އަންނަ ހަފްތާގެ ތެރޭގައި ފެލިވަރުގައި އިތުރު އައިސްޕްލާންޓެއް އެޅުމުގެ މަސައްކަތް ފަށަން ނިންމައިފި އެވެ.
މިފްކޯއިން މިއަދު ނެރުނު ބަޔާނެއްގައި ބުނީ ފެލިވަރުގައި އިތުރު އައިސްޕްލާންޓެއް އަޅަން ނިންމީ މަސްވެރިންނަށް އައިސް ގަތުމުގައި ދަތިތަކެއް ދިމާވަމުންދާތީ ކަމަށާއި އަދި މި މަހުގެ ނިޔަލަށް މި އައިސްޕްލާންޓްގެ މަސައްކަތް ނިންމާ ހިދުމަތް ދޭނެ ކަމަށެވެ.
މިފްކޯގެ ބަޔާނުގައި ބުނެފައިވަނީ އުތުރުގެ ބައެއް މަސްވެރިންނާއި މިފްކޯގެ މެނޭޖްމަންޓާއި މިއަދު ބައްދަލުކޮށް މަސްވެރިންނަށް ދިމާވާ ދަތިތައް ހައްލުކޮށް މަސްވެރިންނާއި ރައްޓެހި މާހައުލެއް ގާއިމްކޮށްދިނުމަށް މަސްގަތުމުގެ އޮޕަރޭޝަނަށް ގެންނަންޖެހޭ ބަދަލުތައް ގެންނާނެ ކަމަށެވެ. އަދި ކޫއްޑޫއާއި ފެލިވަރުގައި މަސްގަންނަ އުސޫލުތައް މުރާޖައާކޮށް ހަމަހަމަ އުސޫލަކުން މަސްގަތުމުގެ ކަންތައް އެކުންފުނިން ހަމަޖައްސާނެ ކަމަށް އެ ކުންފުނިން ބުންޏެވެ.
މިފްކޯގެ ކާރުހާނާ ހުންނަ ރަށް، ޅ. ފެލިވަރު ކައިރީގައި މިއަދު ވަނީ މަސްވެރިން މުޒާހަރާ ކޮށްފަ އެވެ.
ގާތްގަނޑަކަށް 14 ވެރަކަށް ދޯނި ނުކުމެ މުޒާހަރާ ކުރީ، އެ ފަރާތްތަކަށް ލިބެން ޖެހޭ ބައެއް ހިދުމަތްތައް ނުލިބޭތީ ކަމަށް ބުނެ އެވެ. އެގޮތުން މަސްވެރިންނަށް ބޭނުންވާ ވަރަށް ތެލާއި އައިސް ނުލިބޭ ކަމުގެ ޝަކުވާ މުޒާހަރާ ކުރަން ތިބި މަސްވެރިން ކޮށްފައިވެ އެވެ. އެގޮތުން ތެޔޮ އަގު ހެޔޮ ކުރުމުގެ އިތުރަށް އައިސް ޕްލާންޓެއް ގާއިމް ކުރުމަށް އެ ފަރާތްތަކުން ދިޔައީ އަޑުއުފުލަމުންނެވެ. އެ ފަރާތްތަކާ މިފްކޯގެ އިސްވެރިން ގޮސް ވަނީ ބައްދަލުކޮށްފަ އެވެ.
ސަރުކާރުން މިއަދު ނިންމާފައި ވަނީ މަސްވެރިންނަށް ތެޔޮ ވިއްކާ އަގު ހެޔޮކުރާށެވެ. އެގޮތުން ތެޔޮ ލީޓަރަކުން 40 ލާރި ވަނީ ހެޔޮ ކޮށްފަ އެވެ. މިހާރު ތެޔޮ ލީޓަރެއް ވިއްކާނީ، 8 ރުފިޔާ އަށެވެ.