ސުލްހަ މަސަލަސްކަން ނަގާލައި ރައްޔިތުންގެ ރައްކާތެރި ކަމަށް ހުރަސް އެޅޭފަދަ ކަންކަން ވަގުތުން ހުއްޓުވަން އެޅެންހުރި ކޮންމެ ފިޔަވަޅެއް އަޅައި ރައްކާތެރި އަމާން މާހައުލެއް ގާއިމް ކުރާނެ ކަމަށް ހޯމް މިނިސްޓަރު އަޒްލީން އަހުމަދު ވިދާޅުވެއްޖެ އެވެ.
އާ ހޯމް މިނިސްޓަރު މިއަދު ހަވީރު ބަޔާނެއް މެދުވެރިކޮށް ވިދާޅުވީ ސަރުކާރުން އެންމެ އިސްކަން ދެނީ ރާއްޖޭގައި އަމާން ވެއްޓެއް ގާއިމް ކޮށް ސުލްހަ މަސަލަސް ކަމަށް ލޯބި ކުރާ އަބުރުވެރި ބަޔަކު ދިރިއުޅޭ ގައުމަކަށް ރާއްޖެ ހެދުން ކަމަށެވެ.
މިނިސްޓަރު ވިދާޅުވީ ދިވެހި ރައްޔިތުންނާއި ރާއްޖޭގައި އުޅޭ އެންމެންނާއި އެ އެންމެންގެ މުދާ ރައްކާތެރި ކުރެވިފައިވާ ގައުމެއްކަން ކަށަވަރު ކުރުމުގެ ގޮތުން ކުރަންޖެހޭ ކަންކަން ކުރައްވާނެ ކަމަށާއި ކުށްކުރުން މަދު ކުރުމަށާއި އާންމުންގެ ސަލާމަތާއި ރައްކާތެރިކަން ކަށަވަރު ކުރުމާއި މުދަލާއި ފައިސާގެ ރައްކާތެރިކަން ކަށަވަރު ކުރުމަށް ދިވެހި ފުލުހުން މަސައްކަތްތައް ކުރަމުން އަންނަ ކަމަށެވެ. އަދި އެކަމަށް ސަރުކާރުން ފުލުހުންނަށް ދޭންޖެހޭ ކޮންމެ އެއްބާރުލުމެއް ވެސް ދޭނެ ކަމަށެވެ.
"... އާންމުންނަށް ދިމާވާ އުނދަގޫތަކުން އެމީހުން ރައްކާތެރި ކޮށްދީ އަމާންކަމާއެކު ދިރިއުޅެވޭނެ މާހައުލެއް ގާއިމް ކުރުމަށްޓަކައި ރައްޔިތުންނާއެކު ފުލުހުން ކުރަމުން އަންނަ އެންމެހާ މަސައްކަތްތަކުގައި ސަރުކާރުގެ ބައިވެރިވުމާއި އެއްބާރުލުމާއި އެހީތެރިކަން އެންމެ ފުޅާ ދާއިރާގައި ފޯރުކޮށްދޭނެ ވާހަކަ ދަންނަވަމެވެ،" މިނިސްޓަރު އަޒްލީން ނެރުއްވެވި ބަޔާނުގައި ވެއެވެ.
މިނިސްޓަރު މިއަދު ވިދާޅުވީ ރާއްޖޭގެ ގާނޫނު އަސާސީ އާއި ގާނޫނުތަކާއި ގަވައިދު ތަކަށް ފުރިހަމައަށް ބޯ ލަނބާ އަބުރުވެރި ދިރިއުޅުމެއް އުޅޭ ބަޔަކު ކަމުގައިވެ ތިބުމަށް އެދި ވަޑައިގަންނަވާ ކަމަށާއި އެއްވެސްބަޔަކު ގައުމު ހަލަބޮލިކޮށް މީހުންގެ އަބުރާއި ކަރާމާތަށް އަރައިގަނެ ރާއްޖޭގެ އާންމު ސުލްހަ މަސްލަހަތާއި އަމާންކަން ނަގާލައި ބިރުވެރިކަން ނޫފެއްދުމަށް އެދި ވަޑައިގަންނަވާ ކަމަށެވެ.
އަދި ވިދާޅުވީ އެފަދަ ކަންކަމަކީ ގާނޫނު ހުއްދަ ކުރާ ކަންކަން ނޫން ކަމަށާއި އެފަދަ އެއްވެސް ކަމެއް ރާއްޖޭގެ އެއްވެސް ތަނެއްގައި އެއްވެސް ބަޔަކު ކުރުމުގެ ފުރުސަތު ނުދެއްވާނެ ކަމަށެވެ.
"... އަމަން އަމާން ކަމާއި ސުލްހަ މަަސަލަސްކަން ނަގާލައި ރައްޔިތުންގެ ރައްކާތެރި ކަމަށް ހުރަސް އެޅޭފަދަ އެއްވެސް ކަމެއް އެއްވެސް ތަނެއްގައި އެއްވެސް ބަޔަކު ކުރާނަމަ އެފަދަ ކަންކަން ގާނޫނުތަކާއި ގަވައިދުތަކާ އެއްގޮތަށް ވަގުތުން ހުއްޓުވުމަށްޓަކައި އަޅަންޖެހުނު ކޮންމެ ފިޔަަޅެއް އަޅާނެ ކަމުގެ ޔަގީން ކަން އަރުވަމެވެ،"
މިނިސްޓަރު މިފަދަ ބަޔާނެއް މިއަދު ނެރުއްވެވި އިރު މި ހަފުތާގައި ރައްޔިތުންގެ މަޖިލީހުން ފާސްކުރި އަބުރު ރައްކާތެރި ކުރުމުގެ ބިލް ރައީސް އަބްދުﷲ ޔާމީން މިއަދު ވަނީ ތަސްދީގު ކުރައްވާފަ އެވެ. އަދި އެ ގާނޫނަށް މިއަދުން ފެށިގެން ވަނީ އަމަލު ކުރަން ފަށާފަ އެވެ.