ކެޕްޓަން އަލީ އަޝްފާގް (ދަގަނޑޭ) އާއި އަލީ ފާސިރު (ސެންޓޭ) އަދި ހުސައިން ނިޔާޒް މުހައްމަދު (ބޮކުރީ) އޭޝިއަން ކަޕް ކޮލިފައިންފައި ލާއޯސްގެ މައްޗަށް 4-0 އިން ރާއްޖެ އަށް ކުރި ހޯދައިދީފި އެވެ.
މެެޗުގެ ފުރަތަމަ ލަނޑު ސެންޓޭ ޖެހީ ފުރަތަމަ ހާފުގެ ވަރަށް ކުރީކޮޅު އެވެ. އޭގެ ފަހުން ދަގަނޑޭ ލަނޑު ޖެހީ އޭނާ އަށް ލަނޑު ޖަހަން ލިބުނު ގިނަ ފުރުސަތުތަކެއް ބޭކާރުވި ފަހުންނެވެ. ފުރަތަމަ ހާފު ނިމިނިމި އޮއްވައި އޭނާ އަށް ހުސްކޮށް ލިބުނު ބޯޅަ ގޯލަށް ޖެހި ނަމަވެސް ގޯލު ހުރަސްކޮށް ބޭރުވަނިކޮށް ލާއޯސްގެ ޑިފެންޑަރުން ސާފުކޮށްލީ އެވެ.
ދެ ވަނަ ހާފުގައި ފުރަތަމަ ހުހަށް ލިބުނު ބޯޅަ ވެސް ތިން ދަނޑިން އެތެރެކުރެވޭ ވަރެއްނުވި އެވެ. އަދި 66 ވަނަ މިނިޓްގައި ދެ ކުޅުންތެރިން ގައިން ނައްޓާފައި ހުސްކޮށް އޭރިޔާ ތެރެއަށް ވަދެ ކީޕަރުވެސް ނެތީސް ޖެހި ބޯޅަ ދިޔައީ ހުރަސް ދަނޑިމަތިންނެވެ. އޭނާ ލަަނޑު ޖެހީ އޭގެ ފަހުންނެވެ. ނަތީޖާ 3-0 އަށް ބަދަލުކޮށްލީ ބަދަލު ކުޅުންތެރިޔާ ހުސައިން ނިޔާޒް މުހައްމަދު (ބޮކުރީ) އެވެ. 87 ވަނަ މިނިޓްގައި އޭނާ ހުރަސްކޮށްދިން ބޯޅަ ގޯލަށް ވަނީ ކީޕަރު ބޯމަތިން ގޮސް އަރިމަތީ ދަނޑީގައި ވެސް ޖެހިފަ އެވެ. ދަގަނޑޭ ރާއްޖޭގެ ލީޑް ފުޅާކޮށްދިނީ މެޗު ނިމިނިމިއޮއްވަ އެވެ.
ގައުމީ ޓީމުގެ މެޗެއް ބަލަން މިހާތަނަށް އެންމެ މަދުން މީހުން ވަން މި މެޗުގައި ލަނޑު ޖަހަން ސެންޓޭ އަށް ވެސް ރަނގަޅު ފުރުސަތުތައް ލިބުނެވެ. އަދި ހަމްޒާ މުހައްމަދު (ހަމްޕު) މޮޅަށް ކުޅުނުއިރު ބަނގްލަދޭޝް މެޗުގައި ހެޓްރިކް ހެދި އަސަދުﷲ އަށް ފުރުސަތު ލިބުނެވެ. ގާތްގަނޑަކަށް ފަސްހާހެއްހާ މީހުންގެ ކުރިމަތީގައި ކުޅުނު މި މެޗުގައި ރާއްޖޭގެ ގޯލަށް ލާއޯސް އަށް މާނުރައްކާތެރި ހަމަލާއެއް ފޮނުވާލެވިފައެއްނުވެ އެވެ.
މި މެޗަށް ފަހު މި ދެ ޓީމު ކޮލިފައިންގައި ކުޅެންޖެހޭ ފަހު މެޗުގައި ބައްދަލުކުރާނީ އޮކްޓޫބަރު މަހު ލާއޯސްގަ އެވެ. ކޮލިފައިންގެ ގްރޫޕް ސްޓޭޖުން ރާއްޖެ ކަޓުވާލެވޭނީ މި މެޗު ފަސް ލަނޑުގެ ތަފާތަކުން ކާމިޔާބުކޮށްގެންނެވެ.
ސެންޓޭ ލަނޑު ޖެހުމަށްފަހު އުފާ ފާޅުކުރަނީ: މޮޅު ކުޅުންތެރިޔާގެ އެވޯޑް ހާސިލުކުރީ ސެންޓޭ - އަވަސް ފޮޓޯ: އަހުމަދު ޝުރާއު