ޕާކިސްތާނުގެ ކުރީގެ ބޮޑުވަޒީރު ބޭނަޒީރު ބުއްޓޫގެ ހަޔާތުގެ މައްޗަށް ބޮލީވުޑުން އުފައްދާ ފިލްމުގައި އޭނާގެ ރޯލު ކުޅޭނީ ރަވީނާ ޓަންޑޮން ކަމަށް ރިޕޯޓްތައް ބުނަން ފަށައިފި އެވެ.
ކުރިން ބެލެވިފައި އޮތީ މި ފިލްމުގައި ބޭނަޒީރުގެ ރޯލު ކުޅޭނީ ވިދްޔާ ބާލަން ކަމަށެވެ. ނަމަވެސް ބޮލީވުޑްގެ ރިޕޯޓްތައް ބުނާ ގޮތުން ފިލްމުގެ ސްކްރިޕްޓް ކިޔުމަށް ފަހު ރަވީނާ ވަނީ މި ފިލްމަށް ވަރަށް ބޮޑަށް ޝައުގުވެރިވެފަ އެވެ. ފިލްމުގެ އެއް ޕްރޮޑިއުސަރުގެ ރޯލު އަދާކުރުމަށް ވެސް އޭނާ ޝައުގުވެރިވެ އެވެ.
ކުރިން ބޮޑު މަޝްހޫރުކަމެއް ހޯދި ނަމަވެސް ރަވީނާ އަކީ މިފަހުން ބޮލީވުޑްގައި އެހާ މަޝްހޫރު ތަރިއެއް ނޫނެވެ. އޭނާ ގިނަ ބައެއްގެ ހިތް އަތުލީ 90ގެ ކުރީކޮޅު ނުކުތް އޭނާގެ އަލަތު ފިލްމު "ޕައްތަރު ކީ ޕޫލް" އިންނެވެ. އެއަށް ފަހު އޭރުގެ މަޝްހޫރު ފިލްމުތައް ކަމުގައިވާ "މޮހޮރާ" އާއި "ދިލްވާލޭ" އަދި "ކިލާޅިޔޯންކާ ކިލާޅީ" ފަދަ ފިލްމުތައް ކުޅެފައިވެ އެވެ.
ކޮމާޝަލް ފިލްމުތަކުން ގެއްލުމަށް ފަހު ފަހުން އޭނާ ކުޅެފައި ވަނީ ގިނައިން އާޓް ފިލްމުތަކެވެ.
އެގޮތުން "އަކްސް" އާއި "ސައްތާ" އަދި "ސްކޫލް" ފަދަ ފިލްމުތަކަކީ އޭނާގެ އެކްޓިން އަށް ތައުރީފު އޮހުނު ފިލްމުތަކެވެ.
ބޭނަޒީރުގެ ރޯލަށް ރަވީނާ ހަމަޖެހިއްޖެ ނަމަ އޭނާގެ ކެރިއަރުގެ މުހިންމު ރޯލަކަށް މި ފިލްމު ވެގެންދާނެ ކަމަށް ގިނަ ބަޔަކު ބުނެ އެވެ.
ބޭނަޒީރު އަކީ ދެ ފަހަރެއްގެ މަތިން ޕާކިސްތާނުގައި ބޮޑުވަޒީރުކަން ކުރެއްވި ބޭކަނބަލެކެވެ. އެކަމަނާ އަވަހާރަކޮށްލާފައި ވަނީ ސިޔާސީ އެއްވުމެއްގެ ތެރެއިން 2007 ވަނަ އަހަރު ދިން ބަޑީގެ ހަމަލާތަކެއްގަ އެވެ.