މޫދާއި ތިމާވެއްޓާ ގުޅުންހުރި އެކި ޓްރެއިނިންތަކާއި ވޯކްޝޮޕްތަކާއެކު ކުރިއަށްގެންދާ "މިސް ސްކޫބާ އިންޓަނޭޝަނަލް" ގައި ރާއްޖެއިން ބައިވެރިވުމަށް ރާއްޖޭގެ ފުރަތަމަ "މިސް ސްކޫބާ" ހޯދަން ލަގްޒަރީ ކަލެކްޝަން މޯލްޑިވްސް އިން ތައްޔާރުވެއްޖެ އެވެ.
މިސް ސްކޫބާ މޯލްޑިވްސް ރާއްޖޭގައި ބާއްވަން، މިސް ސްކޫބާ އިންޓަނޭޝަނަލް އިން ހުއްދަ ދޫކޮށްފައިވަނީ ލަގްޒަރީ ކަލެކްޝަން ޕްރައިވެޓް ލިމިޓެޑަށެވެ.
ރީތީގެ ރާނީން ހޯދުމަށް ބާއްވާ މުބާރާތާ ދާދި އެއް ކޮންސެޕްޓަކަށް ކުރިއަށްގެންދާ އެ އިވެންޓް ރާއްޖޭގައި ބާއްވަން ލަގްޒަރީ ކަލެކްޝަނުން ހަވާލު ކޮށްފައިވަނީ ރާއްޖޭގެ ކުންފުންޏެއް ކަމަށްވާ ޑެއިޖް ޕްރައިވެޓް މިލިޓެޑާ އެވެ.
ރާއްޖޭގެ މިސް ސްކޫބާ ހޯދުމަށް ބާއްވާ އިވެންޓް މެނޭޖްކުރުމަށް ޑެއިޖް ޕްރައިވެޓް ލިމިޓެޑާ ހަވާލު ކުރުމަށް މިއަދު ބޭއްވި ރަސްމިއްޔާތެއްގައި ލަގްޒަރީ ކަލެކްޝަންގެ ޑިރެކްޓަރު އަބްދުﷲ ޝަފީގް ވިދާޅުވީ، ރާއްޖެއަކީ ވަށައިގެން މޫދު ހިމެނޭ ރީތި ތިމާވެއްޓެއް ލިބިފައިވާ ގައުމަކަށް ވާއިރު، މިސް ސްކޫބާ ފަދަ އިންޓަނޭޝަނަލް ފްރެންޗައިޒް މުބާރާތެއްގައި ރާއްޖޭގެ ޒުވާނަކަށް ގައުމު ތަމްސީލުކުރުމުގެ ފުރުސަތު ލިބިގެންދިއުމަކީ ލިބޭނެ ޝަރަފެއް ކަމަށެވެ.
އަދި އެ މުބާރާތަކީ ރީތީގެ ރާނީން ހޯދުމަށް ބާއްވާ މުބާރާތްތަކާ ހިލާފަށް، ތިމާވެއްޓާއި މޫދާ ގުޅުން ހުރި އެކި ހަރަކާތްތައް ބާއްވައިގެން އެއްވަނަ ހޯދާ މުބާރާތަކަށް ވުމުން، މިފަދަ މުބާރާތެއްގައި އިންޓަނޭޝަނަލް އެވޯޑެއް ރާއްޖެއަށް ލިބުމަށް ވެސް ބޮޑު ފުރުސަތެއް އެބައޮތް ކަމަށް ގަބޫލުކުރާ ކަމަށެވެ.
"މީގަ ވެސް ބިއުޓީ ޕީގަންޓް އޮވޭ. އެކަމަކު މިސް ޔުނިވާސް މުބާރާތް ގޮތަށް ހަމައެކަނި މޮޑެލިން އާއި ރޭމްޕް ވޯކަށް ވުރެ މި މުބާރާތް މާބޮޑަށް ވެސް ފުޅާ ވެގެން އެބަދޭ. ބޮޑަށް މީގަ މި އޮންނަނީ މޫދާއި ތިމާވެށި. އެހެންވީމަ މިއީ ރާއްޖެއަށް ލިބޭ ވަރަށް ބޮޑު ފުރުސަތެއް. މިފަދަ މުބާރާތަކުން މޮޅުވާން ރާއްޖޭގެ ކުދިންނަށް ފަސޭހަވާނެ،" ޝަފީގް ވިދާޅުވި އެވެ.
އެހެންކަމުން މޫދާއި ތިމާވެއްޓަށް ލޯބި ކުރާ އުމުރުން 18 އަހަރާއި 28 އަހަރާ ދެމެދުގެ އަންހެން ކުދިންނަށް މިސް ސްކޫބާ މޯލްޑިވްސްގައި ބައިވެރިވުމުގެ ފުރުސަތު މިހާރު މިވަނީ ހުޅުވާލާފަ އެވެ. މިސް ސްކޫބާ މޯލްޑިވްސް ހޯދާ މެއިން އިވެންޓްތައް ނޮވެމްބަރު މަހުގެ ކުރިން ފަށާނެ އެވެ. މުބާރާތަށް ހޮވޭ ބައިވެރިންނަށް ޑައިވިން ޓްރެއިނިންގެ އިތުރުން މުބާރާތަށް ބޭނުންވާ އެހެނިހެން ޓްރެއިނިންތައް ވެސް ދޭނެ އެވެ.
"ރާއްޖޭގެ މިސް ސްކޫބާ ހޯދާ އިވެންޓް ތަކުގައި ޖަޖް ކުރާނީ ރާއްޖޭގެ ޖަޖް ޕެނަލް އަކުން. އޭގެ ތެރޭގަ ހިމެނޭނެ ކޮރިއޯގްރަފަރުންނާއި ފޮޓޯގްރާފަރުންނާ މިހެން ގޮސް އެކި ދާއިރާތަކުގެ މީހުން. އެ ޕެނަލްގައި ހިމެނޭ މީހުން ވެސް ފައިނަލް ކުރާނީ މިސް ސްކޫބާ އިންޓަނޭޝަނަލް އިން. ބައިވެރިންނަށް ޑައިވް ޓްރެއިނިން އާއި އެނޫން ވެސް ޓްރެއިނިން ދޭނެ،" ޝަފީގް ވިދާޅުވި އެވެ.
ލަގްޒަރީ ކަލެކްޝަނުން ބުނީ، މުބާރާތުގައި ބައިވެރިވުމަށް، ކަނޑައެޅިފައިވާ އުމުރު ހަމަވުމާ އެކު، ފަސް ފޫޓް، ފަސް އިންޗި އަށް ވުރެ ކުރު ނޫން އިސްކޮޅެއް ބައިވެރިންގެ ހުރުން ޝަރުތުތަކުގެ ތެރޭގައި ހިމެނޭ ކަމަށެވެ.
މިއަހަރުގެ މިސް ސްކޫބާ މޯލްޑިވްސް އަށް ހޮވޭ ފަރާތް، މިއަހަރު މެލޭޝިއާގައި ބާއްވާ ދުނިޔޭގެ މިސް ސްކޫބާގައި ރާއްޖެ ތަމްސީލު ކުރާނެ އެވެ. އަދި ދުނިޔޭގެ އެކި ގައުމުތަކުގައި ބާއްވާ ތިމާވެއްޓާ ގުޅޭ އިވެންޓްތަކުގައި ބައިވެރިވެ، އެކި ގައުމުތަކުގެ ތިމާވެއްޓާ ސަގާފަތް ތަޖުރިބާ ކުރުމުގެ ފުރުސަތު ލިބިގެންދާނެ އެވެ.
މިދިޔަ އަހަރު ބޭއްވި މިސް ސްކޫބާ އިންޓަނޭޝަނަލްގެ ބައިވެރިންތަކެއް --