ލ އިސްދޫގެ ކަރަންޓުގެ މައްސަލަ ހައްލުކުރުމަށް 360 ކިލޯ ވޮޓުގެ ޖަނަރޭޓަރެއް އެރަށަށް ހޯދައިދޭން ނިންމައި އަންނަ އާދީއްތަ ދުވަހާ ހަމަޔަށް ޖެނަރޭޓަރެއް ގަތުމަށް "ޔުނި އިންޖީނޭރިން ޕްރައިވެޓް ލިމިޓެޑާ"އެކު ފެނަކަ ކޯޕަރޭޝަނުން މިއަދު ސޮއިކޮށްފި އެވެ.
އިސްދޫގައި ކަރަންޓު ދޭން ބޭނުންކުރަމުން އައި އިންޖީނަކަށް ދިމާވި މައްސަލައަކާ ގުޅިގެން ރަށުން ކަރަންޓު ކެނޑުމުން ރައްޔިތުން ވަނީ ގިނަ ދަތިތަކަކާ ކުރިމަތިލާފަ އެވެ.
އިސްދޫއަށް އާ ޖެނަރޭޓަރެއް ގެނައުމަށް ޔުނި އިންޖީނޭރިންއާ އެކު ސޮއިކުރުމަށް މިއަދު ފެނަކަ އޮފީހުގައި ބޭއްވި ރަސްމިއްޔާތެއްގައި ފެނަކައިގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އަހުމަދު ޝަރީފް އެވެ. ޔުނި އިންޖިނޭރިންގެ ފަރާތުން ޖެނަރަލް މެނޭޖާ ގައިސް އިސްމާއިލެވެ.
ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން އެމްޑީ އަހުމަދު ޝަރީފް ވިދާޅުވީ، އާ ޖެނަރޭޓަރު އަންނަ އާދީއްތަ ދުވަހު މާލެއަށް ގެނެވޭނެ ކަމަށެވެ. އަދި އަންނަ ހަފްތާ ނިމެންވާއިރަށް އިސްދޫގައި ޖެނަރޭޓަރު އިންސްޓޯލްކޮށް ހިދުމަތްދޭން ފަށާނެ ކަމަށެވެ.
އިސްދޫގައި މިވަގުތު ހުރީ 160 ކިލޯ ވޮޓުގެ ޖެނަރޭޓަރަކާއި 80 ކިލޯ ވޮޓުގެ ޖަނަރޭޓަރެކެވެ. އިއްޔެ އެރަށުން ކަރަންޓު ކެނޑެން މެދުވެރިވީ 160 ކިލޯ ވޮޓުގެ ޖެނަރޭޓަރުގެ ފިއުލް ޕަންޕަށް ދިމާވި މައްސަލައަކާ ގުޅިގެންނެވެ. އެ މައްސަލަ މިހާރު ރަނގަޅުކޮށްފައިވާ ކަމަށް ފެނަކައިން ބުންޏެވެ.
މިއަދު އެރަށަށް ގެންނަން ނިންމި ޖެނަރޭޓަރާއެކު އެރަށަށް ތިން ޖެނަރޭޓަރު ލިބޭނެ އެވެ. ޝަރީފް ވިދާޅުވީ، އާ ޖެނަރޭޓަރު ލިބުމުން ކުރިން މައްސަލަ ޖެހުނު ޖަނަރޭޓަރު އޯވަހޯލް ކުރުމުގެ މަސައްކަތް ފަށާނެ ކަމަށެވެ. އިސްދޫގެ ކަރަންޓަށް ހައްލެއް ނައިސް ގިނަ ދުވަސްތަކެއް ވެފައިވާއިރު މިއަދު ގަތުމަށް ނިންމާފައިވާ ޖެނަރޭޓަރުގެ ސަބަބުން އެ މައްސަލައަށް ދާއިމީ ހައްލެއް ލިބޭނެ ކަމަށް ފެނަކައިން ބުންޏެވެ.