ހިއުމަން ރައިޓްސް ކޮމިޝަން (އެޗްއާރުސީއެމް)ގެ ނައިބު ރައީސް އަހުމަދު ތޮލާލް ފުލުހުންނާ ދިމާކަށް، "ބާޣީންނޭ" ކިޔާ މުހާތަބު ކުރި މައްސަލައެއް ފުލުހުން ރައްޔިތުން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހުށަހަޅައިފި އެވެ.
ފުލުހުންގެ ވެބްސައިޓްގައި ބުނީ، ފުލުހުންނާ ދިމާލަށް "ތިއީ ބާޣީންނޭ" ކިޔާ ތޮލާލް ދިމާކޮށްފައި ވަނީ، ކޯޓު އަމުރެއްގެ ދަށުން މިހާރު ހައްޔަރުކޮށްފައި އިން ކުރީގެ ރައީސް މުހައްމަދު ނަޝީދުގެ ކައިރިއަށް ކޮމިޝަނުން ޒިޔާރަތް ކުރުމަށް ފަހު އެނބުރި މާލެއަށް އައި މަގުމަތީގައި ލޯންޗް ތެރޭގައި ތިބި ފުލުހުންނާ ދިމާލަށް ކަމަށެވެ.
"މި ޢަމަލަކީ މިފަދަ ޒިންމާދާރު މަޤާމެއްގައި ހުންނެވި ބޭފުޅެއްގެ ފަރާތުން ފެނިގެންވާނެފަދަ އަމަލެއްކަމަށް މޯލްޑިވްސް ޕޮލިސް ސަރވިސްއިން ނުދެކެމެވެ. އެހެންކަމުން މިކަން ރައްޔިތުންގެ މަޖިލިހުގެ މިނިވަން މުއައްސަސާތަކާ ބެހޭ ކޮމިޓީއަށް މިހާރުވަނީ ހުށަހަޅާފައި،" ފުލުހުން ބުނެފައިވެ އެވެ.
ރައީސް ނަޝީދު ކޯޓަށް ހާޒިރުކުރުމުގެ ތެރޭގައި އެމަނިކުފާނު ގަދަ ހެއްދެވުމުން ހިނގި ހަމަނުޖެހުންތަކުގެ މައްސަލަ އެޗްއާރުސީއެމް އިން ތަހުގީގު ކުރަނިކޮށް އެ ކޮމިޝަނުން ވަނީ ފުލުހުން އަމަލު ކުރީ ރަހުމް ކުޑަކޮށް ކަމަށް ބުނެ ބަޔާނެއް ނެރެފަ އެވެ. އަދި އެ މައްސަލައިގައި ކޮމިޝަނުން ބުނެފައި ވަނީ މިނިވަން ޑޮކްޓަރަކަށް ދެއްކުމަށް އެޗްއާރުސީއެމް އިން އެދުމުން އެކަމަށް ފުލުހުން މަގުފަހި ކޮށްދީފައި ނުވާ ކަމަށެވެ.