމެއް ހޯދައިދޭން އާއިލާ ރޫޅާލުމުގެ ނިންމުން ވެސް އަޅުގަނޑު ނިންމިން، އަންހެނުންނާ ވަކިވީ ނަމަވެސް އާއިލާ ތެރޭ ގުޅުން ވަރަށް ރަނގަޅު" ހުސެން ބަލި އެނދުގައި ހޭދަކުރި ދިގު ހަ އަހަރުގެ ތަޖުރިބާ އަވަސްއާ ހިއްސާކުރި އެވެ. "ކިޑްނީ ފޭލުވީ ވަކި މިވެނި ސަބަބަކުންނޭ ބުނާކަށް ނޭނގޭ. ވަރަށް ގަދަކޮށް، މަސައްކަތްވެސް ކުރަމުން ދަނިކޮށް ހެދި ޓެސްޓަކުން އެކަން އެނގުނީ،"
ކިޑްނީ ފެއިލްވީކަން އެނގުމުން ދެތިން ފަހަރުމަތިން އިންޑިއާއަށް ގޮސް އެކި ޑޮކްޓަރުންނާ އާއިލާއިން މަޝްވަރާކުރި އެވެ. ހުރިހާ ޑޮކްޓަރުންވެސް ދޭ ހަމަ އެކަނި އުންމީދީ ޖަވާބަކީ ކިޑްނީއެއް ޓްރާންސްޕްލާންޓް ކުރުމެވެ. ހާސްވެ ކަންބޮޑުވެފައި އޮތް އާއިލާއާ ހަމަޔަށް ތީރެއްހެން އައި އެ ހަބަރާއެކު، ލަހެއް ނެތި ހުސެންއަށް އޭނާގެ އެއްބަނޑު އެއްބަފާ ފިރިހެން ކޮއްކޮއެއްގެ ކިޑްނީ ލިބުނެވެ. އާސަންދައިން ލިބުނު އެހީއާ، ކޮއްކޮގެ ފަރާތުން ލިބުނު އަގު ނުކުރެވޭ ހަދިޔާއާ އެކު ތިން ވަނަ ފަހަރަށް އިންޑިއާ އަށް ހުސެންގެ އާއިލާއިން ދިޔައީ ފޮނި އުންމީދާއެކު އެވެ. ނަމަވެސް އޮޕްރޭޝަން ކުރުމަށް ތައްޔާރުވުމުގެ ގޮތުން ހެދި ޓެސްޓުތަކުން ކޮއްކޮއަކީ ހަކުރުބަލީގެ މީހެއްކަން ސާބިތުވެ ކޮށްކޮއަށް ކިޑްނީ ދެވޭގޮތް ނުވި އެވެ.
"އެންމެ ފުރަތަމައިނުން ވެސް ޓްރާންސްޕްލާންޓް ހަދަންޖެހޭ ވާހަކަ ބުނުމުން ކިޑްނީއެއް ދޭން ކޮއްކޮއަކު އެއްބަސްވި. ނަމަވެސް އެކޮޅުން ޓެސްޓް ހެދި އިރު ކޮއްކޮގެ ހަށިގަނޑުގައި ހަކުރު ހުރިކަމަށް ދެއްކީ. އެއީ 2014 ވަނަ އަހަރު. ނަސީބު ދެރަކަމުން ކަމަށް ވެސް ވެދާނެ. އޭރު އެކަމެއް ނުވި،" ހުސައިން ބުންޏެވެ.
2014 ވަނަ އަހަރު ކުރިމަތިލާންޖެހުނު މާޔޫސްކަމަށް ފަހު ހުސައިންގެ އާއިލާ އަނެއްކާވެސް އެތިބީ އުންމީދުގެ އާ ހުޅުކޮޅެއް ދިއްލައިގެނެވެ. ހުސެންގެ އިތުރު ކޮއްކޮއަކު އޭނާއަށް ކިޑްނީއެއް ދޭން ނިންމީއެވެ. އެހެންކަމުން ކުރިއަށް ދެން އޮތީ ހުސެންގެ ބޮޑު އޮޕަރޭޝަނެވެ.
ނަމަވެސް އެއީ ބޮޑު ހަރަދެއް ދާނެ ކަމެކެވެ. އާސަންދައިން އޮޕަރޭޝަނާއި އެހެނިހެން ބޭހާއި ފަރުވާ ލިބެން ހުރި ނަމަވެސް މެދު ނުކެނޑި މިހާތަނަށް ކުރަމުން ދިޔަ ފަރުވާ އާއި ހޭދައާ އެކު ހުސައިންގެ އާއިލާ ވަނީ މާލީގޮތުން ބަލިކަށިވެފަ އެވެ. އޮޕަރޭޝަން ކޮށްގެން ވަކި މުއްދަތެއް ވާންދެން އެހެނިހެން ޓެސްޓާ ފަރުވާއަށް އިންޑިއާގައި ގިނަ ދުވަހު މަޑުކުރަންޖެހޭއިރު، އެކަމަށް ގިނަ ފައިސާ އަދިވެސް އެ އާއިލާއަށް ބޭނުންވެ އެވެ. އޮޕަރޭޝަން ކުރެވެން އަންނަނީ ހުރުމާއި ކެއުމާ އަންނައުނަށް ހަރަދުކުރާނެ ކޮންމެވެސް ވަރެއްގެ ލާރިއެއް ލިބިގެންކަމަށް ވާއިރު، އެ ފައިސާ ހޯދުމަށް ހުސައިން ވަނީ ހެޔޮ އެދޭ ފަރާތްތަކުގެ ދީލަތި އެހީތެރި ކަމަށް އެދިފަ އެވެ.
އާއިލީ މީހެއް ކައިރީ ހުޅުމާލޭގައި އެކަނިމާ އެކަނި ދިރިއުޅެމުންދާ ހުސައިން އެދެނީ އޭނާގެ ބައްޔަށް އަވަސް ޝިފާއެކެވެ. ވޭނަށް އަވަސް ލުޔެކެވެ. ނަމަވެސް މާލީ ތަނަވަސްކަމެއް ނެތުމުން މިއަދު އޭނާއަށް އެވަނީ ހައްލު ކުރިމަތީގައި އޮވެމެ، އެއާ ކައިރިއަށް ދިއުމަށް ނުކުޅެދިފަ އެވެ. ހުސެއިން އެހީއަށް އެދި ކުރާ އާދޭހާއެކު ވަނީ އަލުން އާ ދިރިއުޅުމަކަށް ޒުވާން ބައްޕައަކު ކުރަމުންދާ ފޮނި އުންމީދުތަކެކެވެ.
ހުސެއިން ވަލީދަށް ގުޅޭނެ ނަންބަރު:9840501