އޯޓިޒަމް ހުންނަ ކުދިންނަށް ހޮންގްކޮންގްގެ އަނާނާ ފައުންޑޭޝަނުން އޮންލައިންކޮށް ކުރިއަށްގެންދާ " އޯޓިސްޓިކް ޓެލެންޓް ގާލާ" ގައި ރާއްޖޭގެ އޯޓިޒަމް އެސޯސިއޭޝަނުގެ ދަރިވަރުންތަކެއް ވަނީ ބައިވެރިވެފަ އެވެ. ހަތް ކުދިން އެ މުބާރާތަށް ލަވަ ހުށަހަޅާއިދީފައި ވެއެވެ.
ރާއްޖެ ހިމެނޭ ގޮތަށް 22 ގައުމަކުން ބައިވެރިވާ އެ މުބާރާތުގައި އެހެން ގައުމުތަކާ ހިލާފަށް ރާއްޖެއިން ބައިވެރިވެފައިވަނީ 14 އަހަރުން ދަށުގެ ކުޑަކުދިންނެވެ. އެކުދިންގެ ފަރާތުން މޮޅު ހުނަރުތަކެއް ވެސް ވަނީ ފެނިފަ އެވެ.
މީގެ ތިން ހަފުތާ ކުރިން ފެށި އެ މުބާރާތަށް ރާއްޖޭގެ ކުދިން ކީ ލަވަތައް އޯޓިޒަމް އެސޯސިއޭޝަނުން ވަނީ ފޭސްބުކް ޕޭޖެއް ހަދައި ފުޅާ ދާއިރާއެއްގައި އާންމުކޮށްފަ އެވެ. ބޭނުމަކަށް ވީ ކުދިން މުބާރާތުގެ ފައިނަލް ދިހައަކަށް ފޮނުވުމަށް ބޭނުންވާ ވޯޓު ހޯދުމެވެ. މިމަހުގެ ހަތް ވަނަ ދުވަހާ ހަމަޔަށް ވޯޓުލާން ހުޅުވާލާފައިވާ އެ ފުރުސަތުގައި ގިނަ ބައެއްގެ ސަޕޯޓް ލިބުނު ނަމަވެސް އަދިވެސް ކުދިންނަށް ވޯޓު ވަރަށް ގިނައިން ބޭނުންވެ އެވެ.
އޯޓިޒަމް ޓެލެންޓް ގާލާގައި ގަދަ ދިހައެއް ހޮވާއިރު މުޅި މުބާރާތުން އެއްވަނަ ހޯދާއިރު ވެސް 30 ޕަސެންޓް ވޯޓުގެ ނަތީޖާ ހިމަނާނެ އެވެ. މުބާރާތުގައި ރާއްޖެ ތަމްސީލްކުރި ކުދިންގެ ތެރެއިން މިހާރުވެސް ރާއްޖޭގެ އެއް ކުއްޖަކު ވަނީ ގަދަ ދިހައެއްގައި ހިމެނިފަ އެވެ. އެއީ މުހައްމަދު ނައްޔާން ފައިސަލް އެވެ. އޯޓިޒަމް އެސޯސިއޭޝަނުން ބުނީ، ބޭނުންވަނީ ހުރިހާ ކުދިންނަށް ވެސް ވޯޓު ހޯދައިދީގެން ގަދަ ދިހައެއްގައި ހިމެނުން ކަމަށާއި އެކަމަށް ހުރިހާ ފަރާތްތަކުގެ އެހީތެރިކަމަށް އެދޭ ކަމަށެވެ.
މުބާރާތުގައި ބައިވެރިވި ކުދިންނަށް އިތުރު ވޯޓު ހޯދައި އެކުދިންގެ ލަވަތައް ޕްރޮމޯޓް ކުރުމުގެ ގޮތުން އޯޓިޒަމް އެސޯސިއޭޝަނުން މިއަދު ވަނީ އެކުދިންގެ ހުނަރާއި އެނޫންވެސް އޯޓިސްޓިކް ކުދިންގެ ހުނަރު ދައްކާލުމަށް ހާއްސަ ހަފްލާއެއް ވެސް ބާއްވާފަ އެވެ.
މިއަދުގެ ހަފްލާ ޝަރަފުވެރިކޮށްދެއްވައި ވާހަކަފުޅު ދައްކަވަމުން ފިނޭންސް މިނިސްޓަރު އަހުމަދު މުނައްވަރު ވިދާޅުވީ، އޯޓިސްޓިކް ކުދިންނަކީ މުޖުތަމައުގެ އެހެން ކުދިންނެކޭ ވެސް އެއްގޮތަށް އެކުދިންގެ ހުނަރު ކުރިއަރުވައިދީ، ފުރުސަތު ފަހިކޮށްދޭންޖެހޭ ކުދިންތަކެއް ކަމަށެވެ. ހާއްސަކޮށް އެފަދަ ކުދިންނަކީ އެ ކުއްޖަކަށް ލިބިފައިވާ ހުނަރެއް އެހެން އާންމު ކުދިންނާ ހިލާފަށް މޮޅު ކުދިންތަކަކަށް ވުމުން އެކުދިންގެ ހުނަރު ކުރިއަރުވަން އެހީ ފޯރުކޮށްދޭން ލިބޭ ކޮންމެ ފުރުސަތެއްގައި ވީ ވަރަކުން އެހީ ފޯރުކޮށްދިނުމަކީ މުޖުތަމައުގެ ހާލަތު ރަނގަޅުކުރުމަށް ވެސް ފަރުދީ ޒިންމާއެއްގެ ގޮތުގައި ދެކިގެން ކުރަންޖެހޭ ކަމެއް ކަމަށެވެ.
މި މުބާރާތުގައި ރާއްޖެ ތަމްސީލުކުރާ ހަތް ކުދިންނަކީ، އަޔާން އާލް، އަހުމަދު ނައްޔާން ފައިސަލް، އާދަމް މާހިލް، ލުމައިހާ އާދިލް، މަރިޔަމް އީޝަލް، އީޝާ ސޮބާ އަދި އަހުމަދު ނަބީހެވެ. މި ކުދިންނަކީ ހަތަރު އަހަރާއި 12 އަހަރާ ދެމެދުގެ ކުދިންނެވެ.
މުބާރާތުގައި ބައިވެރިވި ކުދިންގެ ލަވަތަކަށް ވޯޓު ދިނުމަށް މިހާރުވެސް އޮތީ ފުރުސަތު ހުޅުވާލާފަ އެވެ. އެ މުއްދަތު އަންގާރަ ދުވަހަށް ނިމޭނެ އެވެ. އެ ކުދިންގެ ވީޑިއޯ މޯލްޑިވްސް އޯޓިޒަމް އެސޯސިއޭޝަންގެ ފޭސްބުކް ޕޭޖްގައި ވަނީ ޝެއާކޮށްފަ އެވެ. ވޯޓު ދިނުމަށް ވީޑިއޯ ލިންކަށް ވަނުމަށްފަހު ވޯޓު ދޭ ބަޓަނަށް ފިއްތާލުމުން ވީޑިއޯއަށް ވޯޓު ދެވޭނެ އެވެ. އެންމެ ގިނަ ވޯޓު ލިބޭ ކުއްޖަކަށް ހާއްސަ ސެޓްފިކެޓެއްް ދިނުމަށް ހޮންގްކޮންގްގެ ފައުންޑޭޝަނުން ވަނީ ނިންމާފަ އެވެ. އެކަކަށް ކިތަންމެ ބައިވަރު ކުދިންނަށް ވެސް ވޯޓު ދެވިދާނެ އެވެ.
ވީމާ ހަމަ އެކަނި ލައިކް ދިނުމުގެ ބަދަލުގައި އެއިން ކޮންމި ވީޑިއޯ އަކަށް ވޯޓެއް ދެއްވާށެވެ.