މިއަދުން ފެށިގެން މަސްވެރިންނަށް ވިއްކާ ތެލުގެ އަގު، އަށް ރުފިޔާއަށް ތެޔޮ ލީޓަރަކަށް ހެޔޮކޮށްފި އެވެ. މިއަދުން ފެށިގެން މިފްކޯގެ މަސް ގަންނަ ސެންޓަރުތަކުންނާއި، މިފްކޯގެ ބޯޓުފަހަރު ތަކުން މަސްވެރީންނަށް ތެޔޮ ލިޓަރެއް ވިއްކާނީ ހެޔޮ ކުރި އަގުގަ އެވެ.
މިފްކޯއިން މީގެ ކުރިން ޑީސަލް ލިޓަރެއް ވިއްކަމުން އައީ 8.40 ރުފިޔާ އަށެވެ. އެހެން ކަމުން މިއީ 40 ލާރީގެ އަގުހެޔޮ ވުމެކެވެ.
މިފްކޯއިން ބުނީ ދުނިޔޭގެ ތެލުގެ ބާޒާރަށް ބަދަލެއް ނައިކަމުގައި ވިޔަސް އެކުންފުނިން މިބަދަލު ގެނައީ ސަރުކާރުން މިފްކޯއަކީ އެސްޓީއޯގެ ސަބްސިޑަރީ ކުންފުންޏަކަށް ބަދަލު ކުރުމާއި ގުޅިގެން މަސްވެރީންގެ ކުރިއެރުމަށާއި، ލާބަޔަށް ކުރާ މަސައްކަތުގެ ތެރެއިން މަސްވެރިންނަށް އެހީތެރިކަން ފޯރުކޮށްދިނުމެވެ.
އެސްޓީއޯގެ މެނޭޖިން ޑިރެކްޓަރު، އަހްމަދު ޝަހީރު ވިދާޅުވީ މަސްވެރިންނަށް ވިއްކާ ތެލުގެ އަގު ހެޔޮކުުރުމުގެ ބޭނުމަކީ މަސްވެރިކަމުގެ ސިނާއަތަކަށް އިތުރު ދިރުމެއް ގެނެސްދީ ގިނަ މަސްވެރިން މަހަށް ނުކުތުމަށް ބާރު އެޅުން ކަމަށެވެ.