ފިހާރަތަކުން ވިއްކާ ހަށިގަނޑަށް ގެއްލުންދޭ އުފެއްދުންތަކުން ޓެކްސް ނަގަން ފެށުމަކީ ގައިން ގަޔަށް ނާރާ ބަލިތައް ކޮންޓްރޯލް ކުރުމަށް އެޅޭނެ މުހިއްމު ފިޔަވަޅެއް ކަމަށާއި، ޓެކުހަށް ނަގާ ފައިސާއަކީ އެފަދަ ބަލިތަކުން ރައްކާތެރިވުމަށް ކުރަންޖެހޭ މަސައްކަތްތަކަށް ހޭދަކުރާ ފައިސާ ކަމުގައި ހަދަންޖެހޭ ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެ އެވެ.
ސްރީލަންކާގެ ވެރިރަށް ކޮލަމްބޯގައި މިހާރު ކުރިއަށްދާ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) ގެ ދެކުނު އިރުމަތީ އޭޝިއާ ސަރަހައްދީ ކޮމެޓީގެ 69 ވަނަ ބައްދަލުވުމުގައި ރާއްޖޭގެ ފަރާތުން ވާހަކަފުޅު ދައްކަވަމުން މިނިސްޓަރު ވިދާޅުވީ، މި ސަރަހައްދުގައި ގައިންގަޔަށް ނާރާ ބަލިތަކުން މީހުން މަރުވާ ނިސްބަތް އެންމެ މަތީ ގައުމެއްގެ ގޮތުގައި ރާއްޖެ އޮތް އިރު، އެފަދަ ބަލިތަކުން ހަގު އުމުރުގައި މީހުން މަރުވުން މަދުކުރުމަށް ގިނަ މަސައްކަތްތަކެއް ކުރަންޖެހިފައިވާ ކަމަށެވެ.
ހަކުރު ބައްޔާއި، ލޭ މައްޗަށް ދިއުމާއި، ކެންސަރު ފަދަ ގައިން ގަޔަށް ނާރާ ބަލި ތަކަކީ ދިރިއުޅުމުގެ ވައްޓަފާޅިއާ ގުޅިފައިވާ ބަލިތަކަކަށް ވާއިރު، ދުންފަތާއި އެނޫން ވެސް ވިހަ މާއްދާތައް އެކުލެވޭ ކާބޯތަކެތި މިފަދަ ބަލިތައް ޖެހުމުގައި މުހިއްމު ރޯލެއް އަދާކުރެ އެވެ.
މިނިސްޓަރު ނާޒިމް ވިދާޅުވީ، ދުޅަހެޔޮ ދިރިއުޅުމަކަށް މުޖުތަމައު ހޭލުންތެރިކުރުމަށް ލަފަޔާއި އިރުޝާދު ދޭއިރު، ދުންފަތުގެ ވިޔަފާރިކުރާ ފާރަތްތަކުންނާއި، ތަފާތު ކާބޯތަކެތީގެ އުފެއްދުންތަކުގެ ވިޔަފާރިތަކުން ވެސް އެތަކެތި އިޝްތިހާރުކުރުމަށް ދޫކޮށްލަނީ ނުބައި މެސެޖްތަކެއް ކަމަށެވެ. ނަމަވެސް ސަރުކާރުން ވެސް އެފަދަ އިގްތިސާދީ ހަރަކާތްތަކަށް ފުރުސަތު ދޭ އިރު، އެއާ އެއްމިންވަރަށް އާންމު ސިއްހަތު ރައްކާތެރިކުރުމަށް ގޮވާލާ ފަރާތްތަކުން ވެސް މަސައްކަތް ކުރަންޖެހޭތީ، ދެކަމަށް އެކުގައި ރިއާޔަތްކުރެވޭ، ރަގަޅު ނަތީޖާތަކެއް ނެރެވޭނެ ގޮތަށް ފަރުމާވެފައިވާ ގާނޫނީ އޮނިގަޑުތަކެއް އޮތުމަކީ މުހިއްމު ކަމެއް ކަމަށެވެ.
އެހެންކަމުން "ގައިންގަޔަށް ނާރާ ބަލިތައް ކޮންޓްރޯލު ކުރުމުގެ ބޮޑު މައްސަލައަށް މަސައްކަތްކުރުމަށް ސިއްހަތަށް ގެއްލުންވާފަދަ އުފެއްދުންތަކުން އެކަށީގެންވާ ޓެކްސް ނަގައި އެފަދަ އުފެއްދުންތަކުން ސަރުކާރަށް ވަކިމިންވަރެއް ދައްކަންޖެހޭގޮތަށް ހަމަޖައްސައި މިގޮތްގޮތުން ލިބޭ ފައިސާއަކީ މި ބަލިތަކުން ރައްކާތެރިކުރުމަށް މަސައްކަތްކުރުމަށް ދެމެހެއްޓެނިވި ގޮތުގައި ލިބޭނެ ފައިސާކަމުގައި ހަމަޖެއްސުމަކީވެސް ކުރެވިދާނެ މުހިންމު މަސައްކަތެއް،" ކަމަށް މިނިސްޓަރު ނާޒިމް ވިދާޅުވި އެވެ.
އޭނާ ވިދާޅުވި ގޮތުގައި، ރާއްޖޭން މިހާރު މަސައްކަތްކުރަމުން ދަނީ ދުނިޔޭގެ ފެންވަރުގައި އެއްބަސްވެފައިވާ ގައިންގަޔަށް ނާރާ ބަލިތަކާގުޅޭ އެއްބަސްވުންތަކާ އެއްގޮތަށް، ރާއްޖޭގެ ކަމާގުޅޭ ސިޔާސަތުތަކާއި އެކްޝަން ޕްލޭންތަކާއި އަމާޒުތައް ބައްޓަންކުރުމުގެ މަސައްކަތް ކުރަމުންނެވެ.
އަންނަ ބުރާސްފަތި ދުވަހުގެ ނިޔަލަށް ކުރިއަށްގެންދާ އެ ބައްދަލުވުމުގައި މިނިސްޓަރު ވަނީ، ގައިންގަޔަށް ނާރާ ބަލިތައް ޖެހުމަށް މެދުވެރިވާ ސަބަބުތައް މަދުކުރުމަށާއި، ބަލިހުރިކަން ކުރިން ދެނެގަތުމަށް ގައުމީ ފެންވަރުގެ ކެމްޕޭނެއް މިއަހަރުތެރޭގައި ރާއްޖޭގައި ފަށާނެ ކަމުގެ ޔަގީންކަން ދެއްވާފަ އެވެ. އަދި ގައިންގަޔަށް ނާރާ ބަލިތައް ކޮންޓްރޯލުކުރުމަށް ވެފައިވާ އެއްބަސްވުންތައް އާލާކޮށް، އެކުއެކުގައި މަސައްކަތްކުރުމުގެ ރޫހު އާކޮށް ގައިންގަޔަށް ނާރާބަލިތަކުގެ މައްޗަށް ކުރިހޯދުމަށް މެންބަރު ގައުމުތަކަށް ގޮވާލައްވާފަ އެވެ.
ހެލްތު މިނިސްޓަރު: މިނިސްޓަރު ވަނީ އިއްޔެ ފެށި ސިއްހަތާބެހޭ ސަރަހައްދީ ގައުމުތަކުގެ ކޮމިޓީ ބައްދަލުވުމުގައި ގައިން ގަޔަށް ނާރާ ބަލިތަކަށް މަގުފަހިކުރުވާ ކާބޯތަކެތިން ޓެކުހެއް ނަގަން ގޮވާލައްވާފައި --