ލ. އަތޮލުގެ ގިނަ ރަށްތަކެއް ގުޅުވައިދޭ ގޮތަށް ހަދާފައިވާ 19 ކިލޯ މީޓަރުގެ ލާމު ލިންކުގައި އެމްއެންޑީއެފުން ބާއްވާ "ހައްދުންމަތީ ރޯޑް ޗެލެންޖް" މެރެތަން އެ އިދާރާއިން އިއުލާންކޮށްފިއެވެ. -- މިއީ ރަސްމީކޮށް އަދި ހުޅުވާފައި ނުވާ މި މަގުގައި ބާއްވާ މިފަދަ ފުރަތަމަ ހަރަކާތެވެ.
މި މެރެތަންއަކީ އެމްއެންޑީއެފްގެ ސެންޓްރަލް އޭރިއާ އާއި މޭޑް ރަނާސް އަދި ލ. އަތޮޅުގެ ކައުންސިލިތަކުގެ އެއްބާރުލުމާއެކު ބާއްވާ ހަމަޖެހިފައިވާ މެރަތަން އެކެވެ.
މިއަންނަ މަހުގެ 16 ވަނަ ދުވަހު ބޭއްވުމަށް ހަމަޖެހިފައިވާ ދުވުމުގައި ފުލް މެރެތަންގެ ޓީމް އަދި އިންޑިވިޖުއަލް އިވެންޓް، ހާފް މެރެތަން، 10 ކިލޯ މީޓަރު ދުވުން، ފަސް ކިލޯ މީޓަރު ޓީމް އިވެންޓު އަދި އިންޑިވިޖުއަލް ކެޓަގަރީގެ އިތުރުން ކުޑަކުދިންގެ 1 ކިލޯ މީޓަރު ދުވުން ބާއްވާ ގޮތަށް އެމްއެންޑީއެފުން ވަނަީ ހަމަޖައްސާފަ އެވެ.
މި ދުވުމުގައި ބައިވެރިވާން ބޭނުންވާ ފަރާތްތަކުން މިއަންނަ މަހުގެ ނުވަ ވަނަ ދުވަހުގެ ކުރިން ފޯމް ހުށަހަޅަންޖެހެ އެވެ. ފޯމް އެމްއެންޑީއެފްގެ ވެބްސައިޓުން ލިބެ އެވެ. މާލޭގައި ނަމަ ފޯމު ހުށަހަޅަން ޖެހޭނީ ބަންޑާރަ ކޮށްޓަށެވެ. ލ. އަތޮޅުންނަމަ ކައްދޫގައި ގާއިމުކޮށްފައި ހުންނަ އެމްއެންޑީއެފްގެ ހެޑްކްއާޓަރަށެވެ.