- އެންމެ ޒަމާނީ ސިއްހީ ފަރުވާ
- ޓްރީޓޮޕް ހުޅުވުން އަންނަ އަހަރު ކުރީކޮޅު
- ހޮސްޕިޓަލުގައި 200 އެނދު
ހުޅުމާލޭގައި ހުޅަން ތައްޔާރުވަމުންދާ ޓްރީޓޮޕް ހޮސްޕިޓަލް (ޓީޓީއެޗް) އިން ދިވެހިންނަށް 600 އަށްވުރެ ވަޒީފާގެ ފުރުސަތު ހުޅުވާލައިފި އެވެ.
އަންނަ އަހަރުގެ ދެވަނަ ކްއާޓަރުގައި ހުޅުވަން ތައްޔާރުވަމުން އަންނަ ޓްރީޓޮޕް ހޮސްޕިޓަލުގައި ހުންނަވައިގެން "އަވަސް" އަށް މިއަދު ދެއްވި އިންޓަވިއުއެއްގައި ޓްރީޓޮޕް ހޮސްޕިޓަލްގެ ހެޑް އޮފް ހިއުމަން ރިސޯސަސް ރޫޕާ ރިކްރާޖް ވިދާޅުވީ އެ ކުންފުނިން 600 ވަޒީފާގެ ފުރުސަތު ހުޅުވިގެންދާއިރު ކުންފުނިން ބޭނުންވަނީ އެ ވަޒީފާތަކަށް ދިވެހި ޒުވާނުން ނަގަން ކަމަށެވެ.
"އަޅުގަނޑުމެން ބޭނުންވަނީ ދިވެހި ޒުވާނުންނަށް މި ހޮސްޕިޓަލުން ވަޒީފާ ދޭން. މި ވަޒީފާތަކުގެ ތެރޭގައި މެޑިކަލް ކޮންސަލްޓެންޓުންނާއި މި ނޫން ވެސް ވަޒީފާތައް ހިމެނޭ،" ރޫޕާ ވިދާޅުވި އެވެ.
ގާތްގަނޑަކަށް 90 މިލިއަން ޑޮލަރުގެ އިންވެސްޓްމަންޓެއްގެ ގޮތުގައި ހުޅުމާލޭގައި ތަރައްގީ ކުރަމުން ގެންދާ މަލްޓި ސުޕެޝަލިޓީ މި ހޮސްޕިޓަލުގައި 200 އެނދު ހުންނާނެ އެވެ. ދެ އިމާރާތައްވާ ގޮތަށް ތަރައްގީކުރާ މި ހޮސްޕިޓަލް އަޅަމުން ދަނީ އެންމެ ޒަމާނީ ހޮސްޕިޓަލަކުން ވެސް ދެވޭނެ ހުރިހާ ސިއްހީ ހިދުމަތްތަކެއް ލިބޭ ގޮތަށެވެ.
ޓްރީޓޮޕް ހޮސްޕިޓަލްގެ ސީއީއޯ އެޑްގާ ޓޮރަލް ވިދާޅުވީ އެ ހޮސްޕިޓަލަށް ޑޮކްޓަރުން ހޯދުމުގެ މަސައްކަތް ކުރަމުންދާއިރު، އެތަނަށް ނަގާނީ އެންމެ މަތީ ފެންވަރުގެ ޑޮކްޓަރުން ކަމަށެވެ.
"ދުނިޔޭގެ އެކި ހިސާބުތަކުން ޑޮކްޓަރުން ހޯދާނެ. ޑޮކްޓަރުންނަކީ އެންމެ މަތީ ފެންވަރު މަތީ ޑޮކްޓަރުންނަށް ވާނެ،" އެޑްގާ ވިދާޅުވި އެވެ.
ޓްރީޓޮޕް ހޮސްޕިޓަލުން ގިނަ އަދަދެއްގެ ވަޒީފާތަކަށް މީހުން ހޯދަން "އަވަސް އިއުލާނު" ގައި ވަނީ އިއުލާނެއް ވެސް ޖަހާފަ އެވެ. މި އިއުލާނުގައިވާ ގޮތުން މެޑިކަލް ކޮންސަލްޓެންޓުންނާއި މިނޫންވެސް ގިނަ ވަޒީފާތަކަށް މީހުން ދަނީ ހޯދަމުންނެވެ.
ސީއީއޯ އެޑްގާ ޓޮރަލް ވިދާޅުވީ ހޮސްޕިޓަލުގެ ސަބަބުން ރާއްޖޭގެ ސިއްހީ ދާއިރާއަށް ބޮޑު އިންގިލާބެއް އަންނާނެ އެވެ.
ޓްރީޓޮޕް ހޮސްޕިޓަލަކީ ޓޫރިޒަމް ދާއިރާގެ އެންމެ ބޮޑު ކުންފުނި ޗަމްޕާ ބްރަދާޒްގެ ހިއްސާ އޮންނަ ހޮސްޕިޓަލެކެވެ. ހުޅުމާލޭގައި 20،000 އަކަމީޓަރުގެ ސަރަހައްދެއްގައި ހަ ފްލޯގެ އިމާރާތެއް ހަދާއިރު އެކޮމޮޑޭޝަން ބްލޮކަކާއި ރެސްޓޯރަންޓް އަދި އެމެޖެންސީ ޕަވަ ސިސްޓަމެއް ވެސް ހުރެ އެވެ.
ކާސާ ހޯލްޑިންސް އާއި ޗަމްޕާ ބްރަދާސް އަދި ކުރެއްދޫ ހޯލްޑިންގްސް ގުޅިގެން އުފައްދާފައިވާ "ޓްރީ ޓޮޕް އިންވެސްޓްމަންޓުން" ހުޅުމާލޭގައި ތަރައްގީކުރާ މި ހޮސްޕިޓަލްގެ ބިންގާ މީގެ އަހަރެއްހާ ދުވަސް ކުރިން އަޅުއްވައިދެއްވީ ރައީސް އަބްދުﷲ ޔާމީނެވެ.