މިފްކޯގެ ގިނަ އަދަދެއްގެ މަސް ބަރުކޮށްފައި އޮތް، ބޯޓެއްގައި މިއަދު އަލިފާން ރޯވެފައި ވަނިކޮށް ނިއްވާލައިފި އެވެ. އަލިފާން ރޯވީ ވަނީ މިފްކޯގެ ސަބްސިޑަރީ ކުންފުންޏެއް ކަމަށްވާ، މެރިން މޯލްޑިވްސް ޕްރޮޑަކްޓް (އެމްއެމްޕީ)ގެ ބޯޓެއްގަ އެވެ.
އެނގިފައިވާ ގޮތުގައި، "ބަރޯސާ" ބޯޓުގައި ހުރީ، މިފްކޯއިން ތައިލެންޑަށް ފޮނުވާލުމަށް ތައްޔާރުކޮށްފައިވާ 15 ޓަނުގެ މަހެވެ. ބޯޓުގައި ރޯވި އިރު މިއަދު ނޫނީ މާދަމާގެ ވަގުތެއްގައި މަސް ހިފައިގެން އެ ބޯޓު ތައިލެންޑަށް ފުރުމަށް އޮތީ ތައްޔާރުވެފަ އެވެ. ހާދިސާ ހިނގި އިރު އެ ބޯޓު އޮތީ މާލެ އާއި ތިލަފުއްޓާއި ދޭތެރޭގައި އަޅާފަ އެވެ.
އަލިފާން ރޯވެފައިވަނީ ބޯޓުގެ ފަލްކާގައި ކަމަށް އެމްއެންޑީއެފް އިން ބުންޏެވެ. ބޯޓުގައި ރޯވި އަލިފާން ގަނޑު މިހާރުވަނީ ކޮންޓްރޯލްކޮށްފަ އެވެ. ހާދިސާގައި އެއްވެސް މީހަކަށް އަނިޔާވި ކަމުގެ މައުލޫމާތެއް އަދި ނުލިބެ އެވެ.