މީގެ ގާތްގަނޑަކަށް 55 އަހަރު ކުރިން ގދ. ތިނަދޫއަކީ މުޅި ހުވަދު އަތޮޅުގެ މައި މަރުކަޒެވެ. ތަރައްގީއާ ޒަމާނީ ކުލަ ޖެހެމުން އައި، އާބާދީ ބޮޑު ރަށެވެ. ތިނަދޫގެ ކަޅު ސޮފުހާތަކުގެ ގޮތުގައި ލިޔެވިފައިވާ މަޝްހޫރު "ހުވަދޫ ބަޣާވާތް" ނުވަތަ "ދެކުނުގެ ބަޣާވާތް" ފެންމަތިވި އިރު އެރަށް ވަނީ ތަރައްގީއާ ދިމާލަށް ބާރަށް މިސްރާބު ޖަހާފަ އެވެ.
މީލާދީން 4 އޭޕްރިލް 1961 ވެގެންދިޔައީ މުޅި ތިނަދޫގެ ތާރީހު ބަދަލުކޮށްލި ދުވަހަކަށެވެ. ދެކުނުގެ ތިން އަތޮޅު ގުޅިގެން ހިންގި ވަކިވެ ގަތުމަށް އުފެދު ހަރަކާތް ނައްތާލުމަށް އޭރުގެ ރައީސް އިބްރާހިމް ނާސިރުގެ ވެރިކަމުގައި ހިންގެވި ހަރަކާތްތަކުގައި އަމާޒުވި ބަޑީގެ ހަމަލާތަކުން މުޅި ތިނަދޫ ހަސްފަސްވެގެން ދިޔަ އެވެ. އެ ހަމަލާތައް ދީ ނިމުނު އިރު ތިނަދޫ އޮތީ ފަޅުވެފަ އެވެ. އެތަކެއް ޒަމާންތަކެއް ވަންދެން އެރަށު މީހުން ކުރި މަސައްކަތާއި ހޯދި ތަރައްގީ ވެއްޔާއި މޮޑެވި އުންމީދުތައް އޮތީ ފަޅު ރަށެއްގައި މަގުމަތިވެފަ އެވެ.
މި ކަންތައްގަނޑަށް ފަހު، ތިނަދޫ އަލުން އާބާދު ވާން ފެށީ 22 އޮގަސްޓް 1966 ވަނަ އަހަރު އެވެ. ރަށު މީހުން އެ ދުވަސް ފާހަގަ ކުރަނީ އެ މީހުންނަށް މިނިވަންކަމެއްގެ ގޮތުގަ އެވެ. އޭގެ ފަހުންވެސް ރަށާ ދިމާލަށް ދަތުރުކުރި އެކި ސިޔާސީ ރޯޅިތަކުގައި އެރަށަށް ގިނަ ގެއްލުންތަކެއް ލިބުނެވެ.
ނަމަވެސް ތިނަދޫގެ ރައްޔިތުން މިއަދު ތިބީ، މާޒީގައި ވީ ގެއްލުންތައް ހަނދާނުން ފޮހެލައި، އާ މިނިވަންކަމެއްގެ އުފާ ފާޅުކުރުމުގެ ރޫހެއްގަ އެވެ. އެ އުފާ ތިނަދޫގެ ރައްޔިތުންނަށް އެންމެ ފުރިހަމަޔަށް ހޯދައިދޭނެކަމުގެ ފުރިހަމަ ޔަގީންކަން އެކި ފަހަރު މަތިން ސަރުކާރުން ވެސް ވަނީ ދީފަ އެވެ.
ތިނަދޫ އަލުން އާބާދުވީތާ 50 އަހަރު މިމަހުގެ 22 ވަނަ ދުވަހު ފުރޭއިރު، އެ ދުވަސް ގައުމީ ފެންވަރުގައި ފާހަގަކުރުމުގެ ވާހަކަތަކެއް މިވަނީ އަނެއްކާވެސް ދެކެވެން ފަށާފަ އެވެ. ނަމަވެސް ދުވަސް ކައިރިވަމުންދާ ވަރަކަށް އެކަމަށް އޮތް އުންމީދު ފަނޑުވަމުންދާ ކަމަށް ތިނަދޫ ކައުންސިލުން ބުންޏެވެ.
ތިނަދޫ ކައުންސިލް މެންބަރު ސައުދު އަލީ ވިދާޅުވީ، 22 ވަނަ ދުވަސް ގައުމީ ފެންވަރުގައި ފާހަގަކޮށްދޭނެ ކަމުގެ ޔަގީންކަން ހޯމް މިނިސްޓްރީން ދީފައިވީ ނަމަވެސް މިހާތަނަށް، އެކަމާ ގުޅޭ އެއްވެސް މަސައްކަތެއް ފެށިފައި ނުވާތީ މުނާސަބަތާ ގުޅޭ ހަރަކާތްތައް ލަސްވުން އެކަށީގެންވާ ކަމަށެވެ. ރަން ޔޫބީލް ފާހަގަކުރަން ކައުންސިލުން ނިންމާފައިވަނިކޮށް، އެކަން މާ ފުރިހަމަކޮށް ކޮށްދޭނެ ކަމަށް ހޯމް މިނިސްޓްރީން ބުނެފައިވާތީ ރައްޔިތުން ތިބީ އުފާވެރި އިންތިޒާރެއްގައި ކަމަށް ސައުދު ވިދާޅުވި އެވެ.
".. މިހާތަނަށް އައި އިރު އަޅުގަނޑުމެންނަކަށް ވެސް ނޭނގެ އެ ދުވަހާ ގުޅޭ ގޮތުން ވަކި ކަންތައްތަކެއް ހަމަޖެހިފައި އޮތް ކަމެއް. މިހާރު މި އޮތީ ގާތްގަނޑަކަށް ދުވަސް ވެސް ޖެހިފައި. އެހެން ނަމަވެސް އެ ދުވަހަށް ނިންމަން ގަސްދުކޮށްގެން ކުރަން ސަރުކާރުން ފެށި ބައެއް އުމްރާނީ މަސައްކަތް އެބަ ދޭ ކުރިއަށް. މަގުތަކުގައި ތާރަ އެޅުމާއި، މިއުޒިއަމް ޕާކް ތަރައްގީކުރުމާއި، ރަށުގެ ރަސްމީ ފާލަން ބިނާކުރުމުގެ މަސައްކަތް ވެސް މިހާރު ވަނީ ފެށިފައި،" ސައުދު ވިދާޅުވި އެވެ.
އޭނާ ވިދާޅުވީ، ތިނަދޫގެ އަށް ކިލޯމީޓަރަށްވުރެ ބޮޑު ސަރަހައްދެއްގައި ތާރު އެޅުމަށް ސަރުކާރުން ބޮޑު މަޝްރޫއެއް ފަށާފައިވާއިރު، އެ މަސައްކަތުގެ 70 ޕަސެންޓް މިހާރު ނިމިފައިވާ ކަމަށެވެ. އަދި މިއުޒިއަމް ޕާކުގެ ކޮންކްރީޓް މަސައްކަތް މެދަކާ ހަމައަށް ގޮސްފައިވާއިރު، ރަސްމީ ފާލަން އަޅަން ބޭނުންކުރާ ސާމާނު ބޭރުން ގެންނަން އޯޑަރު ދީފައިވާ ކަމަށެވެ. ނަމަވެސް އެއިން އެއްވެސް މަސައްކަތެއް މިމަހުގެ 22 އަށް ނިމޭނެ ކަމުގެ ޔަގީންކަމެއް ނެތް ކަމަށެވެ.
ތިނަދޫ ގައި އަލަށް މީހުން އާބާދުވި ރަން ފަންސާސް އެ ދުވަހަށް ފާހަގަކުރެވޭނެ ކަމާމެދު ކައުންސިލުން އުންމީދު ކަނޑާލާފައިވާއިރު، މީގެ ކުރިން ހަމަޖެހިފައި އޮތީ، އެ ދުވަހު އެރަށުގައި ބާއްވާ ރަސްމިއްޔާތުގައި ރައީސް ވެސް ބައިވެރިވެވަޑައިގަންނަވާ ގޮތަށެވެ.