މިއަދު އެމްޑީޕީ-ޖޭޕީން ބޭއްވި މުޒާހަރާއަށް ވުރެ މާ ބޮޑު މުޒާހަރާއެއް ބޭއްވުމުގެ ގާބިލްކަން ޕީޕީއެމްގައި އެބަހުރި ކަމަށް ވިދާޅުވެ، މިއަދުގެ މުޒާހަރާއަށް ޕީޕީއެމްގެ ޕާލިމަންޓްރީ ގްރޫޕްގެ ލީޑަރު އަހުމަދު ނިހާން ހުސެން މަނިކު ގޮން ޖައްސަވައިފި އެވެ.
މުޒާހަރާޔާ ގުޅިގެން ނިހާން ކުރެއްވި ޓްވީޓެއްގައި ވިދާޅުވީ، މިއަދުގެ މުޒާހަރާއަށް އެއްވި ކޮންމެ މީހަކަށް ދެ މީހަކު މާލޭގެ މަގުތަކަށް ނެރުމުގެ ގާބިލްކަން ޕީޕީއެމްގައި އެބަހުރި ކަމަށެވެ. އަދި ޕީޕީއެމްގެ ޑެޕިއުޓީ ލީޑަރު އަހުމަދު އަދީބު އެކަނި ވެސް މިއަދުގެ މުޒާހަރާއަށް ނުކުތް ޖުމްލަ މީހުންގެ ދެ ބައިކުޅަ އެއްބައި ހަމައެކަނި މާލޭން ނެރޭނެ ކަމަށް ވެސް ނިހާން ޓްވީޓް ކުރެއްވި އެވެ.
މިއަދުގެ މުޒާހަރާއަށް ގިނަ ބަޔަކު ނިކުތް އިރު، އެ މުޒާހަރާގެ މައިގަނޑު ޑިމާންޑަކީ ހައްޔަރުކޮށްފައިވާ ކުރީގެ ރައީސް މުހައްމަދު ނަޝީދާއި ކުރީގެ ޑިފެންސް މިނިސްޓަރު މުހައްމަދު ނާޒިމް ދޫކޮށްލުމެވެ. މުޒާހަރާ ރަސްމީކޮށް ނިމުނު ނަމަވެސް މުޒާހަރާގެ ބައިވެރިން އަދިވެސް ތިބީ މަޖީދީ މަގުގައި މުޒާހަރާގަ އެވެ.