ބައެއް ހުނަރުވެރިންނާއި ފަންނުވެރިން ތިބެނީ ގެއްލިފަ އެވެ. އާންމުންނާ ހަމަ އަށް ވާސިލުވާނެ މާ ގިނަ ފުރުސަތުތަކެއް ނުލިބިފަ އެވެ. ރާއްޖޭގައި މިއުޒިކް ކުޅޭ ޒުވާނުންގެ ތެރޭގައި އެފަދަ އެތައް ހުނަރުވެރިންނެއް އެބަތިއްބެވެ. ރާއްޖޭގައި ނަން މަޝްހޫރު ލަވަކިޔުންތެރިންނަށް ނުވިޔަސް އެ ފެންވަރުގެ ނުވަތަ އެއަށް ވުރެ ހުނަރުވެރި އާޓިސްޓުން ވެސް އެބަތިއްބެވެ. މިއީ ވެސް އެފަދަ ފަންނާނެއްގެ ވާހަކަ އެވެ.
އެންމެ ފުރަތަމަ އޭނާ ފަތަހަކުރީ ގުރުއާން މުބާރާތްތަކެވެ. އޭނާ އަކީ 1995 ވަނަ އަހަރު ރާއްޖޭގައި ބޭއްވި ހުރިހާ މުބާރާތްތަކުންހެން ރަން ވަނަ ހާސިލުކޮށްފައިވާ ފަރާތެކެވެ. އެއަށް ފަހު މަޖީދިއްޔާ ސްކޫލްގެ ބެޖުގައި އޭނާ ދެން އެރީ ސްކޫލް ކުދިންގެ ލަވަ މުބާރާތަށެވެ. އޭރު އޭނާ އުޅެނީ ގްރޭޑް އަށެއްގަ އެވެ. މުބާރާތުގެ 16 އަހަރުން ދަށުގެ ގްރޫޕުން އެއް ވަނަ ގެންދިޔައީ ވެސް އޭނާ އެވެ.
އެކަމަކު އެ ހިސާބުން ލަވަ މުބާރާތުގައި ވާދަކުރުން އޭނާ ހުއްޓާލީ އެވެ. ޓްރެކަށް ލަވަކިޔުން އެހާ "ސަޅިކަމަކަށް" ނުވުމުންނެވެ. ދެން އޭނާ އާންމުންގެ ތެރެއަށް ނުކުތީ ސެވެންޓީސް ޕޯސްޓާ ބޭންޑްގެ ފްރޮންޓް މޭންގެ ގޮތުގަ އެވެ. އެއަށް ފަހު ޑިންބާ ފެމިލީއާއެކު ރިކޯޑްކުރި "ހިތުގާ ނަށާ ރާނީ" އާއެކު އެހުންތެރިންގެ ހިތުގައި ނަށާ ރާޖާއަކަށް ނިކަން ފަސޭހައިން އޭނާ ބަދަލުވެގެން ދިޔައީ އެވެ.
މެއިންސްޓްރީމް މިއުޒިކަށް ލޯބިކުރާ މީހުންގެ މެދުގައި އިސްމާއިލް އައްފާން މަޝްހޫރުވެގެންދިޔަ ހިސާބަކީ މިއީ އެވެ. ނަމަވެސް އަދިވެސް ބައެއް މީހުންނަށް މިއީ ބީރައްޓެހި މޫނެކެވެ. މޯލްޑިވިއަން އައިޑޮލްގެ ޖަޖެއްގެ ގޮތުގައި އޭނާ ރޭ ދައްކާލުމުން ވެސް "ކޮން އައްފާނެއް ހެއްޔޭ" ކިޔާފައި ބައެއް މީހުން ސުވާލުކުރީ މި ސަބަބާ ހެދި ކަމަށް ވެދާނެ އެވެ.
ނަމަވެސް ދިވެހި އޮރިޖިނަލް މިއުޒިކްގެ ލެޔާގުޅިފައިވާ މީހުންނަށް އައްފާނުގެ ކުޅަދާނަކަމާއި ގާބިލުކަން ވަރަށް ވެސް ސާފެވެ.
އޭނާ ނިސްބަތް ވަނީ ރާއްޖޭގެ މިއުޒިކީ ސްޓޭޖުގައި ޝަރަފްވެރިކަން ހޯދި ހުނަރުވެރިއެއް ކަމަށްވާ ބޮންގޯ ނަސީރުގެ އާއިލާއަށެވެ. ބޮންގޯ ނަސީރަކީ އޭނާގެ ބޮޑުބޭބެ އެވެ.
މިއުޒިކްގެ ތެރެއަށް އައްފާން ވެއްދީ މި އާއިލާ އެވެ. މިއުޒިކަށް ލޯބި އުފެދިފައި އޮތް އޭނާގެ އާއިލާ ތެރެއިން އޭނާ ތައާރަފްވީ މިއުޒިކް ދުނިޔޭގެ އެކި ރަހަތަކަށެވެ. އެކި ކަންކޮޅުތަކުގައި ތިބި އެންމެ ހުނަރުވެރި ފަންނާނުންނަށެވެ. ބޮލީވުޑުން ނަމަ މަޝްހޫރު ކިޝޯރު ކުމާރަށެވެ. އެއަށް ފަހު އެފަދަ ދެވަނައެއް ނެތް ބީޓްލްސްގެ ޖާދުވީ ލަވަތަކަށެވެ. ރާއްޖެ އިން ނަމަ އެމޭޒަން ޖޭޑާއި ދެން ވެސް އޭރުގެ އެންމެ މަޝްހޫރު ބޭންޑްތަކަށެވެ.
ހެވީ މެޓަލްގެ ދުނިޔެއިން މެޓާލިކާ އާއި މެގަޑެތުގެ ލަވަތަކަށެވެ. މި އަޑުތަކުން އޭނާގެ ހުނަރުވެރިކަން އިތުރަށް މުއްސަނދިވީ އެވެ.
އައްފާނު ބުނާ ގޮތުން ނަމަ އޭނާ އަކީ ވަކި ވައްތަރެއްގެ މިއުޒިކަކަށް ހުސްވެފައި ހުރި އާޓިސްޓެއް ނޫނެވެ. މިއީ މިއުޒިކްގެ ހުރިހާ ކަނޑަކަށް ވެސް ހެޔޮވަރު ފަންނާނެކެވެ. ގިޓާގައި އެޅި ސީ ކޯޑަކުން މިއުޒިކް ކުޅެން ފެށި އައްފާން މިހާރު ފިޓްނުވާ ޖޮންރާއެއް ނެތެވެ. ކިޝޯރު ކުމާރުގެ ލަވަތަކުން ބީޓްލްސް އާއި ޕިންކް ފްލޮއިޑް އަދި މެޓާލިކާ އާއި މެގަޑެތު އިން ގޮސް އޭނާ ދަނީ ޑަބްސްޓެޕް ވެސް އެކްސްޕެރިމެންޓްކުރަމުންނެވެ.
އޭނާ އަކީ "ކިލިން މީ ސޮފްޓްލީ" ފަދަ ލަވަތައް ވެސް ނިކަން އަސަރާއެކު ހުށަހަޅައިދީފައިވާ ހުނަރުވެރިއެކެވެ. އެއީ އޭނާ ކުޑައިރު، ގޭދޮށުގައި އެމޭޒަން ޖޭޑް ކަހަލަ ބޭންޑްތައް ހިތާނު ޕާޓީތަކުގައި ކުޅުނު ދުވަސްވަރު ލިބުނު ފުރުސަތުތަކެވެ.
މި އާދަޔާހިލާފު ކަމުގެ ތެރެއިން ނަށަމުން އައިސް އާންމުންގެ ހިތްތައް އޭނާ އަތުލީ ތަންކޮޅެއް ކުރިން އާންމުވި "ހިތުގާ ނަށާ ރާނީ" އިންނެވެ. އެއީ ޑިންބާ ފެމިލީގެ މޭސްތިރި، އިޝާންޓޭގެ އުފެއްދުމެކެވެ. ލޯބީގެ އަސަރުގަދަ އެ ލަވަ، ގިނަ ބައެއްގެ ހިތް ކަތިލަމުން ގޮސް މުޅި މައިދާން ފަތަހަކޮށްލާނެ ކަމަކަށް އައްފާނެއް ވެސް ފުރަތަމަ އުއްމީދެއް ނުކުރެ އެވެ. އެއީ އޭނާ ބުނާ ގޮތުން ނަމަ "ޕަޓަސްލާފައި ދެ ތިން ޓޭކުން ރިކޯޑްކޮށްލި" ލަވަ އެކެވެ.
ނަމަވެސް ލަވަ އަށް ލިބުނީ ފަނޑުވުމެއް ނެތް މަގްބޫލުކަމެއްކަން ޔަގީނެވެ. އެ ކާމިޔާބީގެ ތެރެއިން ގޮސް އައްފާން ދެން ގުޅުނީ މެޓަލް ބޭންޑް، ނޮތުނެގަލްއާ އެވެ. ނޮތުނެގަލްއާ ގުޅެންދެން، މެޓަލް މިއުޒިކް ވެފައި އޮތީ އޭނާއާ އެންމެ ބީރައްޓެހި ޖޮންރާ އަށެވެ. ނަމަވެސް ނޮތުނެގަލް އަށް ރިކޯޑްކުރި ފުރަތަމަ ލަވަ "ސިންސް އޮފް އަވާ ކްރިއޭޝަން" އާއެކު އޭނާގެ މިއުޒިކީ ކެރިއަރުގެ ފިޔަގަނޑުގައި މެޓަލްގެ އަޑު ޖެހި އިތުރަށް ވަރުގަދަވެގެން ދިޔައީ އެވެ.
ނޮތުނެގަލް އަށް އޭނާ ރިކޯޑްކުރި "ވިހަ" އަދި "ރަންނަމާރި" އަކީ އޭނާގެ ލަވަކިޔުމުގެ ހުނަރު އާ އުސްމިނަކަށް ގެންގޮސްފައިވާ ދެ ރިކޯޑިން އެވެ. އައްފާނުގެ އަޑަށް ތައުރީފުކުރަމުން ނޮތުނެގަލްގެ ކޯ ފައުންޑާ އަދި ގިޓަރިސްޓް ހިލާލް ބުނެފައިވަނީ އޭނާގެ ބޭންޑްގެ އަޑު ކަންފަތަށް ފަސޭހަ އަޑަކަށް ބަދަލުކޮށްލަ ދިން މީހަކަށް އައްފާން ވާނެ ކަމަށެވެ.
ސީއެޗްއެސްސީގައި އެކުގައި އުޅުނު ކުދިންތަކަކާ އެކު އުފެއްދި ސެވެންޓީސް ޕޯސްޓާ ބޭންޑާއެކު އޭނާ އާންމުކޮށް މިއުޒިކް ކުޅުނީ އާންމުކޮށް ރިސޯޓްތަކުގަ އެވެ. މިފަހުން އައްފާންގެ އަޑުން ދިވެހިންގެ ހިތްތައް ފަތަހަކޮށްލާފައި ވަނީ މިދިޔަ ރޯދަ މަހު ވީޓީވީ އިން ގެނެސްދިން ކްރޮސްއޯވާ ޝޯގައި ހުށަހަޅައިދިން ހިތްގައިމު ލަވަތަކަކުންނެވެ.
އެއަށް ފަހު މިހާރު، އެންމެން ވެސް ބުނަމުން ދަނީ މިހެންނެވެ. -- އައްފާނަކީ މިވަގުތު ރާއްޖޭގައި ހުރި އެންމެ މޮޅު އެއް ލަވަކިޔުންތެރިޔާ އެވެ! ކުރުގޮތަކަށް ބުނަނީ ނަމަ މޯލްޑިވިއަން އައިޑޮލް އަށް އެ ލިބުނީ "ހިތުގައި ނަށާ ރާޖާއެކެވެ."