މުޒާހަރާގެ ބައިވެރިން ތިބި ސަރަހައްދަކުން ހަތިޔާރުގެ ގޮތުގައި ބޭނުން ކުރެވިދާނެ ތަކެތި ފެނުމަކީ ކަންބޮޑުވުމެއް ކަމަށް ސަރުކާރުން ބުނެފި އެވެ.
ސަރުކާރުގެ ތަރުޖަމާން، އިބްރާހިމް މުއާޒު އަލީ މިއަދު ކުރެއްވި ޓްވީޓެއްގައި ވިދާޅުވީ، އެމްޑީޕީ ޖޭޕީ މުޒާހަރާ ފެށި ސަރަހައްދުން މީހުންނަށް ހަމަލާދެވޭނެ ފަދަ ނުރައްކާތެރި، އަދި ތޫނު ހަތިޔާރު ފަދަ ތަކެތި ފެނުމަކީ ކަންބޮޑުވާން ޖެހޭ ކަމެއް ކަމަށެވެ. އަދި އެކަން ކުރި ބަޔަކު އެ ކުރީ ކަނޑައެޅިގެން ގާނޫނު އަސާސީއާ ހިލާފުކަމެއް ކަމަށް ވެސް އޭނާ ވަނީ ވިދާޅުވެފަ އެވެ.
އެމްޑީޕީ-ޖޭޕީ މުޒާހަރާ ފެށި ސަރަހައްދު އުސްފަސްގަނޑު ހިސާބުން ފެނުނު ތަކެތީގެ ތެރޭގައި ދަނގަޑު ހޮޅި އާއި ކަތިވަޅި އަދި ބޮޑެތި ވަޅިތަކެއް ފެނިފައިވާ ކަމަށް ފުލުހުން ވަނީ ބުނެފަ އެވެ. ނަމަވެސް އެއީ ކޮން ބަޔަކާ ގުޅުން ހުރި ތަކެތި ކަމެއް ފުލުހުން ނުބުނެ އެވެ. ނަމަވެސް އެކަން ބަލަމުން އަންނަ ކަމަށް ފުލުހުން ވަނީ ބުނެފަ އެވެ. މުޒާހަރާ ފެށުމުގެ ކުރިން ފުލުހުން ވަނީ އެ ސަރަހައްދު ފާސްކޮށް އެތަކެތި ގެންގޮސްފަ އެވެ.
އެމްޑީޕީ-ޖޭޕީ އިން ބުނެފައި ވަނީ އެ މީހުންނާ އެތަކެއްޗާ ގުޅުން ނެތް ކަމަށެވެ. އެމްޑީޕީ-ޖޭޕީ އިން ބޭއްވި ބޮޑު އެއްވުން، 6:00 ގައި ނިންމާލުމުން ވެސް މުޒާހަރާގެ ބައިވެރިން ވަނީ ސިޓީ ކައުންސިލް ސަރަހައްދަށް އެއްވެ މުޒާހަރާ ކުރަމުންނެވެ. އެ މުޒާހަރާގައި ހަމަނުޖެހުން ހިނގައި ބައެއް މީހުން ހައްޔަރު ވެސް ކޮށްފައިވެ އެވެ.
