ލާއޯސް ޓީމުގެ ވަހަކަ ދެއްކުމުގެ ބޭނުމެއް ނެތް ކަމަށާއި މިރޭގެ މެޗްގައި ލާއޯސް ބަލިކުރެވޭނެ ކަމުގެ ބޮޑު އުންމީދު އެބައޮތް ކަމަށް ގައުމީ ޓީމުގެ ފޯވަޑް އަސަދުﷲ އަބްދުﷲ (އަސައްކޮ) ބުނެފިއެވެ.
ޔުނައިޓަޑް އަރަބް އެމިރޭޓްސްގައި 2019 ވަނަ އަހަރު ބާއްވާ އޭޝިއަން ކަޕް ކޮލިފައިން އިން ޖާގަ ހޯދުމަށް މިރޭ ލާއޯސްއާ ދެކޮޅަށް ކުޅޭ މެޗްގެ ކުރިން، ވާހަކަ ދައްކަމުން އަސައްކޮ ބުނީ މީގެ ދޮޅު އަހަރު ކުރިން ރާއްޖެ އަތުން ބަލިވި ޓީމުގެ ބައެއް ކުޅުންތެރިން މިހާރު ވެސް އެޓީމުގައި އެބަތިބި ކަމަށާއި އަދި މިހާރު އެޓީމުގެ ސީނިއާ ޓީމުގެ ކުޅުންތެރިންގެ ގޮތުގައި ތިބީވެސް ކުރިން 23 އަހަރުން ދަށުގައި ރާއްޖޭގެ ތީމާ ވާދަކޮށްފައި ތިބި ކުޅުންތެރިން ކަމަށެވެ.
ރާއްޖެއިން ވަނީ ލާއޯސް މެޗަށް ތައްޔާރުވުމުގެ ގޮތުން ބަނގުލަދޭޝް އާ ދެކޮޅަށް ކުޅުނު މެޗް 5-0 ން ކަމިޔަބު ކޮށްފައެވެ. އެ މެޗްގައި އަސައްކޮ ހެޓްރިކް ހެދިއެވެ.
"ބަންގުލަދޭޝް މެޗްގެ ވާހަކަ ދެއްކުމުގެ ބޭނުމެއް ނެތް. އަދި ލާއޯސް މެޗްގެ ވާހަކަވެސް ދެއްކުމުގެ ބޭނުމެއް ނެތް މިހާރު ރާއްޖޭގެ ޓީމުވެސް ވަނީ ބަދަލުވެފަ ޓީމަށް އައި ޒުވާން ކުޅުންތެރިންނާއެކު ރާއްޖޭގެ ޓީމު ވެސް ވަނީ ވަރުގަދަ ވެފަ. އިރާދަ ކުރެއްވިއްޔާ މެޗުން މޮޅުވެވޭނެ" އަސައްކޮ ބުންޏެވެ.
ގައުމީ ޓީމުގެ ކޯޗް ޑާރެން ސްޓެވާޓް ބުނީ "ލާއޯސް މެޗް ކާމިޔާބު ކުރުމަށް ކުޅުންތެރިންގެ ފަރާތުން ފެންނަމުންދާ ހިތްވަރާއި މަސައްކަތުގެ ރޭޓާ މެދު ސުވާލެއްވެސް ނުއުފުދޭ" ކަމަށެވެ.
ރާއްޖޭގައި 2014 ވަނަ އަހަރު ބޭއްވި އޭއެފްސީ ޗެލެންޖް ކަޕްގައި ރާއްޖެއިން ވަނީ ލާއޯސްގެ މައްޗަށް 7-1 ގެ ތަފާތު ބޮޑު ނަތީޖާއަކުން މޮޅުވެފައެވެ. މިރޭގެ މެޗްގައި ލާއޯސްގެ އަމާޒަކީ މަދުވެގެން އެއް ޕޮއިންޓް ހޯދުމެވެ.