ހިންގުން ހަރުދަނާކޮށް ލީޑަޝިޕް ހުނަރު އިތުރު ކުރަން ރާއްޖޭގެ ސްކޫލްތަކުގެ އިސްވެރިންނަށް ހިންގާ ތަމްރީނު ޕްރޮގްރާމް މެލޭޝިޔާގައި ފަށައިފި އެވެ. މިއީ މި ޕްރޮގްރާމްގެ ފަސްވަނަ ބުރެވެ.
މިއީ މެލޭޝިޔާގެ ޔުނިޓާ އިންޓަނޭޝަނަލް ޔުނިވާސިޓީ އާއި ގުޅިގެން ނުވަ ދުވަހަށް ކުރިއަށްދާ މި ތަމްރީނު ޕްރޮގްރާމެކެވެ. މި ޕްރޮގްރާމްގައި ބައިވެރިވާ ފަރާތްތައް މެލޭޝިޔާއަށް ފުރީ މިދިއަ ބުރާސްފަތި ދުވަހު އެވެ.
މި ފަހަރުގެ ޕްރޮގްރާމްގައި އަތޮޅުތަކާއި މާލޭގެ ސްކޫލްތައް ހިންގުމުގައި ހަރަކާތްތެރިވާ ޕްރިންސިޕަލުންނާއި، ޑެޕިއުޓީ ޕްރިންސިޕަލުންނާއި ލީޑިން ޓީޗަރުން ހިމެނޭ ގޮތަށް 23 ބޭފުޅަކު ބައިވެރިވެ ވަޑައިގަންނަވަ އެވެ.
ތަމްރީނުތަކުގައި ބައިވެރިވެ ވަޑައިގަންނަވާ ބޭފުޅުން ޔުނިޓާ އިންޓަނޭޝަނަލް ޔުނިވާސިޓީ އާއި އިތުރު ފަސް ސްކޫލަކަށް ޒިޔާރަތްކޮށް ހިންގުމުގެ ދާއިރާއާބެހޭ މައުލޫމާތު ހޯދާއިރު ސްކޫލްތަކުގެ ހިންގުން ހަރުދަނާކުރުމާއި ގުޅޭ މަސައްކަތު ބައްދަލުވުންތަކެއްގައި ބައިވެރިވެ ވަޑައިގަންނަވާނެ އެވެ.