ގައުމީ ވޮލީޓީމުގެ ޓްރެއިނަރަކަށް ޝްރީލަންކާގެ ގައުމީ ވޮލީ ޓީމުގެ ކުރީގެ ކޯޗް ސިސަރަ ކުމާރަ ވެންޑަކުން ހަމަޖައްސައިފި އެވެ.
ވެންޑަކުންގެ އިރުޝާދުގެ ދަށުން ލަންކާގެ ގައުމީ ޓީމު ވަނީ މިއަހަރު ބޭއްވި ސައުތު އޭޝިއަން ގޭމްސްގެ ފައިނަލަށް ދަތުރުކޮށް ރިހިމެޑަލް ހޯދާފައެވެ. ވެންޑަކުންގެ އެންމެ ފުރަތަމަ މަސައްކަތަކަށް ވާނީ އަންނަ ޑިސެމްބަރު މަހު ފަހުކޮޅު ބަނގުލަދޭޝްގެ ޑާކާގައި ބާއްވާ ސެންޓްރަލް ޒޯން ވޮލީބޯޅަ މުބާރާތަށް ދިވެހި ޓީމު ތައްޔާރުކުރުމެވެ.
ވީއޭއެމްގެ ރައީސް މުހައްމަދު ލަތީފު ވިދާޅުވީ ޓްރެއިނަރަކަށް ވެންޑަކުން ހަމަޖެއްސި ނަމަވެސް، ޓީމު ކޯޗަކަށް ދިވެއްސަކު ގެނައުމުގެ ވިސްނުން ގެންގުޅޭ ކަމަށެވެ.
ކުރިއަށް އޮތް ގައުމީ މުބާރާތަށް ފަހު، ގައުމީ ޓީމަށް ވޮލީ ކޯޗަކު ހަމައްޖައްސާނެ ކަމަށް ވީއޭއެމް އިން ބުނެއެވެ.
ސެންޓްރަލް ޒޯން އަށް ތައްޔާރުވާ ގައުމީ ވޮލީ ޓީމަށް ތައިލެންޑް ނުވަތަ ލަންކާއިން ޓްރެއިނިން ކޭމްޕެއް ހަމަޖެއްސުމަށް ވީއޭއެމްއިން ދަނީ މަސައްކަތް ކުރަމުންނެވެ. ޓްރެއިނިން ކޭމްޕްގެ ކުރިއަށް ގެންދާނީ ވެންޑަކުންގެ ބެލުމުގެ ދަށުންނެވެ.