އަންނަ ޑިސެމްބަރު މަހު 19 އިން 28 އަށް ބަނގްލަދޭޝްގެ ވެރިރަށް ޑާކާގައި ބޭއްވުމަށް ހަމަޖެހިފައިވާ ސެންޓްރަލް ޒޯން ވޮލީބޯޅަ މުބާރާތުގައި ރާއްޖޭގެ ޓީމުގެ އަމާޒަކީ ރަން މެޑަލް ހޯދުން ކަމަށާއި ޓީމުގައި އެ ފެންވަރު ހުރިކަމަށް ގައުމީ ކެޕްޓަން އިޝާން މުހައްމަދު (ބަޓިސް) ބުނެފިއެވެ.
ސެންޓްރަލް ޒޯން މުބާރާތަތައް ތައްޔާރުވުމަށް 20 ދުވަހުގެ ޓްރެއިނިން ޕްރޮގްރާމެއްގައި ލަންކާއަށް ދިއުމުގެ ކުރިން މިއަދު މީޑިއާއާ ވާހަކަ ދައްކަމުން ބަޓިސް ބުނީ "އެންމެ ފަހު މުބާރާތަށް ވެސް ނިކުތީ ރަން މެޑަލް އަށް މިފަހަރުވެސް އަމާޒަކީ އެއީ." ކަމަށެވެ.
މިދިޔަ އަހަރުގެ މުބާރާތުން ރާއްޖެ ބަލިވީ ފައިނަލް މެޗްގައި ތުރުކްމުނިސްތާން އަތުންނެވެ. މިފަހަރު މުބާރާތުގައި ޓީމުގައި އާ ކުޅުންތެރިން ވަނީ ހިމެނިފައެވެ.
"ޓީމުގައި ތިބި ކީ ކުޅުންތެރިންނަކީ މިދިޔަ ދެތިން އަހަރު ތެރޭވެސް ޓީމުގައި އެއްކޮށް ކުޅުނު ކުޅުންތެރިން ދެން ޓީމަށް އައި އާ ކުޅުންތެރިންނާއެކު ޓީމު އިތުރަށް ވަރުގަދަ ވާނެ،" ބަޓިސް ބުންޏެވެ.
މިދިޔަ ތިން މަހަކީ ރާއްޖޭގެ އެންމެ ސީނިއާ ކުޅުންތެރިންނަށް ވޮލީގެ ޝެޑިއުގައި ބުރަ ދުވަސްތަކަކެވެ. ސެންޓަރަލް ޒޯން މުބާރާތަށް ތައްޔާރުވާން ޖެހޭތީ މުބާރާތްތައް ކުރިއަށް ގެންގޮސްފައިވަނީ ކައިރިކައިރީގައި ޝެޑިއުލްއަށް ބަދަލު ގެނެސް ގެންނެވެ.
ބަޓިސް ބުނީ ލަންކަގައި ކުރިއަށްދާ ޓްރެއިނިން ޕްރޮގްރާމްގެ ތެރެއިން ރިކަވާ ކުރުމުގެ ވަގުތު ކުޅުންތެރިންނަށް ލިބޭނެ ކަމަށާއި މުބާރާތަށް ދާއިރު ދާނީ މުޅިން ފިޓްކޮށް ކަަމަށެވެ.