ލ. ފޮނަދޫގައި މިއަހަރު ބާއްވާ އީދު ޝޯގައި ޕާފޯމްކުރުމަށް، ފުރަތަމަ އިންޑިއަން އައިޑޮލް އަބީޖީތު ސާވަންތު ގެންނަން ނިންމައިފި އެވެ.
"އަވަސް"އާ ވާހަކަދައްކަވަމުން ފޮނަދޫ ކައުންސިލްގެ ނައިބު ރައީސް އަހުމަދު ރިޔާސް ވިދާޅުވީ މިއަހަރު ބޮޑު އީދު ފާހަގަ ކުރަން އެ ރަށުގެ ތިން އަވަށް ގުޅިގެން ވަރަށް ގިނަ ކުޅިވަރުތަކާއި އެކު ފާހަގަ ކުރާނެ ކަމަށާއި އީދުގެ ފުރަތަމަ ތިން ރޭ ބޮޑު ޝޯއެއް ބާއްވަން ނިންމާފައިވާ ކަމަށެވެ. އަދި އެ ޝޯގައި ފުރަތަމަ އިންޑިއަން އައިޑޮލް އަބީޖީތާއި އޭނާގެ ބޭންޑު ބައިވެރިވާނެ ކަމަށް ރިޔާޒް ވިދާޅުވި އެވެ.
ރިޔާސް ވިދާޅުވީ އަބީޖީތު ރާއްޖެ އަންނަން ހަމަޖެހިފައި ވަނީ އަންނަ ހަފްތާ އަންގާރަ ދުވަހުގައި ކަމަށާއި އޭގެ އަނެއް ރޭ ފޮނަދޫގައި ޕާފޯމް ކުރާނެ ކަމަށެވެ. އެކަމަށް ވާން ޖެހޭ ތައްޔާރީތައް ވަމުން އަންނަ ކަމަށް ކައުންސިލަރު ވިދާޅުވި އެވެ.
"ތިން ރޭ ޝޯ ބާއްވާ އިރު އަބީޖީތު ބައިވެރިވާނީ އެންމެ ފަހު ރޭ. އަބީޖީތާއި އޭނާގެ ބޭންޑު ޕާފޯމް ކުރާނެ. ރަށު ރައްޔިތުން ކެތް ތިބީ ކެތް މަދުވެ ވަރަށް ފޯރީގައި. ލާމުން އަބީޖީތަށް ވަރަށް ހޫނު މަރުހަބާ އެއް ކިޔާނެ،" ރިޔާޒް ވިދާޅުވި އެވެ.
މީގެ ކުރިންވެސް އަބީޖީތު ވަނީ ރާއްޖޭގައި ޕާފޯމްކޮށްފައެވެ. އެއީ އޭނާ އިންޑިއަން އައިޑަލް ކާމިޔާބު ކުރި ދުވަސްކޮޅުގައެވެ. އޭނާގެ ލަވަތަކަކީ އިންޑިޔާގައިވެސް އެތަށް ބައެއްގެ ހިތް އަތުލާފައިވާ ލަވަތަކެކެވެ.
ފޮނަދޫ ބޮޑު އީދަށް އަބީޖީތު ގެނައުމުގެ އިތުރުން ވެސް އަންނަނީ ގިނަ ހަރަކާތްތަކެއް ބާއްވަން ތައްޔާރުވަމުންނެވެ. އެގޮތުން މުޅި އީދަށް ބަހާލައިގެން ކުޅިވަރުތަކާއި ސަގާފީ ހަރަކާތްތައް ބާއްވަން ވަނީ ނިންމައިފައެވެ.