މި އަހަރުގެ ނޮވެމްބަރު މަހު ފެށޭ އޯ ލެވެލް އިމްތިހާނަށް ގްރޭޑް ދިހައެއްގެ ދަރިވަރުން ތަމްރީން ކުރަން ސްކޫލްތައް ވީޑިއޯ ކޮންފަރެންސުން ގުޅާލައިގެން އިތުރުގަޑީގެ ކްލާސްތަކެއް ނަގަން ފަށައިފި އެވެ.
އެޑިޔުކޭޝަން މިނިސްޓްރީ އާއި ސްކޫލްތައް ގުޅިގެން ކުރިއަށްގެންދާ މި ކްލާސްތަކަކީ ދަރިވަރުން އޯލެވެލް އިމްތިހާނަށް ތައްޔާރުކުރުވައި، އެހެން އަހަރުތަކަށް ވުރެ މިއަހަރުގެ އޯލެވެލް އިމްތިހާނުގެ ނަތީޖާ ރަނގަޅު ކުރުމުގެ ގޮތުންނާއި، އިތުރު އެހީ ބޭނުންވާ ސްކޫލްތަކަށް އެހީ ފޯރުކޮށްދިނުމުގެ ގޮތުން ކުރިއަށްގެންދާ ކްލާސްތަކެކެވެ.
އެޑިޔުކޭޝަން މިނިސްޓްރީ އާއި އަތޮޅުތަކުގެ ގާއިމްކުރެވިފައިވާ ވީޑިއޯ ކޮންފަރެންސިންގެ ނިޒާމް ގުޅުވާލައިގެން މިދިޔަ މަހުގެ 24 ގައި ފެށި އެ ކްލާސްތައް އަންނަ ސެޕްޓެމްބަރު މަހުގެ 15 އިގެ ނިޔަލަށް ކުރިއަށްގެންދާނެ އެވެ.
އެޑިއުކޭޝަން މިނިސްޓްރީން ބުނީ، ވީޑިއޯ ކޮންފަރެންސް މެދުވެރިކޮށް ނަގާ އެންރިޗްމަންޓް ކްލާސްތަކުގައި ކިޔަވައިދޭނީ ކޮންމެ މާއްދާއަކުން ވެސް އެންމެ ގާބިލް ޓީޗަރުން ކަމަށެވެ. މިދިޔަ މަހު ފެށި އެ ކްލާސްތަކުގައި މިހާތަނަށް ބ. އަތޮޅުގެ ހުރިހާ ސްކޫލެއްހެން ވަނީ ބައިވެރިވެފަ އެވެ.
އެޑިޔުކޭޝަން މިނިސްޓްރީ އާއި ބ. ޓީއާރްސީ ގުޅުވާލައިގެން ކުރިއަށްގެންދިޔަ އެކައުންޓިން މާއްދާގެ ކްލާހުގައި ކިހާދޫ ސްކޫލާ، މާޅޮހު ސްކޫލާ، ކެންދޫ ސްކޫލާ، ދޮންފަނު ސްކޫލާ، ބ. އަތޮޅު ސްކޫލް އަދި ގޮއިދޫ ސްކޫލުގެ ގްރޭޑް 10 ގައި ތައުލީމް ހާސިލްކުރަމުން އަންނަ ދަރިވަރުން ވަނީ ބައިވެރިވެފަ އެވެ. މި ސްކޫލްތަކަށް ޖުލައި 25 ވަނަ ދުވަހާއި ޖުލައި 31 ވަނަ ދުވަހުގެ އެކައުންޓިންގެ އިތުރު ކްލާހެއް ނަގައިދީފައިވާ އިރު، މި ކްލާސްތަކަށް ޖުމްލަ 41 ދަރިވަރުން ދިޔަ އެވެ.
ވީޑިއޯ ކޮންފަރެންސް މެދުވެރިކޮށް ގިނަ ސްކޫލްތަކެއް ގުޅިގެން އޯލެވެލަށް ކުދިން ތައްޔާރުކުރުމުގެ މަސައްކަތް ފަށާފައިވާއިރު، އައްޑޫ އަތޮޅުގެ އިތުރުން ނ. ގއ. އަދި ގދ. އަތޮޅުގެ ސްކޫލްތަކުގައި ވެސް އެ ކްލާސްތައް ވަރަށް އަވަހަށް ފަށާނެ ކަމަށް މިނިސްޓްރީން ވަނީ ބުނެފަ އެވެ.