މާލޭ އޭރިއާގެ ކޮމްޕޯނަންޓްތަކަށް އަމާޒުކޮށްގެން އަސްކަރީ ތަމްރީނުތަކެއް ސިފައިން ފަށައިފިއެވެ. މިއީ އަސްކަރީ ގާބިލްކަން އިތުރުކުރުމުގެ ގޮތުން ފެށި ތަމްރީނުތަކެއް ކަމަށް އެމްއެންޑީއެފްއިން ބުނެ އެވެ.
ތަމްރީނުތަކާ ގުޅޭ ގޮތުން އެމްއެންޑީއެފްއިން ބުނީ މި ތަމްރީނުތަކަކީ، އެމްއެންޑީއެފް މާލޭ އޭރިއާއަށް ނިސްބަތްވާ މެރިންސް އަދި ކޯސްޓްގާޑު ސްކޮޑްރަންގެ ސެއިލަރުން އަދާކުރަންޖެހޭ އޮޕަރޭޝަނަލް ޓާސްކުތަކަށް ތަމްރީނުދީ، ގާބިލްކަން އިތުރުކުރުމުގެ ގޮތުން އެމްއެންޑީއެފް މާލޭ އޭރިއާއިން ކުރިއަށްގެންދާނެ ކަމަށެވެ.
އިއްޔެއިން ފެށިގެން އަންނަ ހުކުރު ދުވަހުގެ ނިޔަލަށް ކުރިއަށްގެންދިޔުމަށް ހަމަޖެހިފައިވާ މި ތަމްރީނުތައް މާލޭގެ ބައެއް ސަރަހައްދުތަކުގެ އިތުރުން ހުޅުމާލެ އާއި، ހުޅުލެ އަދި ވިލިމާލޭ އާއި ތިލަފުށީގައި ކުރިއަށްގެންދިޔުމަށް ހަމަޖެހިފައިވާ ކަމަށް އެމްއެންޑީއެފްއިން ބުންޏެވެ. އަދި މާލޭގެ ވަށައިގެންވާ ކަނޑުގެ ސަރަޙައްދުގައިވެސް މި ތަމްރީނުތަކުގެ ފަރިތަކުރުންތައް ގެންދާ ގޮތަށްވެސް ހަމަޖެހިފައިވާ ކަމަށެވެ.
މި ތަމްރީނުތަކުގައި މާލޭ އޭރިއާ ކޮމްޕޯނަންޓްތަކުގެ ގިނަ އަދަދެއްގެ ސިފައިން ބައިވެރިވަމުންދާ ކަމަށް ވެސް އެމްއެންޑީއެފްއިން ބުންޏެވެ.