ޓީއެފްޖީގެ ޕްރޮގްރާމްތައް ހުކުރު، ހޮނިހިރު ދުވަހު ހިލޭ!

ޓޯޓަލް ފިޓްނަސް ގްރޫޕު (ޓީއެފްޖީ) އިން ހިންގާ ރެޑިކަލް ފިޓްނަސްގެ ކަސްރަތު ޕްރޮގްރާމްތައް ހުކުރު ދުވަހާއި ހޮނިހިރު ދުވަހު އާއްމުނަށް ހިލޭ ހުޅުވާލަން، ޕްރޮގްރާމެއް ހިންގުމަށް ތައްޔާރު ވެއްޖެ އެވެ.

"ޓާކިޝް އެއާލައިން ރެޑިކަލް ފިއެސްތާ 2016" ގެ ނަމުގައި ބިލަބޮންގް ހައި އިންޓަނޭޝަނަލް ސްކޫލުގައި ހުކުރު އަދި ހޮނިހިރު ދުވަހު ބާއްވާ މި ހަރަކާތުގައި ބައިވެރިވާން ބޭނުންވާ މީހުން ޓީއެފްޖީގެ ނަމްބަރަށް ގުޅައިގެން ރަޖިސްޓްރީ ކުރެވޭނެ އެވެ.

ޓީއެފްޖީގެ ސީއީއޯ ހުސެއިން ޒިނާން "އަވަސް" އަށް ވިދާޅުވީ މި ޕްރޮގްރާމުގެ މަގުސަދަކީ ޓީއެފްޖީގައި ހިންގާ ރެޑިކަލް ފިޓްނަސްގެ ޕްރޮގްރާމްތައް އާއްމުން ތަޖުރިބާ ކޮށްލަން ފުރުސަތު ދިނުމެވެ.

"ކޮންމެ އަހަރަކު ވެސް ބާއްވާ އެނުއަލް އިވެންޓެއް މިއީ. އެހެން ފަހަރުތަކުގައި ބާއްވަނީ ޓީއެފްޖީގައި. އެކަމަކު މިފަހަރު ތަފާތުކޮށް މި ބާއްވަނީ،" ޒިނާން ވިދާޅުވި އެވެ.

މި ހަރަކާތުގައި ރެޑިކަލް ފިޓްނަސްގެ މާހިރުން ބައިވެރިވާނެ އެވެ. މީގެތެރޭގައި ނަށަމުން ކުރާ ކަސްރަތު ތަކަށް ދުނިޔޭގައި މަޝްހޫރު އިންޓަނޭޝަލް މާސްޓާ ޓްރެއިނާ މަޑޯކާ އާއި ފްލޮރީ ބައިވެރިވާނެ އެވެ.

ޓީއެފްޖީގެ މި ހަރަކާތް ހުކުރު ދުވަހު އޮންނާނީ މެންދުރު ފަހު ތިނަކުން ރޭގަނޑު ހަތެއް ޖަހަން ދެކަށެވެ. އަދި ހޮނިހިރު ދުވަހު މި ހަރަކާތް ބާއްވަނީ ހެނދުނު 7:00 އިން 9:00 އަށް އަދި ހަވީރު 4:00 އިން ރޭގަނޑު 19:00 އަށެވެ.