އަންނަ މަހު ބަނގުލަދޭޝްގައި ބާއްވާ އޭޝިއާގެ ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވާ ގައުމީ ވޮލީބޯޅަ ޓީމު 20 ދުވަހުގެ ޓްރެއިނިން ކޭމްޕެއްގައި އަވަށްޓެރި ސްރީލަންކާ އަށް މިއަދު ފުރާނެއެވެ.
މިއަދުގެ މެންދުރު ފަހު ޓީމު ލަންކާ އަށް ފުރުމަށް ހަމަޖެހިފައިވާއިރު ޓީމުގެ ކޯޗަކީ ކާކުކަމެއް މިހާތަނަށް އިއުލާން ކޮށްފައެއް ނުވެއެވެ.
މިއަދު އަވަސްއާ ވާހަކަ ދައްކަމުން ވީއޭއެމްގެ ރައީސް މުހައްމަދު ލަތީފު ވިދާޅުވީ ޓީމު ފުރުމުގެ ކުރިން ސިޓީ ގާޑެން ރެސްޓޯރެންޓްގައި ބާއްވާ ރަސްމިއްޔާތެއްގައި ކޯޗު އިއުލާން ކުރާނެ ކަމަށެވެ.
"ގައުމީ ޓީމުގެ ހެޑް ކޯޗަކަށް ހަމަޖައްސަނީ ބޭރު ކޯޗެއް،" ލަތީފު ވިދާޅުވިއެވެ.
މީގެ ކުރިން ލަތީފު ވިދާޅުވީ ގައުމީ ޓީމުގެ ކޯޗު ކަން ދިވެހި ކޯޗަކަށް ދިނުމުގެ ވިސްނުންތަކެއް ގެންގުޅެމުންދާ ކަމަށެވެ.
މީގެ އިތުރުން ގައުމީ ވޮލީ ޓީމުގެ ޓްރެއިނަރެއްގެ ގޮތުގައި ލަންކާގެ ގައުމީ ޓީމުގެ ކުރީގެ ކޯޗް ސިސަރަ ކްމާރަ ވެންޑަކުން ހަމަޖައްސާފައެވެ. ލަތީފު ވިދާޅުވީ ލަންކާއިން ވެންޑަކުން ޓީމާ ގުޅޭނެ ކަމަށެވެ.
ވީއޭއެމުން ވަނީ ގައުމީ ވޮލީ ކޯޗުގެ އެސިސްޓެންޓް ކޯޗު ކަން މޯލްޑިވިއަން ރެކްރިއޭޝަން ކުލަބުގެ ކޯޗް އިބްރާހިމް ރަޝީދު (ސަތޯ) އަށް ހުށަހަޅާފައެވެ.
ނަމަވެސް ވީއޭއެމުން ހުށަހެޅި ހުށަހެޅުމަށް ސަތޯއަށް އެއްބަސް ނުވެވުމުން ޓީމާއެކު އެސިސްޓެންޓް ކޯޗުންގެ ގޮތުގައި ދާނީ އެހެން ދެ ކޯޗުންނެވެ.