ވޮލީބޯޅަ އެސޯސިއޭޝަންގެ ރައީސްގެ މަގާމަށް ކުރީގެ ކުޅުންތެރިޔާ އަދި އެމްއާރ1ޑީސީގެ ޗެއާމަން މުހައްމަދު ލަތީފް (ލަތީބެ) އިންތިހާބުކޮށްފި އެވެ.
އޭނާ މި މަގާމަށް އިންތިހާބުކުރީ ހޯމް މިނިސްޓްރީގެ ބަލުމުގެ ދަށުން ޒުވާނުންގެ މަރުކަޒުގައި މިރޭ ބޭއްވި ވޮލީބޯޅަ އެސޯސިއޭޝަންގެ އިންތިހާބުގަ އެވެ. މި އިންތިހާބުގައި ލަތީފަށް ވޯޓު ލިބިފައިވެ އެވެ. އޭނާއާ ވާދަކުރީ ކުރީގެ ކުޅުންތެރިޔާ އިސްމާއީލް ރިފާއު (ޗިޗޫ) އެވެ.
މި އިންތިހާބުގައި 12 ކުލަބަށް ވޯޓް ލުމުގެ ހައްގު ލިބިފައިވާއިރު، ރައީސްގެ މަގާމަށް 12 ކުލަބުން ވެސް ވަނީ ލަތީފު އަށް ވޯޓް ދީފައެވެ.
ނައިބު ރައީސް ކަމަށް އިއްޒަތު ވަހީދު ކުރިމަތިލިރު، އޭނާ ހޮވުމަށް ނަގާފައިވަނީ ފެންނަ ނުފެންނަ ވޯޓެކެވެ. 12 ކުލަބުގެ ތެރެއިން 11 ކުލަބުން ވަނީ ފެންނަ ކަމަށް ވޯޓް ދީފައެވެ.
ހަޒާންދާރު ކަމަށް ކުރިމަތިލާފައިވަނީ ކުރީގެ ވޮލީ ކުޅުންތެރިޔާ މުހައްމަދު ރަނޭޝް އަށްވެސް ނަގާފައިވަނީ ފެންނަ ނުފެންނަ ވޯޓެކެވެ. އޭނާއަށްވެސް ފެންނަ ކަމަށް 11 ކުލަބަކުން ވަނީ ވޯޓް ދީފައެވެ.
ރޫލްސް ކޮމިޝަންގެ މެންބަރު ކަމަށް ފަސް ބޭފުޅުން އިންތިހަބު ކުރުމަށް ހަމަޖެހިފައިވާއިރު، އެ ކޮމިޝަންގެ މެންބަރުކަމަށް ކުރިމަތިލާފައިވަނީ ތިން މެންބަރުންނެވެ.
އަލީ އިޔާޒަށް ލިބުނު ވޯޓްގެ އަދަދު 11 އެވެ. އިބްރާހިމް ފަލާހް އަބޫބަކުރަށް 11 ވޯޓެވެ. އަދުނާން އަބްދުރަހީމަށް 11 ވޯޓެވެ.
ޓެކްނިކަލް އެންޑް ޑިވަލްޕްމެންޓް ކޮމިޝަން ހަސަން އަގްލީނަށް 11 ވޯޓެވެ. ސޮފްވާން އަހްމަދަށް 11 ވޯޓް ލިބުނު އިރު މުހައްމަދު ނަދީމަށް 12 ވޯޓެވެ.
މި އިންތިހާބަކީ މި އަހަރު ކުރީކޮޅު ބޭއްވި ވޮލީ އިންތިހާބުގެ މައްސަލަ ސިވިލް ކޯޓަށް ވެއްދުމުން، ހޯމް މިނިސްޓަރީން އިންތިހާބު ބާތިލްކޮށް އަލުން މަގާމުތަކަށް މީހުން ހޮވަން ބޭއްވި އިންތިހާބެކެވެ. ބާތިލްކުރި އިންތިހާބު ކާމިޔާބު ކުރެއްވީ މިދިޔަ ދެ ދައުރުގެ ރައީސް އަދި ކުރީގެ އެއްވަނަ ރެފްރީ މުހައްމަދު ރިޔާޒެވެ. އަލުން އިންތިހާބު ބޭއްވުމުން އޭނާ ވާދައެއް ނުކުރައްވަ އެވެ.
ވީއޭއެމްގެ އިންތިހާބުގައި ރައީސް ކަމަށް އިންތިހާބު ކުރި ލަތީފު -- އަވަސް ފޮޓޯ: އަހުމަދު ޝުރާއު