ތަރައްގީ ހާސިލްކުރުމުގެ ތެރެއިން ގިނަ ފިލާވަޅުތަކެއް ދަސްވެއްޖެ: ނައިބު ރައީސް

މިލޭނިއަމް ޑިވެލޮޕްމަންޓް ގޯލްސް ނޫނީ ތަރައްގީގެ ލަނޑުދަނޑިތައް ހާސިލްކުރުމުގައި ރާއްޖެއަށް ގިނަ ފިލާވަޅުތަކެއް ދަސްވެއްޖެ ކަމަށާއި، ތަރައްގީއަށް ކުރާ މަސައްކަތުގައި އެ ފިލާވަޅުތަކުގެ ބޭނުން ހިފޭނެކަމަށް ނައިބު ރައީސް އަބްދުﷲ ޖިހާދު ވިދާޅުވެއްޖެ އެވެ.

ޔޫއެންޑީޕީ އަށް 50 އަހަރުފުރުން ފާހަގަކުރުމަށް ހޮޓެލް ޖެންގައި މިއަދު ހަވީރު ބޭއްވި ހަފްލާގައި ނައިބު ރައީސް ޖިހާދު ވިދާޅުވީ، ޔޫއެންޑީޕީ އަކީ ނާޒުކު ހާލަތްތަކުގައިވާ ގައުމުތަކުގެ ތަރައްގީއަށް އެހީތެރިކަން ފޯރުކޮށްދިނުމުގައި ލާމަސީލު މިސާލެއް ކަމަށެވެ. އެގޮތުން ރާއްޖޭގެ އިޖްތިމާއީ އަދި އިގްތިސާދީ ތަރައްގީގެ ލަނޑުދަނޑިތައް ހާސިލުކުރުމުގައި ޔޫއެންޑީޕީން ގިނަ ގުނަ އެހީތަކެއް ވެދީފައިވާ ކަން މިނިސްޓަރު ފާހަގަ ކުރެއްވި އެވެ.

އެމަނިކުފާނު ވިދާޅުވީ، ރާއްޖެ އާއި ޔޫއެންޑީޕީ އާ ދެމެދު އޮތް ގުޅުމުގެ ސަބަބުން ރާއްޖެއާއި ރައްޔިތުންނަށް ގިނަ ފައިދާ ކޮށްފައިވާ ކަމަށެވެ. ރާއްޖެއާއި އެ ޖަމިއްޔާއާ ދެމެދު އޮތް ގާތް ގުޅުން އިތުރަށް ބަދަހިވެގެންދިޔައީ މިލީނިއަމް ޑިވެލޮޕްމަންޓް ގޯލްސް ގެ އަށް ލަނޑުދަނޑީގެ ތެރެއިން ފަސް ލަނޑުދަނޑި ހާސިލްކުރުމަށް ދެފަރާތުން ގުޅިގެން ކުރި މަސައްކަތްތަކު ތެރޭގައި ކަން ނައިބު ރައީސް ފާހަގަ ކުރެއްވި އެވެ. އެކަމުގައި ރާއްޖެއަށް ޔުއެންޑީޕީ އިން ދިން އެއްބާރުލުމަށް އެމަނިކުފާނު ޝުކުރު އަދާކުރެއްވި އެވެ.

"ޔޫއެންޑީޕީން ވަނީ އެކި ދާއިރާތަކުން ރާއްޖެއަށް އެހީ ފޯރުކޮށްދީފައެވެ. އޭގެ ތެރޭގައި، ފަގީރުކަން ނައްތާލުމަށާއި، ތިމާވެށި ހިމާޔަތްކުރުމަށާއި، ދިރިއުޅުމުގެ ފެންވަރު ރަނގަޅުކުރުމަށާއި، ސުލްހަވެރި މުޖުތަމަޢެއް ޤާއިމްކުރުމަށާއި، ތިމާވެއްޓައް އަންނަ ބަދަލުތަކުގެ ސަބަބުން ކުރާ އަސަރު ކުޑަކުރުމަށް ފުޅާ ދާއިރާއެއްގައި ފައިސާގެ އެހީތެރިކަމާއި، އެހެނިހެން އެހީތެރިކަން ފޯރުކޮށްދިނުން ހިމެނެއެވެ،" ނައިބު ވިދާޅުވި އެވެ.

ޖިހާދު ވިދާޅުވިގޮތުގައި، ރާއްޖެ އާއި ޔޫއެންޑީޕީ އާ ދެމެދު އޮތް ގުޅުމަށް 38 އަހަރު ވެފައިވާއިރު އެ ގުޅުމުގެ ސަބަބުން ރާއްޖެއަށްވ ފައިދާ އެވެ. އެހެން ކަމުން ކުރިއަށް އޮތްތާނގައި ވެސް ޔޫއެންޑީޕީ އާ އެކު މަސައްކަތްކުރުމަށް ރާއްޖެ އޮންނާނީ ތައްޔާރަށް ކަމަށް އެމަނިކުފާން ވިދާޅުވި އެވެ.

ޔޫއެންޑީޕީގައި ރާއްޖެ ބައިވެރިވެފައިވަނީ 1978 ވަނަ އަހަރު އެވެ.